Əli bəy Hüseynzadə İdarəçilik Akademiyasında elmi-praktik konfransda anılıb

Prezident yanında Dövlət İdarəçilik Akademiyasında (DİA) Əli bəy Hüseynzadənin anadan olmasının 150 illik yubileyinə həsr edilən elmi-praktik konfrans keçirilib.

Akademiyadan "525"ə bildiriblər ki, DİA-nın rektoru, akademik Urxan Ələkbərov çıxışında Azərbaycan Prezidenti İlham Əliyevin Əli bəy Hüseynzadənin 150 illik yubileyinin keçirilməsi haqqında sərəncamını xatırladıb. O, Əli bəy Hüseynzadənin xalqımızın tarixi şəxsiyyətlərinin xatirəsinin uca tutulmasına xüsusi diqqət göstərdiyini bildirib. Rektor qeyd edib ki, türk xalqlarının mədəni inteqrasiyasının məfkurə kimi təşəkkül tapmasında mühüm rol oynayan, müasir cəmiyyət quruculuğunda demokratik prinsiplərin ənənəvi dəyərlər zəminində bərqərar olmasının vacibliyini irəli sürən və müstəqil milli dövlətçiliyin nəzəri əsaslarının işlənib hazırlanmasında yaxından iştirak edən, eləcə də çoxşaxəli fəaliyyəti boyunca yaratdığı zəngin fəlsəfi-publisistik, ədəbi-elmi irsi sayəsində Azərbaycan maarifçiliyi tarixinə qiymətli töhfələr verən görkəmli ictimai xadim Əli bəy Hüseynzadə dövlətçilik tariximizin ən şanlı səhifələrindən birini yazıb.

Elmi-praktik konfransda çıxış edən Dövlət İdarəçilik Akademiyasının müəllimləri - tarix kafedrasının dosenti, tarix üzrə fəlsəfə doktoru Rəna Bayramova Əli bəy Hüseynzadənin həyat və fəaliyyəti haqqında, fəlsəfə kafedrasının müdiri, fəlsəfə elmləri doktoru, professor Etibar Nəcəfov "Əli bəy Hüseynzadə siyasi türkçülüyün görkəmli xadimidir" mövzusunda, tarix kafedrasının müdiri, tarix üzrə fəlsəfə doktoru, dosent Firdovsiyyə Əhmədova Əli bəy Hüseynzadənin "Siyasəti-fürusət" əsəri barədə məruzələrlə çıxış ediblər.

Digər çıxış edənlər zaman keçdikcə tariximizin səhifələrinin yad edilməsinin, gələcək nəsillərə çatdırılmasının vacibliyini bildiriblər. Çıxışlarda Əli bəy Hüseynzadənin bütün ömrü boyu öz məhsuldar qələmi ilə ümumtürk mənəvi dəyərlərini tədqiq və təbliğ etdiyi bildirilib, onun dövrünün ictimai-siyasi fikrin təşkili və tənzimlənməsində, informasiya mühitinin, milli mətbuat nümunələrinin formalaşmasında əhəmiyyətli rol oynadığı diqqətə çatdırılıb. Sonda Akademiyanın birinci kurs tələbəsi Nigar Osmanova Əli bəy Hüseynzadənin şeirini söyləyib.

S.ABDULLAYEVA

525-ci qəzet.- 2014.- 12 noyabr.- S.7.