Musiqili Teatrda ad günü

Azərbaycan Dövlət Musiqili Teatrında yubiley hazırlığı görülürdü. Direktor Əliqismət Lalayev, "Sabah saat 11-də mənim otağlımda Şükufə xanımla Telli xanımın yığcam bir yubiley tədbiri keçiriləcək" deməsi rəhbərin mətbuat katibinə verdiyi ənənəvi təlimat təəssüratı bağışlasa da yenə də beynimdə sual işarəsi yaratdı. Kiçik bir otaqda yubiley tədbiri necə keçiriləcək? Kimlər olacaq? Bu qədər insan balaca otağa necə sığacaq? Şübhələrim əsassız deyildi. Çünki jurnalistikada olduğum müddətdə tanınmış şəxslərin yubiley məclislərini səhnədən görməyə adətkardayam. Şablon, darıxdırıcı, bir az səmimi, bir az da qeyri-səmimi təriflərə qulaqlar da alışıb, gözlər də. Ona görə də etiraf edim ki, bu tipli tədbirlərin bir çox hallarda həvəssiz, yazı yazmaq xatirinə, necə deyərlər, candərdi tamaşaçısı olmuşam. Beynimdəki suallara cavab tapmağın tək yolu sabahkı günü gözləmək idi.

Sabahkı gün...　

Sənətçilərdən Azərbaycanın Xalq artisti Şükufə Yusupova, Çingiz Əhmədov, Gültac Əlili, Amil Həsənoğlu, rejissor Əsgər Əsgərov, truppa müdiri Vidadi Həsənov, direktor müavinləri Elxan Ocaqov və Hüseyn Hüseynov, teatrda Telli xanımın rəhbərlik etdiyi ədəbi dram şöbəsinin gənc əməkdaşları - Vəfa, Ağca, Emin... Hamı direktorun otağında, üstü çeşid-çeşid şirniyyatlarla dolu jurnal masasının ətrafında toplaşmışdı. Hər kəsin üzündə xoş, səmimi bir təbəssüm.

Teatrın "atası" kimi yubiley açılışını Əliqsmət müəllim edərək məclisin səbəbkarlarını təbrik etdi, arzu və diləklərini çatdırdı. Tədbir rəsmi açılışla başladı. Axı, Əliqismət müəllim yaradıcı şəxs olmaqla yanaşı, həm də bir məmurdu. Amma rəsmi hissə çox qısa sürdü. Sonra isə təklif yenə də Əliqismət müəllimdən gəldi: “Yaradıcı şəxslər toplaşsın bir yerə, bizim "fotoqraf Əlibəy" şəklinizi çəksin. Güllərinizi unutmayın".

Şüküfə Yusupova: Bəs, siz Əliqismət müəllim?

Əliqismət Lalayev: Siz yaradıcı şəxslərsiniz, bizim milli sərvətimizsiniz. Biz sadəcə prodüserlər, inzibatçılar, bu işləri həyata keçirənlərik.

O anı əbədiləşdirmək üçün hamı bir-bir kamera qarşısında poz verməyə başlayır. Kadr kadrı əvəzləyir. Direktor otağının pəncərəsindən düşən günəş şüası, arabir də pərdələri yellədən sərin meh ruha xüsusi ovqat qatır. Hələ yubiley səbəbkarlarının çöhrələrindəki məmnunluğu, kövrək baxışlarındakı minnətdarlıq və məmnunluq hissini demirəm. Yaradıcı insana xas həssaslıq, zəriflik, adi bir xoş sözdən, isti bir baxışdan belə təsirlənmə hissini nə Telli xanım, nə də ki, Şükufə xanım gizlətmək fikrində idi. Bircə qalırdı məmnunluq qarışıq sevinci sözə, cümləyə düzmək...

Telli Pənahqızı: Yol boyu gələrək fikirləşirəm ki, insan üçün ən önəmli məqam çalışdığı kollektivin ona verdiyi dəyərdir. Mənim şərəfimə ay yarım öncədən planlaşdırılan bu yubiley mərasimi də bir insanın, bir kollektiv rəhbərinin əməkdaşına verdiyi qiymətdir, hörmətdir. Əliqismət müəllim, haqqınızda olan düşüncələrimi bilirsiniz, bunu həm mətbuat vasitəsilə, həm də dost ünsiyyətimizdə dəfələrlə demişəm, ona görə də Sizi tərifləmək niyyətində deyiləm. Minnətdaram - bu sevginiz, bu qayğınız, diqqətiniz üçün.

