Əbülfəs Qarayev macarıstanlı həmkarını qəbul edib

Mədəniyyət və Turizm Nazirliyində Azərbaycanın mədəniyyət və turizm naziri Əbülfəs Qarayevin Macarıstanın xarici işlər və ticarət naziri Peter Siyarton ilə görüşü olub. Nazirliyin mətbuat xidmətindən verilən məlumata görə, Peter Siyarton qonaqpərvərliyə görə nazir Əbülfəs Qarayevə minnətdarlığını bildirərək qeyd edib ki, Azərbaycan ilə Macarıstanı bir çox sahələrdə, o cümlədən mədəniyyət sahəsində möhkəm əlaqələr birləşdirir.

Görüş zamanı Əbülfəs Qarayev Azərbaycanda təşkil olunmuş beynəlxalq mədəniyyət tədbirlərindən - forumlardan, konfranslardan, festivallardan, sərgilərdən və başqa tədbirlərdən bəhs edib. Ə.Qarayev xüsusi vurğulayıb ki, bugünlərdə Azərbaycanda III Bakı Beynəlxalq Teatr Konfransı keçirilir. Konfransda dünyanın hər yerindən tanınmış teatr kollektivlərinin nümayəndələri, mütəxəssislər, mədəniyyət və incəsənət xadimləri iştirak edirlər.

Həmin gün Heydər Əliyev Fondunun, Heydər Əliyev Mərkəzinin və Macarıstanın ölkəmizdəki səfirliyinin dəstəyi ilə çap olunan "Azərbaycan-Macarıstan mətbəxi" kitabının təqdimatı da baş tutub. Təqdimat mərasimində Azərbaycan ilə Macarıstan arasında siyasi, iqtisadi, mədəni və digər sahələrdə əlaqələrin inkişaf etdiyi bildirilib, Heydər Əliyev Fondunun beynəlxalq layihələr çərçivəsində Macarıstanda da bir sıra layihələr reallaşdırdığı qeyd olunub, bu il bu ölkədə əlil uşaqlar üçün yeni reabilitasiya korpusunun təməlinin qoyulduğu vurğulanıb.

Tədbirdə qeyd olunub ki, xalqları bir-birinə tanıdan, sevdirən dəyərlərdən biri də mətbəx mədəniyyətidir: "Hansı xalqın mətbəxi daha qədim və zəngindirsə onun dünyada daha geniş coğrafiyada tanınmaq şansı da bir o qədər böyükdür. Son illər mətbəx mədəniyyətinin təbliği, tanınması istiqamətində ciddi işlər görülür, festivallar keçirilir, yeni nəşrlər hazırlanır".

Macarıstanın Azərbaycandakı səfiri Jolt Çutora Heydər Əliyev Fondunun həyata keçirdiyi layihələri yüksək qiymətləndirib: "Azərbaycan və macar dillərində işıq üzü görən nəşrdə hər iki xalqa məxsus milli yeməklər, zəngin mətbəx nümunələri barədə ətraflı məlumatlar verilir".

Azərbaycan mətbəxinə böyük sevgi ilə yanaşdığını deyən diplomat vurğuladı ki, bu sevgi onu ölkəmizə daha çox bağlayıb.

"Azərbaycanda Macarıstanı yaxşı tanıyırlar", - deyən səfir qeyd etdi ki, ikitərəfli münasibətlərin inkişafı çoxsaylı yüksək səviyyəli səfərlərlə bağlıdır: "Azərbaycan-Macarıstan mətbəxi barədə ilk kitabı tərtib etmək mənim üçün çətin olmadı. Mən həm yeməyi, həm də bişirməyi xoşlayıram və həmçinin bir-birinə çox yaxın olan Azərbaycan və macar mətbəxini hədsiz dərəcədə sevirəm".

Səfir kitabın hazırlanmasında böyük dəstəyə görə Heydər Əliyev Fondunun prezidenti Mehriban Əliyevaya minnətdarlığını bildirib. Tədbirdə ölkəmizdə səfərdə olan Macarıstanın xarici işlər və ticarət naziri Peter Siyarto qonaqlara macar mətbəxi nümunələrinin dadına baxmağı tövsiyə edib: "Azərbaycana beşinci dəfədir ki, səfər edirəm. Ölkələrimiz arasında siyasi, iqtisadi, mədəni və digər sahələrdə əlaqələr dinamik inkişaf edir. Ölkələrimizi və xalqlarımızı dostluq münasibətləri bağlayır, bir çox ortaq xüsusiyyətlərimiz var və bu, sevindirici haldır. Kitabın nəşrini iki ölkə arasında olan dostluq əlaqələrinə töhfədir, ümid edirəm ki, yeni nəşri oxuyan hər bir kəs hər iki xalqı daha yaxından tanıyacaq və sevəcək".

P.Siyarton Macarıstan mədəniyyət müəssisələrinin fəaliyyəti barədə məlumat verib və bu sahədə iki ölkə arasında əməkdaşlığın daha da genişlənəcəyinə əminliyini ifadə edib.

S.ABDULLAYEVA

525-ci qəzet.- 2014.- 5 noyabr.- S.7.