Şanlı və qanlı tarix
AZƏRBAYCAN XALQI
HEÇ VAXT MÜSTƏQİLLİK UĞRUNDA QURBAN
VERDİYİ OĞUL-QIZLARINI, ONLARIN XATİRƏSİNİ
YAŞADANLARI UNUTMUR
“...Bu
antihumanist, konstitusiyaya və hüquqa zidd hərəkəti
ittiham edərkən Sov.İKP-nin və Azərbaycan KP
MK-nın bu cinayətin üstünü açacağına
və günahkarları üzə çıxaracağına
ümid edirdim. Artıq ilyarım vaxt keçib.
Nəinki bu dəhşətli cinayətlərin
hamıya çoxdan məlum olan günahkarları üzə
çıxarılmayıb, əksinə bunları
ört-basdır etmək üçün əllərindən
gələni edirlər. Ümid edirlər
ki, bu faciə unudulacaq. Ancaq tarix dəfələrlə
sübut etmişdir ki, doğma xalqa qarşı yönəldilmiş
qanlı cinayətləri on illər keçsə də,
unutmaq və bağışlamaq mümkün deyil”.
Heydər
Əliyev
19 iyul
1991-ci il
Düz 24
il bundan əvvəl yanvarın 19-dan 20-ə
keçən gecə Azərbaycan xalqının milli
azadlıq hərəkatında qanla yazılan şərəfli
bir tarix yaşandı. İmperiya bütün
gücünü səfərbər edib Azərbaycan
xalqının azadlıq mübarizəsini topun-tüfəngin,
tankların gücü ilə yatızdırılmağa cəhd
göstərdi. 1990-cı il
yanvarın 19-dan 20-nə keçən gecə Sovet ordusu erməni
quldur dəstələri ilə birgə Azərbaycan
xalqına qarşı terror aktı həyata keçirdi.
Yüzlərlə insan gülləyə tuş gəldi,
yüzlərlə insan ağır yaralandı, yüzlərlə
insan itkin düşdü. Daha dəqiq desək, Sovet
qoşunlarının təcavüzü nəticəsində
Bakıda 134 nəfər mülki vətəndaş öldürüldü,
600 nəfərdən çox adam
yaralandı. Sovet ordusunun əsgərləri
Bakının küçələrini qan gölünə
çevirdilər.
Buna baxmayaraq, 20 Yanvar hadisəsi Azərbaycanın
azadlığı və ərazi bütövlüyü
uğrunda mübarizə idi. Qırğın nə
qədər faciəli olsa da, Azərbaycan xalqının iradəsini,
milli azadlıq uğrunda mübarizə əzmini qıra bilmədi.
Bu tarix Azərbaycanın istiqlal yolunun ilk zirvəsi,
milli məfkurəmizin azadlıq istəyinin oyanış
günü idi. Bu, uzun illər Sovet
İmperiyasının əsarətində yaşayan xalqın
azadlıq səsini ucaltdığı, öz suverenliyi
uğrunda cəsarət nümayiş etdirdiyi şərəfli
bir tarixdir. Bu tarix həm də kimin kim
olduğunu sübut edən növbəti imtahan idi.
20 Yanvar hadisələri həm
də xalqımıza müəyyən dərslər
çıxarmaq üçün vasitə oldu. Xalqın
qarşısına qəhrəman kimi çıxan,
özünü Azadlıq aşiqi kimi qələmə verənlərin
çoxu bu imtahandan üzüağ keçə
bilmədilər. Adları hər kəsə bəlli
olan bu şəxslərin çoxu sonrakı proseslərdə
siyasətin mərkəzində olmağa
çalışdılar da, buna müyəssər
olmadılar. Xalq onların çoxunu məhz
20 Yanvar hadisələri zamanı tanıdı. Xalq gördü ki, silahsız insanları topun,
tüfəngin qarşısına çıxaranların
çoxu həmin gecə qeybə çəkildi. Onlardan heç birini meydanlarda, barrikadalarda görən
olmadı. Qəribədir ki, tarix
yazılan həmin günlər xalqa xəyanət edənlərin
bir çoxu bu gün də siyasətdədir. Onların
əksəriyyəti bu gün müxalifət düşərgəsində
cəmləşib və yenə də öz məqsədlərinə
nail olmaq üçün xalqı aldatmağa
çalışırlar. Amma yaddan
çıxarırlar ki, bu hadisələr çox da uzaq
tarixdə olmayıb. Azərbaycan insanı
baş verənlərin canlı şahidi kimi kimin-kim
olduğunu açıq-aydın görür. Azərbaycan insanı yaxşı bilir ki, həmin o
ağır dövrdə xalqın köməyinə
çatan məhz ümummilli lider Heydər Əliyev oldu.
Baş verənlərlə bağlı
informasiya blokadasını yaran, hadisələrin mahiyyətini
heç nədən qorxmadan dünyaya car çəkən
şəxsiyyət məhz Heydər Əliyev idi. Həmin
vaxt Moskvada yaşayan xalqımızın böyük oğlu
ciddi nəzarət altında olmasına baxmayaraq elə faciənin
səhərisi günü öz sözünü dedi.
