Ukraynadakı Beynəlxalq Foruma azərbaycanlı rəssam da qatılıb

Ukrayna paytaxtındakı "Mıstetski Arsenal" milli mədəni-bədii və muzey kompleksində IX "ART-KYIV Contemporary" forumunun açılışı olub. Forumda tanınmış incəsənət xadimlərinin, kuratorların və art-birliklərin 40-dan artıq yeni layihəsi təqdim edilib. Hər il keçirilən bu forumun əsas iştirakçılarından biri məşhur ispan rəssamı, musiqiçi, bəstəkar, dirijor və boyakar Xose-Mariya Tano olacaq.

Müasir incəsənət əsərlərinə bir növ baxış olan bu sərgidə azərbaycanlı istedadlı rəssam, Ukrayna Rəssamlar İttifaqının üzvü Rasim Seydimov da iştirak edir.

Rasim və onun ukraynalı kreativ həmkarı Taisiya Melnik forum çərçivəsində təşkil edilmiş "Xoşməramlı rezidentlər. Rəngkarlıq. Fotoqrafiya. İnstallyasiya. Performans" sərgisinin kuratorlarıdır. Sərgidə GUAM iştirakçıları olan bütün dövlətləri təmsil edən rəssamların Rasim Seydimov, Taisiya Melnik, Vasili Tsaqolov, İqor Qayday və Dana Yesinenkonun və bir ay bundan əvvəl, yaradıcılığının çiçəkləndiyi dövrdə dünyasını dəyişmiş Temo Svirelin əsərləri nümayiş etdirilir.

Sənətşünasların dilində desək, "ekspressionizm" üslubunda işləyən gənc rəssam Rasim Seydimov Azərbaycanın Ukraynadakı səfirliyinin və "Ukrayna Azərbaycanlılarının Birləşmiş Diasporu (UABD)" Ümumukrayna İctimai Təşkilatının dəstəyi ilə keçirilən bu sərgiyə Xocalı soyqırımına həsr edilmiş "Uşaqlar", "Ağrı" və "Xarabalar" adlı əsərlərini təqdim edib.

Arxaik şərq motivlərini və müasir innovasiyaları öz işlərində uğurla əlaqələndirən, eksperimentlər yolu ilə irəliləyən Rasim öz sənəti ilə müharibəsiz və qan tökülməyən dünya prinsiplərini təbliğ edir. Onun əsərləri Ukrayna Müasir İncəsənət Muzeyində (Kiyev), Krivoy Roq Diyarşünaslıq Muzeyində, Vladimir-Volınsk Tarix Muzeyində, ölkəmizin Kiyevdəki səfirliyində, Azərbaycan, Ukrayna, Böyük Britaniya və ABŞ sənətsevərlərinin şəxsi kolleksiyalarında saxlanılır.

Azərbaycanın Ukraynadakı səfiri Eynulla Mədətli tədbirdə çıxış edib. Səfir "Xoşməramlı rezidentlər" sərgisinin təşkilinə görə Ukrayna tərəfinə və UABD-nin sədri Hikmət Cavadova təşəkkürünü bildirərək Rasim Seydimovun yüksək peşəkarlığını və Azərbaycan rəngkarlıq sənətinin populyarlaşdırılmasına verdiyi böyük töhfəni qeyd edib. Diplomat daha sonra bildirib ki, Rasimin sərgiyə təqdim etdiyi rəngkarlıq əsərləri erməni faşizmini, Azərbaycanın əzəli torpaqlarının Ermənistan tərəfindən işğalını öz gözləri ilə görmüş Xocalı sakinlərinin, bütün Azərbaycan xalqının qəlbindəki ağrı və qəzəb hisslərini əks etdirir.

Azərbaycanın Ukraynadakı səfiri vurğulayıb ki, bütün bu bəlalar XXI əsrdə GUAM üzvü olan bütün ölkələrin üzləşdiyi təcavüzkar separatizmin, terrorçuluğun və xarici müdaxilənin nəticələridir. Diplomat əmin olduğunu bildirib ki, Ukraynada demokratik qüvvələrin hakimiyyətə gəlişi Demokratiya və İqtisadi Tərəqqi uğrunda Təşkilatın (GUAM) inkişafına güclü təkan verəcək.

UABD-nin sədri Hikmət Cavadov da Rasim Seydimovun istedadını yüksək qiymətləndirərək bu sərginin müstəsna əhəmiyyətini vurğulayıb və sərginin Azərbaycanda da keçirilməsini dəstəkləyəcəyini vəd edib.

S.ABDULLAYEVA

525-ci qəzet.- 2014.- 21 noyabr.- S.7.