Bakıda "Unutsam, pıçılda" filminin qala-gecəsi keçirilib

Nizami Kino Mərkəzində "Unutursam fısılda" filminin qala-gecəsi təşkil olunub. Bu münasibətlə filmin rejissoru Çağan İrmak, aktyorlar Fərəh Zeynəb Abdullah, Kərəm Bursin, İşıl Yücesoy, Gözde Cığacı Bakıya gəliblər.

Filmin nümayişindən əvvəl səhnəyə çıxan yaradıcı heyət Bakının və insanlarının gözəl olduğunu söyləyərək, burada xoş enerji ilə qarşılandıqlarına, onlara göstərilən diqqətə görə təşəkkür ediblər.

Sonra film nümayiş olunub.

Türkiyənin məhşur "Taff Pictures" studiyasında, dram janrında xüsusi imzası olan mahir rejissor Çağan İrmakın lentə aldığı bu film, qurduqları xəyalların dalınca qəsəbədən İstanbula qaçan Aypəri və gənc musiqiçi Tarıkın həyat yolundan bəhs edir.

Aypərinin cavanlıq illərini bacarıqlı aktrisa Fərəh Zeynəb Abdullah, Tarık rolunu Mehmet Günsür, Ərhanı isə Kərəm Bursin oynayıb.

Filmi izlədikdən sonra qonaqlar mətbuat konfransı keçiriblər.

Çəkdiyi filmləri ilə yaddaşlarda iz qoyan rejissor Çağan İrmak deyib ki, qazandığı uğur sirri, yazdığı ssenarilərin hər zaman beynində olmasındadır. Bildirib ki, hekayələr beynimdə hər zaman var. Onların artıq hazır olduğu qərarına gələndə film çəkirəm.

Seriallardan tamaşaçılara yaxşı tanış olan Kərəm Bursin uşaqlıqdan heyranı olduğu rejissorla işləmək fürsəti qazandığını söyləyib və ondan çox şey öyrəndiyini bildirib.

S.ABDULLAYEVA

525-ci qəzet.- 2014.- 19 noyabr.- S.7.