Mədəniyyət və İncəsənət Universitetində "Mənim sənətim" sərgisi açılıb

 

   Dünən Azərbaycan Dövlət Mədəniyyət və İncəsənət Universitetində "Kino rejissoru və televiziya rejissoru sənəti" kafedrası II kurs, operator ixtisası tələbələrinin "Mənim sənətim" adlı fotosərgisi keçirilib.

 

Fotosərgi kurs rəhbəri əməkdar incəsənət xadimi Amin Novruzovun rəhbərliyi ilə təşkil edilib. Açılışda prorektor Məryəm Əlizadə, Xalq artisti Zamiq Əliyev, sənətşünaslıq üzrə fəlsəfə doktoru Rafiq Sadıqov, Əməkdar incəsənət xadimi Fikrət Sultanov iştirak ediblər.

 

M.Əlizadə çıxışında bildirib ki, tələbələr seçdikləri obyektin fotosunu bədii əsər səviyyəsinə çatdırıb tamaşaçılara təqdim etməyə səy göstərirlərsə, bunun özü bir uğurdur: "Çünki hər bir sənət əsərinin mənbəyi həyatın öyrənilməsidir".

 

Amin Novruzov deyib ki, sərgidəki fotolar müxtəlif mövzuları əhatə edir:

 

"İlyarımdır ki, bu işlərin üzərində çalışırıq.  Demək olar ki, müəyyən nəticələr əldə eləmişik. Sərgidə 11 tələbənin 41 işi nümayiş olunub. Bu şəkillər yeni texnologiyalar vasitəsilə ərsəyə gəlib". A.Novruzov belə sərgilərin müntəzəm keçirilməsinin əhəmiyyətini vurğulayıb.

 

Vəfa MƏMMƏDLİ

525-ci qəzet.- 2014.- 27 noyabr.- S.7.