Naxçıvan Teatrında "Kuklalar evi"nə ictimai baxış olub

Cəlil Məmmədquluzadə adına Naxçıvan Dövlət Musiqili Dram Teatrının böyük Norveç dramaturqu Henrik İbsenin "Kuklalar evi" üçpərdəli psixoloji dramı əsasında hazırladığı tamaşaya ictimai baxış keçirilib. Tamaşanın quruluşçu rejissoru Tofiq Seyidov, quruluşçu rəssamı Naxçıvan Muxtar Respublikasının (MR) Əməkdar rəssamı Əbülfəz Axundov, musiqi tərtibatçısı isə Fətəli Axundzadədir.

Avropada yeni dramaturgiyanın yaradıcısı, sosial-psixoloji dramın banisi kimi tanınan Henrik İbsenin "Kuklalar evi" əsərində insanın daxili aləmi, sosial ziddiyyətləri, ümumbəşəri problemləri real hadisələrin inkişafı fonunda ortaya qoyulur.

Bu tamaşa son dörd ildə teatrın klassik Avropa dramaturgiyasından səhnəyə qoyduğu ikinci əsərdir. Teatr 2010-cu ildə böyük alman dramaturqu Q.E.Lessinqin "Müdrik Natan" tamaşasını səhnəyə qoyub. Tamaşadan sonra Naxçıvan MR-in mədəniyyət və turizm naziri Sarvan İbrahimov, Ali Məclis Aparatının sektor müdiri Turqayə Əliyeva, Xalq rəssamı Hüseynqulu Əliyev, Azərbaycan Respublikasının Əməkdar artisti Xəlil Hüseynov, Naxçıvan MR-in əməkdar mədəniyyət işçisi, şair-dramaturq Həsənəli Eyvazlı, Xalq artistləri Rza Xudiyev, Rövşən Hüseynov, Kamran Quliyev, tamaşanın quruluşçu rejissoru Tofiq Seyidov çıxış edərək bu səhnə əsəri haqqında fikir və rəylərini bildiriblər.

S.ABDULLAYEVA

525-ci qəzet.- 2014.- 20 iyun.- S.7.