Moskva jurnalı Azərbaycan alimindən yazıb

Azərbaycan Milli Elmlər Akademiyasının müxbir üzvü, Əməkdar incəsənət xadimi, Əməkdar elm xadimi, sənətşünaslıq doktoru, professor Zemfira Səfərova haqlı olaraq Azərbaycanda musiqi mənbəşünaslığının banisi sayılır. Orta əsr alimləri Urməvinin, Maragainin, F.Şirvaninin risalələrini, eləcə də XIX əsrin ensiklopedist alimi Nəvvabın "Vüzühul ərqam" əsərini ilk dəfə məhz o təhlil, şərh və nəşr etdirib. Z.Səfərova Üzeyir Hacıbəylinin musiqi əsərlərinin nəşrini hazırlayıb. O, böyük bəstəkarın yaradıcılığının və estetik görüşlərinin ən görkəmli tədqiqatçısıdır. Xalqımızın musiqi və musiqişünaslıq irsini dərindən öyrənməsi nəticəsində Z.Səfərova "Azərbaycanın musiqi elmi" (XIII-XX əsrlər) adlı monumental əsər yaradıb.

Musiqişünas Raya Abbasovanın bu kitaba həsr olunmuş geniş məqaləsi "Azərbaycan Milli Elmlər Akademiyasının Xəbərlər məcmuəsi"nin 2014-cü il oktyabr sayında və Moskvanın mötəbər "Muzıkalnaya Akademiya" (N3 2014) jurnalında dərc olunub. Z.Səfərovanın araşdırmasını ətraflı təhlil edərək və yüksək dəyərləndirərək R.Abbasova müəllifin milli musiqi mədəniyyətimizin beşiyi olan Şuşa haqqında yazdıqlarını xüsusi vurğulayır:

"Şuşada doğulan və bütün ömrünü Azərbaycanın bu sənət məbədində keçirən Nəvvab Şuşanı şöhrətləndirən musiqi məclislərinin ənənəvi qanunlarına yaxşı bələd idi"; "Z.Səfərova Cabbar Qaryağdıoğlunun Şuşa dövrünü təsvir edərkən parlaq tarixi fona daha çox üstünlük verir"...

Şuşanı Azərbaycan musiqi sənətinin mərkəzi kimi səciyyələndirən bu ifadələrin mötəbər Moskva jurnalının səhifələrində yer alması xüsusi önəm daşıyır.

Yeri gəlmişkən, onu da xatırlamaq olar ki, bir neçə il bundan qabaq həmin jurnalın səhifələrində Z.Səfərovanın daha iki məqaləsi dərc edilib. Qarabağın və onun paytaxtı Şuşanın musiqi həyatına həsr olunmuş məqalədə bu məkanın bəstəkarlarımızın, ifaçılarımızın, xanəndələrimizin yetirməsində rolundan danışılırdı. Müəllifin bu jurnalda dərc edilmiş başqa bir məqaləsi isə "Kitabi-Dədə Qorqud" dastanının musiqi dünyası" adlanırdı.

525-ci qəzet.- 2014.- 18 noyabr.- S.7.