Xoşbəxt həm adıdır, həm də taleyi

AMEA-nın həqiqi üzvü, ARDNŞ-nin vitse-prezidenti Xoşbəxt Yusifzadəyə

Sevinib ilk bahar mehi əsəndə,

Duyğu dənizi var Yusifzadənin!

Müdrik geoloqlar salnaməsində

İmzası, izi var Yusifzadənin!

"Üşüyüb" istidə, "yanıb" boranda,

Vüsal nəğmələri - könül tarında.

Odlar ölkəsinin tonqallarında

Alovu, közü var Yusifzadənin!

Laylar, təbəqələr sirli, soraqlı,

O isə Diogen - əli çıraqlı.

Hər an, hər dəqiqə Xəzərlə bağlı

Gecə-gündüzü var Yusifzadənin!

Qədim Pirşağıda doğulub, fəqət

Canıdır, gözüdür bütün məmləkət;

Öpər qədəmini Qaradağ, Ələt,

Mil, Muğan düzü var Yusifzadənin!

Xoşbəxt həm adıdır, həm də taleyi,

Odur ki, gül açıb arzu-diləyi.

Yoxdur təmənnası, yoxdur gileyi,

Ağsaqqal sözü var Yusifzadənin!

Ömür kitabının bəzəyi - "əla!"

Dərin yataqlardan nur ala-ala,

Neçə onilliyi salacaq yola,

Qabaqda yüzü var Yusifzadənin!

Oqtay RZA,

əməkdar müəllim

525-ci qəzet.- 2014.- 14 yanvar.- S.8.