Filarmoniyada Ramiz Zöhrabovun 75 illiyi qeyd olunub

Dövlət Filarmoniyasında görkəmli musiqişünas alim, Xalq artisti, "Şöhrət" ordenli Ramiz Zöhrabovun 75 illik yubileyi qeyd edilib.

Gecədə sənətşünaslıq doktoru R.Zöhrabovun Azərbaycan musiqi elminə verdiyi dəyərli töhfələrdən geniş söhbət açılıb.

Azərbaycan Bəstəkarlar İttifaqının katibi, musiqişünas Lalə Hüseynova Ramiz Zöhrabovun Azərbaycan musiqi elmində özünəməxsus yeri olduğunu xatırladıb: "Xalq və professional musiqimizə, bəstəkarlarımızın yaradıcılığına həsr olunmuş 24 monoqrafiyanın, dərsliyin və 300-dən artıq elmi, populyar məqalənin müəllifi olan R.Zöhrabovun tədqiqatlarının başlıca obyekti muğamdır. Onun musiqi elminin bir sahəsi olan muğamşünaslığın inkişafında mühüm xidmətləri var. R.Zöhrabovun ilk dəfə olaraq, görkəmli xanəndələrin ifasından 100 təsnifi nota yazması və onun əsasında təsniflərin janr xüsusiyyətlərinin və musiqi dilinin təhlilini aparması, o cümlədən 9 zərbi-muğamı xanəndə və sazəndə ansamblının ifasından partitura şəklində nota yazaraq, onların nəzəri əsaslarını öyrənməsi diqqətəlayiqdir. Ramiz Zöhrabovun tədqiqat əsərləri digər ölkələrdə - Rusiyada, Orta Asiya ölkələrində, o cümlədən İran elmi mühitində maraqla qarşılanıb. Onun muğamın nəzəri əsasları ilə bağlı tədqiqatı fars dilinə tərcümə edilib. Əvvəlcə hissə-hissə jurnallarda, sonra isə tam şəkildə kitab halında "Azərbaycan modal musiqisi" adı ilə nəşr olunub.

Ramiz Zöhrabovun musiqişünas kimi elmi yaradıcılığının bir qolu da təhsil və maarifçiliklə bağlıdır. Vaxtilə onun televiziyada müəllifi və aparıcısı olduğu "Bəstəkarlarımızın portreti", "Sənətə həsr olunmuş ömür", "Poeziya və musiqi", "Romans axşamı" və xüsusilə "Xalq musiqisi inciləri" silsiləsindən "Muğam sənəti haqqında", muğam dəstgahlarına həsr edilmiş verilişləri tamaşaçıların yaddaşına həkk edilib. İndiki musiqişünaslar nəslinin əksəriyyəti görkəmli alimin tələbəsi olub". Yubilyarın çoxşaxəli fəaliyyətindən bəhs edən musiqiçilər qeyd ediblər ki, R.Zöhrabov, həmçinin bir çox musiqişünasların diplom işlərinin, magistr və namizədlik dissertasiyalarının elmi rəhbəri, doktorluq dissertasiyalarının elmi məsləhətçisi olaraq onlara, öz tədqiqat metodikasını aşılayıb və ardıcıllarını yetişdirib. Tədbirdə musiqiçilər bəstəkarın əsərlərindən nümunələr səsləndirilib.

S.ABDULLAYEVA

525-ci qəzet.- 2014.- 28 may.- S.7.