Sadıq Murtuzayevin "İnsan Amili, həyat və zaman" kitabının təqdimatı olub

Sentyabrın 27-də Azərbaycanın tanınmış ictimai xadimi, filologiya üzrə fəlsəfə doktoru, yazıçı-publisist Sadıq Murtuzayevin "İnsan amili, həyat və zaman" kitabının təqdimat mərasimi keçirilib. Kitabda insan münasibətləri, sevgi, dostluq, səmimiyyət, qarşılıqlı hörmət, rəhbərlik keyfiyyətləri, sadə əmək adamlarının timsalında insan amili kimi dəyərlərdən geniş şəkildə söz açılır. Kitabın redaktoru, rəyçisi və ön sözün müəllifi professor Rafiq Əliyevdir. R.Əliyev ön sözdə kitabın məzmunu barədə məlumat verir, nəşrin məziyyətlərini qeyd edir.

Təqdimat mərasiminə ölkənin nüfuzlu ziyalıları, tanınmış alimlər, şair və yazıçılar, media nümayəndələri qatılıblar.

Dəyərli pedaqoq, publisist Səlim Əzimov kitab haqqında düşüncələrini bölüşüb, bildirib ki, Sadıq Murtuzayev bütün həyatı, fəaliyyəti ilə əsl hünər və qeyrət məktəbidir:

"Sadıq Murtuzayevin bu kitabı rəflərə qoyulmaq üçün deyil, oxuyub nəticə çıxarmaq, dünyagörüşünü artırmaq üçün nəzərdə tutulub".

Yazıçı-publisist Məmməd Əfşan S. Murtuzayevin insan, rəhbər işçi kimi məziyyətlərindən bəhs edib və müəllifə ünvanladığı açıq məktubdan parçalar oxuyub:

"Hörmətli Sadıq müəllim! Sizinlə tanışlığımızın 46 illik tarixi var. Bu illərdə sizi yaxından tanımışam. Mənim gözümdə yüksək insani keyfiyyətlərə malik, yetim malını, qul haqqını yeməyən, fəqirə barış, zalıma savaş elan edən birisiniz.

Kitabınızın əlyazmasını oxuyarkən bir daha anladım ki, sizin daxili aləminizin zənginliyinə tam bələd deyiləm. Məramınız həmişə haqqa yönəlib. Siz sayılıb-seçilən ictimai xadim olmaqla yanaşı, həm də böyüklüyü sadəlikdən doğan, xalqa xidməti vətənə məhəbbətdən yaranan gözəl insansınız. Yazdığınız kitab zəngin təcrübənin, fəhmin, dərin ağlın carçısıdır. Bütün bunlar üçün çox sağ olun, əziz dost!"

Uzun müddət neft-kimya sahəsində yüksək vəzifələr tutmuş Kamil Akimov müəlliflə uzun illər davam edən dostluğundan söz açıb:

"Sadıq müəllim kimi mən də həyatın bütün ağırlığını hiss etmişəm. Tələbəlik illərimiz çətin keçib. Bu gün təqdim edilən kitab barədə deyim ki, o qədər səmimi, təmiz ürəklə yazılıb, adam necə oxuyub başa çıxdığını hiss etmir. Tarixi bilmək, həqiqətləri eşitmək çox lazımlıdır. Bu mənada "İnsan amili, həyat və zaman" kitabı əvəzsizdir. Sadıq müəllim çox zəhmətkeş insandır. Hər dəfə onunla görüşəndə bir daha anlayıram ki, insan zəhmətdən qaçmamalıdır. O heç vaxt zəhmətdən qaçmayıb, indi də bunun səmərəsini görür".

S.Murtuzayev Ağdam rayonuna rəhbərlik edərkən onun tabeliyində işləmiş Cəmilə Kazımova müəllifin rəhbərlik bacarığını xüsusi vurğulayıb:

"Sadıq müəllimin yüksək təşkilatçılığı sayəsində rayonumuz daha da böyüyüb inkişaf etdi, abadlaşdı. O, həmişə Ağdamın adını önə çəkmək üçün çalışıb. Sadıq müəllim, sizin sayənizdə Ağdam bizim yaddaşımızda yenə də yaraşıqlı, abad, gözəl bir rayon kimi qalıb. İndi hansısa abad, inkişaf etmiş bir yer görəndə ürəyim təskinlik tapır ki, bütün bu işlər Ağdamda hələ 30 il əvvəl görülmüşdü. Buna görə bütün ağdamlıların əvəzindən sizə təşəkkürümü bildirirəm".

Uzun illər vəkil işləmiş Həzi Məmmədov çıxışında deyib:

"Bu kitab tərcümeyi-hal yox, həyat salnaməsidir. Sadıq Murtuzayev təkcə həyatda üzləşdiyi çətinlikləri yox, ibrət götürüləsi məqamları da ustalıqla qələmə alıb. Bizim həyat yolumuz, ixtisasımız oxşar olmasa da, ömür yolumuz çox oxşardır. Ağdamda raykom katibi işləyərkən inşa etdirdiyiniz, keçmiş SSRİ-də birinci olan Çörək Muzeyi barədə xatirələrinizi həvəslə oxudum.

Kitabdakı, rəhbər şəxslərin əməl etməli olduğu 104 şərt diqqətimdən yayınmadı. Bu da sizin necə əhatəli və dünyagörüşlü insan olduğunuza dəlalət edir".

