Naxçıvan Dövlət Universitetində "İlyas Əfəndiyev -100: İşıqlı sənət" müzakirə edilib

Naxçıvan Dövlət Universitetində (NDU) "İlyas Əfəndiyev -100: İşıqlı sənət" mövzusunda elmi konfrans keçirilib.

NDU-nun mətbuat şöbəsindən "525"ə verilən məlumata görə, tarix-filologiya fakültəsinin təşkil etdiyi konfransı universitetin rektoru, professor Saleh Məhərrəmov açaraq Prezident İlham Əliyevin İlyas Əfəndiyevin 100 illik yubileyinin keçirilməsi haqqında 2014-cü il 16 yanvar tarixli Sərəncamını xatırladıb. O, dövlətimizin başçısının Sərəncamının görkəmli yazıçı-dramaturqun bədii irsinin öyrənilməsi, bütövlükdə Azərbaycan ədəbiyyatının təbliği baxımından əhəmiyyətindən söhbət açıb, İlyas Əfəndiyevin çağdaş Azərbaycan bədii nəsrinin və dramaturgiyasının inkişafındakı xidmətlərindən danışıb.

Rektor öz üslubu ilə hər zaman fərqlənən, xalqımızın söz xəzinəsinə dəyərli töhfələr verən İlyas Əfəndiyev kimi böyük sənətkarların heç zaman unudulmayacağını, bundan sonra da onun əsərlərinin sevilə-sevilə oxunacağını vurğulayıb.

Filologiya üzrə fəlsəfə doktoru, dosent Əbülfəz Əzimli ədibin ömür və sənət yolundan danışaraq bildirib: " Yazıçı ədəbiyyatın bütün janrlarında kamil sənət nümunələri yaradıb. Azərbaycan nəsrinin yüksək bədii-estetik səviyyəli nümunələri kimi şöhrət qazanmış "Körpüsalanlar", "Dağlar arxasında üç dost", "Sarıköynəklə Valehin nağılı" kimi povest və romanları, "İşıqlı yollar", "Bahar suları", "Atayevlər ailəsi" və bu kimi digər məşhur pyeslərin müəllifi olmaqla Azərbaycan ədəbiyyatında özünəməxsus yer tutan, sevilən sənətkarlardan birinə çevrilib".

Konfransda filologiya elmləri doktoru, professor Sədaqət Həsənova "İlyas Əfəndiyevin əsərlərində dil və üslub məsələləri", filologiya üzrə fəlsəfə doktoru, dosent Arifə Zeynalova "İlyas Əfəndiyevin əsərlərində frazeoloji vahidlərin işlənmə məqamları" mövzularında məruzələr edərək İ.Əfəndiyev yaradıcılığından, onun əsərlərinin Azərbaycan ədəbiyyatında, Azərbaycan ədəbi dilinin inkişafında, zənginləşməsindəki böyük rolundan bəhs ediblər.

Filologiya üzrə fəlsəfə doktoru Seyfəddin Eyvazov "İlyas Əfəndiyevin tarixi dramları" mövzusunda məruzəsində onun "Xurşidbanu Natəvan", "Şeyx Xiyabani", "Hökmdar və qızı" dramlarında Azərbaycan tarixinin real bədii inikasından, tarixi şəxsiyyətlərin parlaq simalarının canlandırılmasından danışıb.

Konfransda yazıçı-dramaturqun həyat və fəaliyyətini əks etdirən slaydlar nümayiş etdirilib.

S.ABDULLAYEVA

525-ci qəzet.- 2014.- 30 may.-S.7.