Oqtay Rza

əməkdar müəllim

Mübarək

Çingiz Əlioğlunun 70 yaşına

Gözəl Füzulidə – yayda doğuldun,

Barlı, bərəkətli ayda doğuldun;

Zirvədən-zirvəyə addımlayaraq,

Bütün məmləkətin övladı oldun!

Duyğular al-əlvan, təzətər, yeni...

Qürbətdən xalqına salam gətirdin;

Halal mükafatın-“Qran Pri”ni

Alıb, Nəşriyyatda hədiyyə verdin.

Dözüm arzuladın köçkün yurddaşa,

Mərhum qardaşımın adaşı Çingiz!

Gərək Qələbəylə çatdıraq başa

Qarabağ uğrunda savaşı, Çingiz!

Bu misran məni də kövrəldib bir az:

“Bir qanadım şəhər, bir qanadım kənd”.

...Səni alqışlayıb Güneydə Şiraz,

Səni İstanbula çağırır millət.

Min nəğmə səslənir könül tarında,

Tale sirdaşındır el-vətən qızı:

Deyirsən tutarlı uğurlarında

Az deyil Südabə xanım qayğısı.

Həftə var-dəyərdə sanki aya tən,

Çoxalıb mərasim, iclas, xeyir iş...

O gün “ağ gecə”li, uzaq ölkədən

Nəvən Turanelli zəng eləyibmiş.

Söz-məlhəm, nur, işıq;

Söz-qılınc, raket...

“Axıdıb alnının inci tərini”,

Milyon oxucuya yenə də bəxş et

Şeir gülşəninin çiçəklərini.

Ürəkdən sıxırıq əlini bərk-bərk,

Bayramı mübarək Əlioğlunun!

Özünü həmişə şux, gümrah görək

Çingiz xan, Çingiz bəy Əlioğlunun!

525-ci qəzet.-2014.- 28 may.- S.4.