Ömrün və sənətin zirvəsində
Nə xoş gün! Səhnə sənətimizin
kraliçası, ustad
sənətkar, Xalq artisti, "Qızıl Dərviş", "Humay",
"Zirvə" mükafatları
laureatı Firəngiz
xanım Şərifova
90 yaşına gəlib
çatıb. 90 il yaşamaq hünəri ilə bu qoca
dünyanı tez-tələsik
tərk edən bütün "vəfasızlar"a
nümunə göstərən
Firəngiz xanım
nadir istedad sahibi, milli sərvət sayılan sənətkarlarımızdandır.
Firəngiz xanım Şərifova heç zaman mətbuata açıq olmayıb. Zadəgan əsilli, qürurlu,
ləyaqətli xanım
özünü heç
vaxt cəmiyyətin müzakirə obyektinə
çevirməyib. Dərdlərini özü çəkib öz içində.
Bəlkə elə buna görə də 90 yaşın astanasında olan Firəngiz xanım xalqın gözündə daha da uca, əlçatmaz
qalıb.
Azərbaycanın iki böyük
sənət korifeyi, milli teatr sənətimizin
yaradıcılarından Abbas
Mirzə Şərifzadə
və Mərziyə xanım Davudovanın ailəsində dünyaya göz açan Firəngiz xanım uşaq yaşlarından teatr mühitində tərbiyə alıb, fitri istedadı və tükənməz çalışqanlığı sayəsində səhnə
sənətimizin sayılan-seçilən
sənətkarları sırasında
özünə layiqli
yer tuta bilib.
Bakı
Xoreoqrafiya Məktəbində,
Azərbaycan Dövlət
Konservatoriyasının "Vokal" şöbəsində
təhsil alan
Firəngiz yaradıcılığının
ilk illərində Azərbaycan
Dövlət Musiqili Komediya Teatrında çalışıb. Öz
bənzərsiz istedadı
ilə teatr mühitində tez parlayan vokalçı aktrisa bu teatrın
səhnəsində Bayadera,
Ulduz, Durna, Gülçöhrə, Gülnaz,
Keto kimi obrazları maraqlı səhnə yozumunda tamaşaçılara təqdim
edib, az zamanda çox sayda pərəstişkar qazanıb.
1949-cu ildə Musiqili
Komediya Teatrı bağlandıqdan sonra Firəngiz xanım zəngin ənənələri
olan Gənc Tamaşaçılar Teatrına
dəvət alır. Ağadadaş
Qurbanov, Yusif Vəliyev, Əliağa Ağayev, Məmmədağa
Dadaşov, Susən Məcidova, Süleyman Ələsgərov, Osman Hacıbəyov kimi şöhrətli sənətkarlarla
çiyin-çiyinə çalışan
aktrisa onun üçün tamamilə
yeni olan bu teatrda sənətin
sirlərinə yiyələnir.
Həmin
illərdə Gənc
Tamaşaçılar Teatrı
gənc nəslin teatr tərbiyəsində
aparıcı mövqedə
dayanırdı. Neçə tamaşaçı nəsli
Firəngiz xanımın
və onun tərəf-müqabillərinin təqdim etdiyi obrazların ən yaxşı keyfiyyətlərini
götürərək bir
insan kimi yetişib. Bu sənət
ocağının səhnəsində
Firəngiz xanımın
ilhamla yaratdığı
"Anacan"da Gülbahar,
"Yaşar"da Yaqut,
"Fitnə"də Fitnə,
"Qaraca qız"da
Yasəmən, "Aydınlığa
doğru"da Şahbikə,
"Keçən ilin
son gecəsi"ndə Həmidə
xanım, "Ovod"da
Cemma, "Mənim nəğməkar bibim"də
Mədinə, "Rübailər
aləmi"ndə Məhsəti
Gəncəvi, "Müsyö
Jordan və Dərviş
Məstəli şah"da
Şərəfnisə, "İki ağanın bir nökəri"ndə
Beatriçe, "Yazığam,
sevmə məni"də
Bəyim, "Rüstəm
və Söhrab"da
Təhminə kimi obrazlar neçə-neçə
nəslin mədəni
zövqünün formalaşmasında,
təlim-tərbiyəsində mühüm rol oynayıb. Bütün bu obrazların
mayasında ana torpağa, Vətənə,
insana sevgi dayanırdı. Firəngiz xanım
teatrın ən parlaq aktrisalarından idi. O, həm dramatik, həm komik, həm də faciə obrazlarını eyni məharətlə yaradırdı.
Firəngiz xanımın yaradıcılığında
müxtəlif illərdə
yaratdığı Gülbahar,
Şahbikə, Həmidə,
Mədinə, Məhsəti,
Bəyim, Təhminə
kimi güclü, fədakar, məğrur qadın obrazları xüsusi yer tutur.
Mahir səhnə ustası
"Azərbaycanfilm" kinostudiyasının
istehsal etdiyi "Qərib cinlər ölkəsində", "Bayquş
gələndə", "Vacib müsahibə",
"Qum üzərində ev",
"Gümüşgöl əfsanəsi", "Qətl
günü" və
başqa filmlərdə
də gözəl, ürəyəyatan obrazlar
yaradıb.
Uzun ömür yaşayan insan həyatın bütün şirinlikləri ilə yanaşı çox ağrı-acılara dözməli olur. Bu, böyük Yaradanın insana yazdığı qismətdir. Firəngiz xanım Allaha çox bağlı olan insandır. Belə deyir ki, əgər Allah məni hələ burda saxlayırsa, demək, bunun bir səbəbi var. Məncə, səbəb budur ki, Firəngiz xanım sovet dövlətinin qorxunc repressiyalarının qurbanı olmuş, sənət ömrü, arzuları yarımçıq qalmış atası, məşhur tragik Abbas Mirzənin, özü üçün həyatda bir gün də yaşamayan, həyatını yalnız sənətə həsr edən, yaradıcılığının ən kamil çağında dünyadan köçmüş anası Mərziyə xanımın yarımçıq qalmış ömrünü davam etdirsin. Min bir əziyyətlə böyüdüb, gözəl təhsil və tərbiyə verdiyi nəvələri Eldar və Muradın uğurlarına sevinə bilsin.
İndi daha çox xəyallarla baş-başa qalan bir pəri uzanıb yataqda. Bizlərə kiçik yaşlarımızda şirin nağıl qəhrəmanları bəxş edən böyük aktrisa. Mənsub olduğumuz nəslin görmədiyi, kimdənsə eşidərək, teatr tariximizin kitablardan oxuyub xəyalımızda canlandırdığımız personajları onun yaddaşında diridir, canlıdır. Bu yaddaşda Hüseyn Cavid, Cəfər Cabbarlı, Üzeyir bəy, Abbas Mirzə, Mərziyə xanım, Ülvi Rəcəb, Qəmər xanım Topuriya, Ələkbər Süheyli, İsmayıl Hidayətzadə və daha kimlər var. O uzaq zamanları bizimlə birləşdirən bağdır Firəngiz xanım. Həyatın bütün keşməkeşlərindən çıxaraq çox xoşbəxt sənətkar taleyi yaşayan ustad aktrisanın sənət yolu bu gün teatra qədəm qoyan gənc nəslə bir örnəkdir.
90 il yaşamaq, onun 60 ilini səhnədə olmaq böyük hünərdir. Belə bir hünər sahibinə, böyük sənətkarımıza Tanrı dərgahından cansağlığı arzulayaq!
Kəmalə CƏFƏRZADƏ,
teatrşünas
525-ci qəzet.- 2014.- 6 fevral.- S.7.