Ədalət Əsgəroğlunun onsuz keçən ilk doğum gününə...

Sığınıb Tanrı eşqinə,

Hürr olan, hürr olum necə?

Könül, odun bəs eyləmir,

Bu odnan, kül olum necə?

Cana məlhəm sözü yoğur,

Ələ düşməz belə uğur.

Olumdan bir ölüm doğur,

Ölümdən bir ölüm necə?

Əsgəroğlum çox yanası...

Tikansızdı gülxanası.

Eşqin dəli-divanası,

Deməz ki, pir olum necə?

Yaşasaydı, yanvarın 7-də 56 yaşı tamam olacaqdı. Amansız ölüm bir neçə ay əvvəl yaxaladı gözəl şair, səmimi dost və qayğıkeş insan Ədalət Əsgəroğlunu. Özü cismən aramızda olmasa da, işıqlı xatirəsi qəlbimizdə, şeirləri dilimizdə, ürəyimizdədi.

Ədalət Əsgəroğlu 80-ci illərdə ədəbiyyata gələn nəslin nümayəndəsidir. O nəsil bəxti gətirməyən nəsil sayılmasına baxmayaraq, Ədalət daima şeirlə, ədəbiyyatla nəfəs alan bir qələm adamı idi. İlk kitabı “Yaz ilə gələn sevda” 1989-cu ildə işıq üzü görüb. Sonrakı illərdə “Göyçaydan başlayan ömür yolu”( 1999), “Mən sənə aşiqəm, dünya!” (1997), “Özüm qürbətdə, gözüm vətəndə” (2000), “Sabahını itirməyən adamlar” (2003), “Məmləkətim canım mənim...” (2005), “Dərdimizin qan rəngi” (poema: 4 dildə, Bakı, “Mütərcim”, 2009) kitabları çap olunub.

Ədalət Əsgəroğluna “Ruhun şad olsun!” və “56 yaşın mübarək” deyirik. Sən bizim qəlbimizdə daim yaşayacaqsan əziz dost, gözəl şair!

Dayandur SEVGİN

525-ci qəzet.- 2014.- 11 yanvar.- S.22.