Ümummilli liderimiz Moskvada xüsusi nəzarət altında
ola-ola, özünün və ailə üzvlərinin həyatını
açıq təhlükə qarşısında qoyaraq,
hadisələrdən dərhal sonra, 1990-cı il yanvarın
21-də oğlu, o çətin günlərdə ulu öndəri
bir an belə tək qoymayan möhtərəm Prezidentimiz
İlham Əliyevlə birlikdə ölkəmizin Moskvadakı
daimi nümayəndəliyinə gəldi, təcavüzə kəskin
etirazını bildirdi, faciəni törədənləri,
şəxsən Mixail Qorbaçovu kəskin ittiham etdi. SSRİ-nin hələ hökm sürdüyü bir
vaxtda onu və başçısını paytaxtın
özündə tənqid etmək, sözün əsl mənasında,
böyük hünər və cəsarət istəyirdi.
Xalqımızın ümummilli lideri Heydər Əliyevin
1990-cı il 21 yanvar tarixli bəyanatı həm
də faciəyə verilən ilk siyasi qiymət idi.
Təbii ki, bütün bunlar ağır bir faciə ilə
üz-üzə qalan Azərbaycan üçün
böyük təsəlli idi. İnsanlar
gördülər ki, tək deyillər, xalqın böyük
oğlu dar gündə də onlarladır. Bu
çıxış, verilən bəyanatlar Azərbaycan
xalqını ruh düşkünlüyünə
düçar olmaqdan qorudu, azadlıq mübarizəsinə
yeni ruh verdi. Ümummilli
liderin bu addımı, bu cəsarəti həmin vaxt özlərini
siyasətçi kimi xalqa sırıyanlara da bir mesaj oldu.
Heydər Əliyev sonrakı dövrlərdə
də 20 Yanvar hadisələri ilə bağlı mövqeyini
dəyişmədi. İmkan düşən
kimi, bu hadisələri pislədi, onu törədənlərin
cəzalandırılması təşəbbüsü ilə
çıxış etdi.
Məsələn,
Azərbaycan Ali Sovetinin deputatı seçiləndən sonra
da baş verənlərin heç vaxt unudulmayacağı
mesajını verdi. 7 mart 1991-ci il tarixdə Azərbaycan Respublikası Ali
Sovetinin sessiyasındakı çıxışında
baş verənləri “İttifaq dövləti tərəfindən
Azərbaycan xalqına qarşı hərbi təcavüz” kimi
xarakterizə etdi. Bu bəyanat o vaxt verilirdi ki,
SSRİ hələ mövcudluğunu qoruyub saxlayırdı.
İttifaqın hədə-qorxu
maşını hələ fəaliyyətdə idi.
Bununla kifayətlənməyən Heydər Əliyev
sonrakı dövrdə məhz 20 Yanvar hadisələrinə
görə partiya Sovet İttifaqı Kommunist
Partiyasının sıralarından
çıxdığını bəyan etdi. Partiyanı çıxmaqla
bəyanatında ümummilli lider 20 Yanvar hadisələrinə
xüsusi vurğu ilə toxunurdu: “Bu antihumanist, konstitusiyaya və
hüquqa zidd hərəkəti ittiham edərkən
Sov.İKP-nin və Azərbaycan KP MK-nın bu cinayətin
üstünü açacağına və günahkarları
üzə çıxaracağına ümid edirdim. Artıq ilyarım vaxt keçib. Nəinki bu dəhşətli cinayətlərin
hamıya çoxdan məlum olan günahkarları üzə
çıxarılmayıb, əksinə, bunları
ört-basdır etmək üçün əllərindən
gələni edirlər. Ümid edirlər
ki, bu faciə unudulacaq. Ancaq tarix dəfələrlə
sübut etmişdir ki, doğma xalqa qarşı yönəldilmiş
qanlı cinayətləri on illər keçsə də,
unutmaq və bağışlamaq mümkün deyil”.
Xalqın təkidli tələbləri ilə hakimiyyətə
gələndən sonra da Heydər Əliyev 20 Yanvar hadisələrinə
hüquqi-siyasi qiymətin verilməsini diqqət mərkəzində
saxladı. Bu hadisələrə lazımi siyasi-hüquqi qiymətin
verilməməsi Heydər Əliyevi çox
düşündürür və narahat edirdi. O bilirdi
ki, tarix qarşısında bunun edilməsi çox vacibdir. O
bilirdi ki, 1990-cı ilin yanvarından sonra hakimiyyətdə
olan qüvvələrin bu məsələdə öz üzərlərinə
düşən vəzifəni yerinə yetirə bilməyiblər.