Şair-publisist Ramiz Məmmədzadə öncə tədbirin yüksək səviyyədə təşkilinə görə Səlim Əzimova təşəkkürünü bildirib, daha sonra S.Murtuzayev haqqında fikirlərini bölüşüb:

"Sadıq Murtuzayev mənim müəllimim, ustadım olub. Mənim bu yerə gəlməyimdə onun böyük zəhməti var. Sadıq müəllimin Abşeron, Şəki və Ağdam rayonlarında raykom katibi olduğu dövrləri çox gözəl xatırlayıram. Bütün bu illərdə o sözün əsl mənasında rəhbər işçi kimi nümunə olub.

Sadıq müəllim, kitabda birinci növbədə diqqətimi cəlb edən sizin "Qurani-Kərim"i dərindən bilməyiniz, daha sonra tarixi hadisələri dəqiq faktlarla göstərməyiniz oldu. Azərbaycan dilinə olan məhəbbətiniz, yazı dilinizin səlisliyi, üslubi manevrləriniz məni valeh elədi. Yazıçının böyüklüyü ondadır ki, rəssamın, heykəltəraşın, bəstəkarın ifadə etmək istədiyini qələmlə çatdıra bilsin. Siz bunu bacarmısınız. Yaşayın, yazın, yaradın!"

İctimai xadim, Kənd Təsərrüfatı Nazirliyinin əməkdaşı Çingiz Fərəcov sözünə bir neçə gün əvvəl vəfat etmiş yazıçı Ələviyyə Babayevanı xatırlamaqla başlayıb:

"Bu günlərdə hörmətli yazıçımız Ələviyyə Babayeva 94 yaşında vəfat etdi. Ölməzdən əvvəl mənə kiçicik məktub qoymuşdu. Məktubda yazırdı:

"Bilirəm, çoxları mənim yasımda iştirak etməyəcək, amma adlarını yazdığım on nəfər iştirak etsə, kifayətdi..."

Deyim ki, həmin on nəfərdən biri də Sadıq Murtuzayevdir. Bu, Sadıq müəllimin sözə, sənətə göstərdiyi diqqətin təcəssümüdür".

Uzun illər müəlliflə bir yerdə işləmiş Hikmət Əbdülhəmidov da tədbirdə çıxış edib:

"Sadıq müəllimi 50 ildən çoxdur tanıyıram. Kitab haqqında onunla çox söhbətlərimiz olub. Hər dəfə də demişəm ki, bu kitabı yazmaq çox ağır məsuliyyətdir. Amma həmişə də demişəm ki, belə məsuliyyətli işin öhdəsindən Sadıq Murtuzayev kimi savadlı, dünyagörüşlü insan gələ bilər. Fəxr edirəm ki, Sadıq müəllim kimi ziyalımız, ağsaqqalımız var".

Amil Quliyev S.Murtuzayevin həm öz əməlləri ilə, həm də yazdığı kitabla Ağdamın adını daha da ucalara qaldırdığını bildirib və buna görə müəllifə təşəkkür edib.

Əməkdar jurnalist Bəbir Hüseynov uzun illər Sadıq Murtuzayevlə birgə çalışdığını, Ağdamda işlədiyi müddətdə onun biliyinə, bacarığına, humanistliyinə, vətənpərvərliyinə, xalqına böyük məhəbbətinə şahid olduğunu deyib:

"Onun bu kitabını böyük bir xəzinəylə müqayisə etmək olar. Çünki kitabı iki dəfə oxumuşam, hər dəfə də özüm üçün yeni məqamlar kəşf etmişəm. Ümid edirəm ki, oxucularımızın hər biri bu kitabda dəyərli mətləblər hasil edəcəklər".

Azərbaycanın Milli Qəhrəmanı Fred Asifin qardaşı Ədalət Məhərrəmov S.Murtuzayevin Ağdam və ağdamlılar üçün gördüyü işlərdən, uğurlu rəhbərlik fəaliyyətindən bəhs edib.

Sonda söz alan S.Murtuzayev çıxışına Xalq şairi Bəxtiyar Vahabzadənin şeiri ilə başlayıb:

"Nur atəşə, atəş göyə, göylər yerə möhtac,

Yerlərdəki ahəngi-nizam göylərə möhtac...

...Dağlar ucalıqdan öyünüb qürrələnir hey,

Yüksəklik üçün dağ dediyin, düzlərə möhtac.

Göylər nə qədər sonsuz olub boşluğa varsa,

Göylərdə gözəllik yenə ulduzlara möhtac...

İnsan amilinin cövhəri elə insanların bir-birinə olan ehtiyacıdır. Bugünkü təqdimat bir daha təsdiq etdi ki, bir-birimizə ehtiyacımız çoxdur. Kitabın mahiyyətinə gəldikdə, uzun illər apardığım qeydlərin nəticəsidir. Cilalandıqca, redaktə edildikcə bu şəklə gəlib çıxdı. Çapında göstərdikləri köməyə görə dostlarım Vahid Əzizə, Məmməd Əfşana, Rafiq Əliyevə minnətdaram. Bu tədbirə görə Səlim müəllimə təşəkkür edirəm. Demək istədiklərim bu yazdıqlarımdan yüz dəfələrlə çoxdu. Sağlıq olsun, ürəyimdə qalanları yeni kitablarda üzə çıxardaram".

Cavid ŞÜKÜROV

525-ci qəzet.- 2014.- 30 sentyabr.- S.7.