Azərbaycanlı balerina nüfuzlu beynəlxalq müsabiqənin laureatı olub

Dövlət Akademik Opera və Balet Teatrının balet truppasının gənc və istedadlı solisti, Prezident mükafatçısı Ayan Eyvazova Almaniyada keçirilən nüfuzlu beynəlxalq müsabiqədə iştirak edib və müsabiqənin laureatı olub.

Teatrın mətbuat xidmətindən verilən məlumata görə, Berlin şəhərində keçirilən “Tanzolymp” adlı müsabiqədə ABŞ, Yaponiya, Rusiya, Belarus, İtaliya, İspaniya, Almaniya və digər ölkələrdən nümayəndələr iştirak edib. Ayan Eyvazova müsabiqədə ölkəmizi təmsil edərək klassik rəqs nominasiyası üzrə qalib olub və bürünc medal qazanıb. Müsabiqənin münsiflər heyətində bir sıra dünya şöhrətli balet mütəxəssisləri, o cümlədən Rusiyadan V.Vasilyev, V.Malaxov, S.Filin və başqaları təmsil olunub. Ayan Eyvazova 2012-ci ildə Bakı Xoreoqrafiya Məktəbini əla qiymətlərlə başa vurub və Mədəniyyət və Turizm Nazirliyinin göndərişi ilə 2012/2013-cü tədris ilində Moskva Dövlət Xoreoqrafiya Akademiyasında stajartırma kurslarında təhsil alıb. 2013-cü ilin sentyabrından Opera və Balet Teatrının balet truppasında çalışır. Hazırda 19 yaşı olan balerina 2010-cu ildən Prezident mükafatçısıdır.

S.ABDULLAYEVA

525-ci qəzet.- 2014.- 1 mart.- S.20.