Azərbaycan və Makedoniya mədəni irsi Ağsuda silsilə tədbirlərlə tanıdılıb

Ağsu şəhərində MİRAS Mədəni İrsin Öyrənilməsinə Kömək İctimai Birliyinin təşəbbüsü ilə Azərbaycan və Makedoniya mədəni irsini tanıdan silsilə tədbirlər keçirilib.

MİRAS İctimai Birliyindən "525”ə verilən məlumata görə, bu təşəbbüsə Azərbaycan Respublikası Mədəniyyət və Turizm Nazirliyi, AMEA-nın Folklor İnstitutu, Ağsu Rayon İcra Hakimiyyəti, Makedoniya Respublikası Mədəniyyət Nazirliyi, bu ölkənin Sosio-mədəni Antropologiya İnstitutu və İslam Əməkdaşlıq Təşkilatının İqtisadi və Ticarət Əməkdaşlığı üzrə Daimi Komitəsi (COMCEC) və AzGranata MMC dəstək veriblər. Tədbir iştirakçıları əvvəlcə ümummilli lider Heydər Əliyevin Ağsu şəhərindəki xatirə abidəsini və Heydər Əliyev Mərkəzini ziyarət ediblər. Sonra Orta əsr Ağsu şəhəri Arxeoloji Turizm Kompleksində "Azərbaycan və Makedoniyanın mədəni irs abidələri" fotosərgisinin açılışı olub. Ağsu Rayon İcra Hakimiyyətinin başçısı Ənvər Seyidəliyev sərginin əhəmiyyətindən danışıb, Ağsuda mədəni irsə ictimai marağın artdığını qeyd edib. MİRAS İctimai Birliyinin sədri Fariz Xəlilli Azərbaycan və Makedoniya arasında mədəni əlaqələrin genişləndiyini vurğulayıb və Ohrid şəhərində "Azərbaycanın arxeoloji inciləri" sərgisinin açıldığı barədə məlumat verib.

Makedoniya Sosio-mədəni Antropologiya İnstitutunun direktoru Rubin Zemon Azərbaycan və Makedoniya hökumətlərinin əməkdaşlıq memorandumu imzaladıqlarını və bu tədbirin əməkdaşlıq üçün yaxşı nümunə olduğunu bildirib. Azərbaycan İqtisad Universitetinin professoru Abbas Seyidov, Azərbaycan Texniki Universitetinin professoru Şikar Qasımov, Mədəniyyət və Turizm Nazirliyinin sektor müdiri Arif Əliyev, "Ümumi mədəni irs şəhərləri" beynəlxalq arxeoloji turizm layihəsinin koordinatoru Məleykə Hüseynova və başqaları çıxış edərək mədəni irsin qarşılıqlı təbliğinin ölkələrimizi və xalqlarımızı bir-birini daha yaxından tanımasına imkan yaratdığını vurğulayıblar. Azərbaycanda mədəni irsin qorunması sahəsində görülən işlər, arxeoloji turizmin perspektivləri, COMCEC-in dəstəyi ilə həyata keçirilən beynəlxalq layihədə orta əsr Ağsu şəhərinin əsas marşrutlardan birini təşkil etdiyi diqqətə çatdırılıb. MİRAS İctimai Birliyi İdarə Heyətinin qərarı ilə Ağsu arxeoloji ekspedisiyasının fəaliyyətinə və elmi-mədəni tədbirlərə verdiyi dəstəyə görə icra hakimiyyətinin başçısı Ənvər Seyidəliyev MİRAS mükafatı ilə təltif edilib. Daha sonra Ağsu şəhəri Mədəniyyət Sarayında Makedoniyanın Vevçani bölgəsindən olan "Kud Drimkol" folklor qrupunun ifasında rəqslərdən və MİRAS musiqi qrupunun ifasında muğam dəstgahından ibarət proqram nümayiş olunub. AMEA Folklor İnstitutunun elmi işçisi Atəş Əhmədli Azərbaycan folkloru və folklor turizmi haqqında məruzə edib. "Kud Drimkol" folklor qrupunun hüzn, ayrılıq, qəhrəmanlıq və sevgidən bəhs edən xalq rəqsləri tamaşaçılar tərəfindən maraqla qarşılanıb. Media və turizm nümayəndələrinin infoturu isə AzGranata MMC-nin Ağsu şəhərində yeni açılmış mağazasında yerli məhsullarla tanışlıqla davam edib.

Makedoniyalı qonaqlar üçün Şəki, Qəbələ, Şamaxı, İsmayıllı və Ağsu rayonlarına mədəni irs turları təşkil olunacaq.

S.ABDULLAYEVA

525-ci qəzet.- 2014.- 12 noyabr.- S.7.