“Gördüyümüz işlərin əsas istiqaməti və baş mövzusu Qarabağ olmalıdır”

Skandinaviya Ölkələri ilə Mədəni və Elmi Əlaqələr İctimai Birliyinin sədri Nazim Əhmədli Azərbaycan Prezidenti Yanında Qeyri-Hökumət Təşkilatlarına Dəstək Şurasının maliyyəsi ilə Norveç və İsveç Krallıqlarında səfərdə olub. Səfərin məqsədi adıçəkilən ölkələrin universitetlərində Qarabağ həqiqətləri ilə əlaqədar guşə yaratmaq və seminar keçirmək olub .Bununla bağlı Skandinaviya Ölkələri ilə Mədəni və Elmi Əlaqələr İctimai Birliyinin sədri Nazim Əhmədli ilə həmsöhbət olduq.

– Nazim müəllim əvvəlcə təmsil etdiyiniz QHT haqqında məlumat vermənizi istərdik.

– Skandinaviya Ölkələri ilə Mədəni və Elmi Əlaqələr İctimai Birliyi 2012 –ci ildə Ədliyyə Nazirliyi tərəfindən qeydiyyyata alınıb.QHT–nin əsas məqsədi Azərbaycanın milli- mənəvi, elmi dəyərlərini, bir sözlə milli mədəniyyətimizi, ədəbiyyatımızı, incəsənətimizi Skandinaviya ölkələrində təbliğ etməkdir. Ancaq indi xalqımızın erməni işğalçıları ilə üz-üzə qaldığı bir şəraitdə təbii ki, bizim o ölkələrdə gördüyümüz işlərin əsas istiqaməti və baş mövzusu Qarabağ olmalıdır.

– İlk səfəriniz də yəqin ki, Qarabağla əlaqədar idi?

–Bəli. Dövlətin, dövlət başçısının, ordunun və siyasətçilərin bu münaqişə ilə əlaqədar öz missiyası var. QHT–lər də dövlətimizin daxili və xarici siyasətinə uyğun olaraq öz işlərini qurmalıdır. Mən də bir QHT sədri olaraq üzərimə düşən son dərəcə məsuliyyətli bir işin yerinə yetirilməsi üçün çalışdım. İki ölkədə beş tədbir keçirdik.

– Keçirdiyiniz tədbirlər barədə məlumat verməniz yaxşı olardı.

– Demək olar ki, keçirdiyimiz bütün tədbirlər haqqında məlumatlar səfər müddəti ərzində AzərTac vasitəsi ilə Azərbaycan və Respublika qəzetlərində və bir neçə başqa KİV-lərdə yayıldı. Onu da qeyd edim ki, Osloda Azərbaycan evinin sədri Ramil Əliyev keçirilən bütün tədbirlərin təşkilatçısı idi. Ramil Əliyev on ildən artıqdır ki, Norveçdə Azərbaycanın milli- mənəvi dəyərlərini təbliğ edir. Qarabağ münaqişəsi ilə əlaqədar çoxsaylı tədbirlərə də imza atıb.

İlk olaraq Oslo Universitetinin kitabxanasında sərgi açdıq. Üç gün davam edən sərgidə Qarabağ münaqişəsini, Xocalı soyqırımı və Azərbaycanın milli mədəniyyətini əks etdirən çoxsaylı kitablar, bukletlər və video kasetlər nümayiş etdirdik. Təbii ki, sərgi ilə maraqlanan xarici tələbələrə və müəllimlərə də sərgidə nümayiş olunan kitab və bukletlərdən hədiyyə olundu. Sərginin ikinci günü Azərbaycanın İsveçdəki səfiri Adış Məmmədov da öz xanımı ilə bərabər Oslo Universitetinə gələrək sərgidə iştirak etdi və kitabların bir qismini də Oslo Universitetinin kitabxanasının direktoru Halvor Konqshavna təqdim etdi.. Sərginin video yazısı var və yəqin ki, hazır olanda televiziyaların birində veriliş zamanı yayımlanacaq və sosial şəbəkələrdə paylaşılacaq.

İkinci tədbirimiz Osloda keçirilən Saqinə festivalında yer aldı. 10 may 2014-cü ildə Oslo şəhərinin ən böyük bələdiyyəsi olan Saqinə bələdiyyəsi Saqinə festivalını keçirirdi. Saqinə festivalında Norveç Krallığının hökumət və Qeyri-Hökumət təşkilatları , siyasi partiyalar və nüfuzlu ictimai siyasi qurumlar iştirak edirdi. Saqinədə fəaliyyət göstərən ən aktiv təşkilatlarından biri olan Azərbaycan evi də hər il olduğu kimi bu il festivala dəvət almışdı. Festivalda Norveçin milli mətbəx nümunələri, milli geyimləri, bitki və gül nümunələri, Osloda yaşayan müxtəlif xalqların nümayəndələrinin gətirdikləri milli məişət əşyaları nümayiş etdirilirdi. Həm də bu festival Suriyada vətəndaş müharibəsindən əziyyət çəkən insanlara yardım məqsədi daşıyırdı. Skandinaviya Ölkələri ilə Mədəni və Elmi Əlaqələr İctimai Birliyi də Oslo şəhərindəki Azərbaycan Evi ilə əməkdaşlığı çərçivəsində Saqinə festivalında Qarabağ həqiqətlərini əks etdirən kitab sərgisi açdı. Mən və Ramil Əliyev festivala gələn iştirakçılara və siyasi partiya nümayəndələrinə, eləcə də maraqlanan Norveç vətəndaşlarına ermənilərin Xocalıda və Qarabağda törətdikləri vəhşilik barədə məlumat verdik və sərgidə nümayiş olunan kitab və bukletlərdən onlara bağışladıq.

