Camal Mustafayevin yeni kitabı təqdim olunub

Dünən AMEA-nın Nizami adına Ədəbiyyat İnstitunda fəlsəfi elmlər doktoru, professor Camal Mustafayevin "Borçalı" İctimai Birliyinin dəstəyi ilə nəşr olunan "Fəlsəfi-tarixi araşdırmalar" kitabının təqdimat mərasimi keçirilib. Tədbirdə "Borçalı" İctimai Birliyinin sədri Zəlimxan Məmmədli, AMEA-nın Ədəbiyyat İnstitunun elmi işçisi Bədirxan Hüseynov, akademik Telman Əliyev, şair Elbəyi Cəlaloğlu, fəlsəfə doktorları Faiq Ələkbərli, Rövşən Hacıyev, professor Sara Osmanlı iştirak ediblər.

Tədbiri AMEA-nın Ədəbiyyat İnstitunun elmi işçisi Bədirxan Hüseynov açaraq bildirib ki, Camal Mustafayev "Azərbaycan fəlsəfi-ictimai fikir tarixinin oçerkləri", "SSRİ xalqlarının fəlsəfi tarixi", "İdrakın şeiriyyəti" kitablarının müəllifidir. "Nizaminin dünyagörüşü", "Yaxın Şərqdə sosial utopiyanın səciyyəsi" adlı araşdırmaları rus dilində yazıldığından, müxtəlif xalqların diqqətini çəkmiş və yeri gəldikcə bir qaynaq kimi istifadə edilib. Camal Mustafayev folklorumuza, aşıq poeziyasına, müasir şeirimizin durumuna diqqət yetirir, bədii və fəlsəfi ümumiləşdirmələr edir, fikrini həmişə oxucularla bölüşür.

"Borçalı" İctimai Birliyinin sədri Zəlimxan Məmmədli çıxışı zamanı bildirib ki, Camal Mustafayev səhhəti ilə əlaqədar tədbirdə iştirak etmir. O, təşəkkürünü tədbir iştirakçılarına öz məktubu vasitəsilə bildirib. Məktubu şair Elbəyi Cəlaloğlu tədbir iştirakçılarının diqqətinə çatdırıb.

Zəlimxan Məmmədli bildirib ki, "Fəlsəfi-tarix araşdırmalar" kitabı C.Mustafayevin son illərdə tamamladığı araşdırmaları ehtiva edir. Bu əsərlərdən "Fəzlullah Nəiminin izi ilə", "Nəsiminin açılmamış sirləri" "Xəzər-xəbər" jurnalında nəşr edilib. Müəllif orta əsrlərin nadir türk qaynaqları əsasında Nəiminin, Nəsiminin fəaliyyəti, taleyi haqqında tarixi həqiqətləri ilk dəfə üzə çıxarıb.

Bundan başqa, Nəsiminin şeirlərində sirli nöqtələri daşıdığı mənalara müvafiq olaraq sistemli açıb. Kitabda təqdim edilən " Zərdüştlük Avropa fəlsəfəsində" araşdırması daha zəngin mövzuya həsr edilib. Yunanların Zoroastr adı ilə tanıdıqları Zərdüştün işıq, xeyir idealı yayan təlimi onların fəlsəfi inkişafında gerçəkdən tarixi rol oynayıb. Sonralar xüsusən alman fəlsəfəsinə həqiqətən faydalı təsir edib. Müəllif bütün bu tarixi xeyli müddət davamlı izləyib. Bu əsər Şərq-Qərb fəlsəfi təmaslarının başlanğıc mərhələsini öyrənmək baxımından əhəmiyyət daşıyır. Müəllif digər bir tədqiqatında " Aşıq Ələsgər irsində sufilik" mövzusunu incələyib. İlk dəfə yazılan bu araşdırma Aşıq Ələsgərin dünyagörüşü haqqında təsəvvürləri dəyişir, zənginləşdirir.

Vəfa MƏMMƏDLİ

525-ci qəzet.- 2014.- 13 noyabr.- S.2.