Necə ki, Siz hər kəsi sevirsiniz, ürəyinizdə hər kəsə yer var, Allah da bunun əvəzini Sizə, ailənizin, nəvələrinizin xoşbəxt günlərini göstərməklə versin. Minnətdaram hər birinizə. Nə yaxşı ki varsınız.

Şükufə Yusupovanın xoşbəxtlikdən dolmuş gözlərini görməmək, hiss etməmək mümkünsüz idi, nə qədər gizlətməyə çalışsa da: "Telli xanımın sözünə qüvvət olaraq bir kəlməylə deyim ki, ailə, övladlar, nəvələr bir yana, amma kollektivin, sənət yoldaşlarının diqqəti çox önəmlidir. Üç ildir ki, mən bu teatrda "Evlənmə" tamaşasını oynayıram. Və burada özümü qətiyyən yad hiss etmirəm. Bu diqqətə, doğmalığa, sevgiyə görə bütün kollektivə minnətdaram. Bəzən sevgi dolu bir baxış, ürəkaçan bir kəlmə, kiçik bir jest də sənətçi üçün ən böyük dəyərdir. Səhər-səhər kövrəltdiniz bizi, Əliqismət müəllim" - deyən aktrisa həssaslığına birtəhər hakim ola bildi.

Teatrın direktor müavini Elxan Ocaqov: "İcazə verin, bir kəlmə də mən deyim. Telli xanım, Şükufə xanım, sizi təbrik edirəm. Siz bu xalqın sevimli, bəxtəvər insanlarısınız, çünki həm tamaşaçılar, həm işlədiyiniz kollektiv, həm ətrafınızdakı insanlar tərəfindən sevilirsiniz. Tanrının bundan böyük xoşbəxtliyi yoxdur. Bu da sizə qismət olub....".

Əliqismət müəllim: Yubilyar xanımlar, buyurun hər biriniz öz tortunuzu kəsin. Amil, səsinlə bizi feyziyab et.

Və təbii ki, tort kəsimində alqışlarla "Happy Birthday"in Azərbaycan versiyasını unutmaq olmazdı.

Elə bu an teatrın solisti Nərgiz Kərimova təngnəfəs özünü direktorun otağına çatdırdı: "Salam, bağışlayın, bir az gecikdim". Və girər-girməz Telli xanımı, Şükufə xanımı bağrına basıb öpür, ürəyindən gələn bütün xoş, sevgi sözlərini ünvanlayır onlara.

Əliqismət müəllim: İndi Nərgiz xanımı cərimələyəcəyik - gözəl bir mahnı oxuyacaq.

Nərgiz Kərimova: Məmnuniyyətlə.

Əliqismət müəllim: Onda buyur. İstədiyin mahnı ilə təbrik elə. Hələ Amil də sənin səsinə səs verəcək!.

Nərgiz Kərimova və Amil Həsənoğlunun gah solo, gah da duet oxuduqları nəğmələr, daha sonra konsertmeyster Zülfiyyə Sadıqovanın pianoda müşayiətilə Gültac Əlilinin mahnıları bayram ovqatını tamamlayır...

Yenə ev yiyəsi qismində Əliqismət Lalayev məclisi yekunlaşdırır:" Nə qədər qəribə olsa da, insanlar ömrünün çox hissəsini işdə keçirir. Biz, özümüzü işə həsr edən insanlarıq. İşimizə ailəmiz qədər çox diqqət ayırırıq. Özəlliklə sənət adamları öz sevgilərini ailələrilə yanaşı tamaşaçılarla, tanımadıqları insanlarla bölüşür. Sevgini paylaşmaqdan gözəl nə ola bilər? Əminəm ki, bundan da gözəl ad günləri keçirəcəksiniz, istər ailənizlə, istərsə də həmkarlarınızla, sənət dostlarınızla birgə. Amma bu balaca otaqda, bu səmimi ortamda, bərabər keçirdiyimiz bu dəqiqələri heç unutmayacaqsınız: ilk dəfə Musiqili Teatr olaraq biz sizi təbrik etdik. Biz ilklərə imza atan insanlarıq. Bu gün mən bütün kollektivi bura yığmaq istərdim, çünki bu sənət məbədində çalışanların hamısı sizi sevir. Lakin bilavasitə sizə bağlı olan insanları bura dəvət etdim ki, siz özünüzü daha rahat hiss edəsiniz".

SEVDA BABAYEVA

525-ci qəzet.- 2014.- 28 may.- S.8.