– Nazim müəllim, siz tədbiri necə planlaşdırmışdız?

– Əslində iki nəfərin getməyi nəzərdə tutulmuşdu və tədbir ancaq Oslo Universitetində olmalıydı. Lakin Oslodakı Azərbaycan evinin sədri Ramil Əliyevin orada olması ilə əlaqədar bu tədbirləri birgə keçirmək qərarına gəldik və müqavilə çərçivəsində işə başladıq. Üçüncü tədbirimiz İsveçin Linkopik Universitetində oldu. İsveçin Linkopink Universitetində Ermənistanla Azərbaycan arasındakı Dağlıq Qarabağ münaqişəsi ilə bağlı seminar keçirdik. Universitetin professor, müəllim və tələbə heyətinin iştirak etdiyi tədbirdə Dağlıq Qarabağ münaqişəsi haqqında film nümayiş olundu.

İsveç-Azərbaycan gənclər təşkilatının rəhbəri Mahirə Muxtarlı seminar iştirakçılarına Ermənistanla Azərbaycan arasında Dağlıq Qarabağ münaqişəsinin səbəbləri və acı nəticələri barədə məlumat verdi. Bildirdi ki, Ermənistanın apardığı təcavüzkar siyasət nəticəsində Azərbaycanın Dağlıq Qarabağ bölgəsi və ona bitişik 7 rayonu işğal olunub. Sonra mən və Ramil Əliyev çıxış etdik. Ermənistanın yürütdüyü işğalçılıq siyasətini pisləyən bəyənatlar verdik. Xocalıda insanları amansızcasına qətlə yetirən ermənilərin insanlığa qarşı ən ağır cinayət törətdiyini qeyd etdik. Bildirdik ki, erməni təcavüzü nəticəsində bir milyondan artıq insan qaçqın və məcburi köçkünə çevrilib. BMT Təhlükəsizlik Şurası tərəfindən erməni qoşunlarının Azərbaycanın işğal edilən ərazilərindən dərhal çıxarılması barədə 822, 853, 874 və 884 saylı qətnamələrin qəbulundan 20 ildən artıq vaxtın ötməsinə baxmayaraq, Ermənistan təşkilatın bu tələblərinə məhəl qoymadan işğalçılıq siyasətini davam etdirir.

Sonra seminar iştirakçılarının suallarını cavablandırdıq və onlara Dağlıq Qarabağ münaqişəsi haqqında kitab və bukletlər payladıq.

–Nazim müəllim, iki ölkədə bu tədbirlərin keçirilməsi sizin üçün çətinlik yaratmadımı?

–Deyə bilərəm ki, Skandinaviyaya səfərim başlayandan Bakıya qədər 17 gün ərzində 8 dəfə təyyarə dəyişdim, bir dəfə qatarla və bir sutka da avtomobil kirayələyib İsveçə getdik. Sonuncu seminarımız Norveçin Berqen şəhərində oldu. E.Qriq Musiqi Akadamiyasında azərbaycanlı tələbələr “Azərbaycan-türk mədəniyyət evi”nin və Bergen Universitetinin nəzdində fəaliyyət göstərən E.Qriq adına Musiqi Akademiyasının birgə təşkilatçılığı, Qriq Akademiyasının azərbaycanlı tələbəsi Nigar Qəhrəmanovanın təşəbbüsü, mənim təmsil etdiyim “Skandinaviya ölkələri ilə Mədəni və Elmi Əlaqələr” İctimai Birliyinin, Cənubi Azərbaycan Milli Demokratik Hərəkatı Təşkilatının, Akademik Kvarter Tələbə Cəmiyyətinin və Müqəddəs Yohannes kilsəsinin dəstəyi ilə Azərbaycan Mədəniyyəti Günləri keçirildi. Mədəniyyət günləri çərçivəsində Dağlıq Qarabağ və erməni terroru mövzusunda seminar keçirdik və mən bu mövzuda məruzə etdim. Seminarda həmçinin Qarabağ həqiqətlərini təbliğ edən kitab və bukletlərdən ibarət guşə yaratmışdıq. Bu, əcnəbi qonaqların marağına səbəb oldu. Seminarın ikinci hissəsində Qriq Akademiyasının orqan ifaçılığında beynəlxalq diplom dərəcəsi üzrə təhsil alan Azərbaycan Respublikasının Prezidentinin təqaüdçüsü, respublika və beynəlxalq müsabiqələr laureatı Nigar Qəhrəmanovanın çıxışları dinlənildi. N.Qəhrəmanova əvvəl məruzəsində “Azərbaycan xalq və klassik musiqisi tarixi” haqqında əcnəbi vətəndaşlara məlumat verdi, milli-mədəni irsimiz olan muğamdan, eyni zamanda, dahi bəstəkarlarımızdan söhbət açdı. Cənubi Azərbaycan Milli Azadlıq Hərəkatınin fəal sözçüsü Simin Sabri Cənubi Azərbaycan milli azadlıq hərəkatı və mədəniyyəti tarixi, Norveç və Azərbaycan xalqlarının qədim əlaqələri və genetik yaxınlığı mövzularında Norveç dilində geniş məlumat verdi. Qriq Akademiyasında piano ifaçılığı üzrə magistr təhsili alan azərbaycanlı tələbə Humay Qasımzadə Azərbaycanın müasir bəstəkarlıq məktəbinin layiqli nümayəndələrindən olan Türkər Qasımzadənin “Şur məqamı” əsərini təqdim etdi. Azərbaycan ədəbiyyatı mövzusunda diaspor üzvləri üçün çağdaş ədəbiyyatımızdan danışdım və yeni şeirlərimi oxudum.

Vəfa MƏMMƏDLİ

525-ci qəzet.- 2014.- 31 may.- S.10.