Çünki həmin qüvvələrin hər
birinin bu hadisələrdə bu və ya digər şəkildə
günahı, məsuliyyəti var idi. 20 Yanvar hadisələrindən
sonra hakimiyyətə gətirilən Ayaz Mütəllibov
birbaşa Moskvaya bağlı adam idi. Onun Moskvanın törətdiyi cinayətə
hüquqi-siyasi qiymət vermək cəsarəti yox idi. O
yaxşı bilirdi ki, hadisənin günahkarları arasında
öz adı da olmalıdır. 1990-cı il
yanvar ayının 22-də çağırılan Azərbaycan
Ali Sovetinin fövqəladə sessiyası öz işini
yarımçıq qoymuş və sonrakı sessiyalarda bu məsələnin
müzakirəsini davam etdirməmişdi. Ali
Sovetin yanvar hadisələrini tədqiq etməli olan
komissiyasının işi başa
çatdırılmamış qalmışdı.
Ondan sonra hakimiyyətə gələn AXC-Müsavat
cütlüyünün də 20 Yanvar hadisələrinə
siyasi-hüquqi qiymət verməsi mümkün deyildi. Çünki
onların bir çoxu bu hadisələrin baş verməsində
məsuliyyət daşıdıqlarının fərqində
idilər. Məhz bu baxımdan bu qanlı
tarixə hüquqi-siyasi qiymət vermək missiyası
ümummilli lider Heydər Əliyevin üzərinə
düşdü. O, ikinci dəfə hakimiyyətə gələndən
sonra əsas işlərdən biri kimi məhz buna diqqət
yetirdi. 1994-cü il yanvarın 12-də
keçirdiyi müşavirədə Prezident Heydər
Əliyev bu barədə deyirdi: “...Xalqa təcavüz
olunmuş, günahkarlar isə hələ müəyyənləşdirilməmişdir.
Görünür ki, ötən yaxın illərdəki
Sovetlər Birliyi, respublika rəhbərliyi, məsul şəxslər
öz mənafeləri naminə bu böyük faciənin əsl
mahiyyətini xalqa bəyan etməmişlər”. Bu
sözlərin davamı kimi, Heydər Əliyev 5 yanvar
1994-cü ildə “20 Yanvar faciəsinin
4-cü ildönümünün keçirilməsi
haqqında” fərman imzalayaraq Milli Məclisə 20 Yanvar hadisələrinə
tam siyasi-hüquqi qiymətin verilməsi, bu məqsədlə
parlamentin xüsusi sessiyasının
keçirilməsi məsələsinə
baxılmasını tövsiyə etdi. Məhz bu tövsiyədən
sonra Milli Məclis 1994-cü il martın
29-da 20 Yanvar hadisələrinə dövlət səviyyəsində
tam siyasi-hüquqi qiymət verdi. Qərarda 1990-cı ilin 20
Yanvar hadisələri Azərbaycanda vüsət almış
milli-azadlıq hərəkatını boğmaq, suveren bir
dövlət amalı ilə ayağa qalxan xalqın inam və
iradəsini qırmaq, belə bir yola qədəm qoyan xalqa
sovet hərb maşınının gücünü
nümayiş etdirmək məqsədilə totalitar kommunist
rejimi tərəfindən hərbi təcavüz və cinayət
kimi qiymətləndirildi.
Sənəddə Sovet İttifaqı Kommunist Partiyasının, sovet dövləti və hökumətinin, şəxsən Mixail Qorbaçovun Azərbaycana qarşı ağır cinayət törətdikləri, Əbdürrəhman Vəzirovun, Ayaz Mütəllibovun, Viktor Polyaniçkonun, Vaqif Hüseynovun xalqımıza xəyanət etdikləri siyasi-hüquqi müstəvidə öz əksini tapdı. Azərbaycan SSR Ali Soveti Rəyasət Neyətinin sədri Elmira Qafarovanın, Bakı Şəhər Partiya Komitəsinin birinci katibi Müslüm Məmmədovun bu qanlı faciənin törədilməsində məsuliyyət daşıdıqları və digər məsələlər də sənəddə qeyd olundu.
Amma ümummilli liderin 20 Yanvar hadisələri ilə bağlı fəaliyyəti bununla da kifayətlənmədi. Heydər Əliyev fəaliyyəti dövründə həmişə 20 Yanvar şəhidlərini, onların ailə üzvlərini daim diqqət mərkəzində saxlayır, onları heç vaxt diqqətdən kənarda qoymurdu. 20 Yanvar faciəsinin bütün ildönümlərində şəxsən Şəhidlər Xiyabanını ziyarət edən Prezident, şəhid ailələrinə müraciətlə bütün Azərbaycan xalqı adından onlara başsağlığı verir, problemləri ilə yaxından maraqlanırdı. Bu gün ulu öndərimizin layiqli davamçısı, Prezident İlham Əliyev də bu siyasəti uğurla davam etdirir, şəhid ailələrinə daim dövlət qayğısı göstərilir.
İllər keçir, amma tarix heç vaxt yaddan çıxmır. Azərbaycan xalqı heç vaxt müstəqillik uğrunda qurban verdiyi oğul-qızlarını, onların xatirəsini yaşadanları, bu hadisələrin tarixi qiymətini verənləri unutmur.
Hacı İBRAHİMOV
“DH-Hüquq Consulting” Şirkətinin
vitse-prezidenti,
hüquq elmləri namizədi
525-ci qəzet.- 2014.-
18 yanvar.- S.8.