Çıxmaz yadımızdan...

Sabah əziz, unudulmaz qohumumun

vəfatından 40 gün keçir

Köçdü bu dünyadan Nənəqız ana,

"Salyanın anası" deyirdik ona;

Adı vəhdətiydi cüt gözəl sözün;

Qəlbi ocağıydı alovun, közün.

Birinci doxsanı qarşılayaraq,

İkinci doxsana qoymuşdu qədəm;

...Sönüb səxavətlə nur yayan çıraq,

Dalğınam-əlimdə titrəyir qələm.

Vaxt ötüb gah yavaş, gah yeyin-yeyin,

Zəhməti süfrəyə bəzək, dad verib;

Həyat yoldaşıtək Məmmədhüseynin

Bütün arzulara qol-qanad verib.

Köçdü bu dünyadan bilirsiniz kim?

Müdrik, alicənab, nüfuzlu alim

Rahim müəllimin güvənci idi,

Bir canlı xəzinə, ləl, inci idi!

Fəsillər arxada, fəsillər öndə.

Çalışıb yurd, mahal, el yolunda o;

Ərzə göz açsa da Kür sahilində,

Qarışıb torpağa Xırdalanda o.

Köçdü bu dünyadan Nənəqız ana-

Dəyərdə həftəsi aya tən xanım.

Min-min məktəbliyə dərs keçən xanım

Beş övlad bəxş edib Azərbaycana.

Nə qədər yaz, payız qalıb geridə,

Nə qədər uğurlu illər yaşanıb!

Artıq kitablarda, xatirələrdə

Ölümdən sonrakı ömrü başlanıb!

Rza Oqtay

525-ci qəzet.- 2014.- 13 iyun.- S.7.