Azərbaycan ilk dəfə Yaponiyada beynəlxalq əməkdaşlıq festivalına qatılıb

Yaponiyanın İto şəhərində təşkil edilmiş beynəlxalq əməkdaşlıq festivalında ilk dəfə təqdim olunan Azərbaycan stendi iştirakçılar tərəfindən böyük maraqla qarşılanıb. Azərbaycanın Yaponiyadakı səfirliyindən verilən məlumata görə, İto şəhərinin meri Hiromi Tsukuda bildirib ki, artıq ənənəyə çevrilmiş bu festival yerli sakinlərlə digər xalqlar arasında sıx dostluq münasibətlərinin formalaşmasında mühüm rol oynayır. Festivalda İto şəhərinin dünyanın müxtəlif ölkələrində qardaşlaşdığı şəhərləri də öz stendləri, milli rəqs və musiqiləri ilə fəal iştirak edirlər. Ötən ilin noyabrında Azərbaycanın İsmayıllı rayonu ilə İto şəhəri arasında dostluq mübadiləsi haqqında müqavilənin imzalandığını xatırladan H.Tsukuda festivalda ilk dəfə Azərbaycan stendinin də təqdim edildiyini deyib.

Tədbirdə çıxış edən Azərbaycanın Yaponiyadakı səfiri Gürsel İsmayılzadə deyib ki, gündoğar ölkədə ənənə halını almış beynəlxalq festivallar burda yaşayan müxtəlif xalqların nümayəndələri arasında mehriban əməkdaşlıq, səmimi qonşuluq münasibətlərinin qurulmasında, onların həm yapon xalqının, həm də bir-birinin mədəniyyətini, adət-ənənələrini öyrənməsində mühüm əhəmiyyət kəsb etdiyini vurğulayıb: «İto şəhərinin rəhbərliyinə və sakinlərə mehriban dostluq münasibətinə və əməkdaşlığa görə minnətdaram. Bu festival müxtəlif xalqların adət-ənənələri və mədəniyyəti ilə yaxından tanış olmaq üçün əlverişli şərait yaradır».

Diplomat, həmçinin qədim və zəngin mədəniyyətimiz haqqında danışaraq UNESCO-nun qeyri-maddi mədəni irs siyahısına daxil edilmiş muğam sənəti, baharın gəlişini bildirən Novruz bayramı, ölkəmizin turizm imkanları barədə qonaqları məlumatlandırıb: «Bu gün Azərbaycan həm tarixi, həm də müasirliyi özündə əks etdirən bir məkandır. Qədim İpək yolunun tərkib hissələri olan Azərbaycanla Yaponiyanı dərin tarixi köklər birləşdirir, iki ölkə arasında bu gün də ümumi maraqlara və hörmətə əsaslanan dostluq münasibətləri qürur doğurur».

Sonra tədbir iştirakçıları Azərbaycan, İngiltərə, Fransa, Avstraliya və İtaliya səfirlikləri tərəfindən hazırlanmış stendlərlə tanış olub.

Azərbaycan səfirliyinin hazırladığı stenddə milli adət-ənənələrimizi, Bakı mənzərələrini əks etdirən eksponat və rəsm əsərləri, ölkəmiz haqqında yapon dilində müxtəlif nəşrlər, “İRS-İsan” jurnalının nömrələri, İsmayıllı rayonundan gətirilmiş ərzaq məhsullarının və şərabların nümunələri tədbir iştirakçılarına təqdim edilib.

Yaponiya-Azərbaycan əlaqələrilə bağlı digər tədbiri isə “Elm çırağı” İctimai Birliyi Üzeyir Hacıbəyli adına Bakı Musiqi Akademiyasında (BMA) Yaponiyanın Azərbaycandakı səfirliyinin təşkilati dəstəyi ilə keçirib. “Yaponiya azərbaycanlıların gözü ilə” mövzulu bu elmi seminarda qurumun sədri, professor Naidə Məmmədxanova deyib ki, tədbirin Yaponiyanın azərbaycanlılar tərəfindən tanınmasına, dərkinə həsr olunması təsadüfi deyil: «Müasir azərbaycanlı üçün Yaponiya coğrafi baxımdan uzaq olsa da, gündəlik həyatımıza bir o qədər yaxındır. Yaponiyanın müasir texnikası bizim həyatımızın bütün sahələrinə daxil olub, bu ölkənin cüdosu, karatesi, demək olar ki, artıq bizim milli idman növlərimizə çevrilib. Samuray, xarakiri, sakura çiçəyinin açılması və digər yapon anlamları sanki Gündoğar ölkədən bizə gəlməyib, həmişə özümüzünkü olub. Yapon milli mətbəxi nümunəsi olan suşi indi əksər azərbaycanlının sevimli yeməyinə çevrilib, ikebana sənəti dizayn salonlarının ayrılmaz hissəsi olub. Yaponiyanın möhtəşəm Kabuki teatrı, klassik ədəbiyyatı, filmləri də bizə çox yaxındır. Coğrafi baxımdan uzaq olan və eyni zamanda, bizə yaxınlaşmış Yaponiya bu gün də sirli məkan olaraq qalır. Bu əsrarəngizlik bizi həm təəccübləndirir və həm də cəlb edir. Bu baxımdan “Yaponiya azərbaycanlıların gözü ilə” mövzusunda elmi seminarda müzakirə olunacaq mövzular böyük əhəmiyyət daşıyır».

Tədbirdə çıxış edən Yaponiyanın Azərbaycandakı səfirliyinin 3-cü katibi Yusuke Fukuda elmi seminarın əhəmiyyətini xüsusi vurğulayıb: «Seminarın mövzusu azərbaycanlıların digər xalqların mədəniyyətinə, adət-ənənəsinə xüsusi diqqətlə yanaşdıqlarını bir daha təsdiqləyir. İki ölkə arasında əlaqələr gündən-günə genişlənir. Azərbaycan və Yaponiya hər ikisi tolerant ölkədir».

Bakı Musiqi Akademiyasının prorektoru Oqtay Abbasquliyev tədbirin əhəmiyyətini yüksək qiymətləndirib.

Elmi seminarda Yusuke Fukudanın “Yaponiya cəmiyyətinin dinə və həyata baxışı”, həmçinin azərbaycanlı alimlərin “Azərbaycan-Yaponiya əlaqələri müasir kulturoloji tədqiqatlar obyektivində”, “Yaponiya bağları və parkları”, “Azərbaycan və yapon dillərinin müqayisəli antroponimikası” və digər mövzularda çıxışları dinlənilib. Tədbirdə Fidan Nəsirovanın hazırladığı ikebana nümunələri nümayiş etdirilmiş, BMA-nın tələbələri tərəfindən yapon xalq mahnısı “Albalı”, “İedo körpüsündə”, eləcə də hər iki ölkənin bəstəkar mahnıları ifa olunub.

S.ABDULLAYEVA

525-ci qəzet.- 2014.- 4 mart.- S.7.