Kitabla yaşanan ömür

Baba Absəməd oğlu Səmədov respublikamızın füsunkar təbiətə malik dilbər guşələrindən sayılan Masallı rayonunun Səmidxan kəndində zəhmətkeş bir ailədə dünyaya göz açıb, boya-başa çatıb. O, Masallı şəhər 3 saylı orta məktəbini bitirdikdən sonra Gəncə Dövlət Universitetinin (keçmiş H.Zərdabi adına KDPİ-nin) Tarix fakultəsinə daxil olub. 1977-ci ildə ali təhsilini müvəffəqiyyətlə başa vuraraq tarix müəllimi ixtisasına yiyələnən gənc pedaqoq öz doğma kəndlərində işləmək qərarına gəlib. Həmin vaxtdan 1982-ci ilədək Səmidxan kənd orta məktəbində ixtisası üzrə müəllim kimi fəaliyyət göstərib. Həyat elə gətirib ki, Baba müəllim Bakı şəhərinə köçməli olub. İstedadlı pedaqoq 1982-1989-cu illərdə Bakının Sabunçu rayonundakı 77, 1989- 2005-ci illərdə isə Qaraçuxur qəsəbəsindəki 104 saylı orta məktəblərində çalışıb, gənc nəslin təlim-tərbiyəsi ilə məşğul olub.

Baba Səmədov harada işləməsindən asılı olmayaraq, həmişə məsuliyyətlə, tələbkarlıqla çalışıb, təcrübəsini bilik və bacarığını başqalarından əsirgəməyib. Bu səbəbdən də bacarıqlı pedaqoq işlədiyi kollektivlərdə müəllim və şagirdlərin, eləcə də yerli sakinlərin dərin hörmət və nüfuzunu qazanıb, sayılıb-seçilib. Ömrünü gənc nəslin təlim-tərbiyəsinə, övladlarının qayğısına həsr edən fədakar ziyalı, təəssüf ki, xəstəliyi ilə əlaqədar vaxtından qabaq təqaüdə çıxmaq məcburiyyəti ilə üzləşib, öz sevimli peşəsindən ayrılmalı olub. Lakin bütün çətinliklərə, məhrumiyyətlərə baxmayaraq, Baba müəllim özündə iradə və güc taparaq daim yaşamağa, çalışmağa, xeyirxah əməllərlə məşğul olmağa can atıb. Bu iradə və inamla da o, ömrünü uşaqlıq yaşlarından çox sevdiyi kitablarla bağlayıb. Özünün dediyi kimi, ondakı bu həvəsi, məhəbbəti atası Absəməd kişi yaradıb. Dünya və Azərbaycan ədəbiyyatı nümunələrindən ibarət bədii kitabları oxumaqdan zövq alan bu el ağsaqqalı evə daim müxtəlif kitablar alıb gətirib. Baba da böyük maraq hissi, şövq ilə həmin kitabları oxuyub, mütaliyə edib. Bu da onun dünya görüşünün inkişafında, mənəvi cəhətdən zənginləşməsində mühüm rol oynayıb, həyat istiqamətini müəyyənləşdirib. Ona görə də o, həyatda, təhsildə qazandığı uğurlara görə kitablara borclu olduğunu deyir. Təsadüfi deyildir ki, Baba Səmədov 1961-ci ildən başlayaraq, bədii və tarixi kitabları mütaliyə etməklə bərabər, onları toplayıb zəngin, gözəl bir şəxsi kitabxana yaratmağa da müvəffəq olub. Onun zəngin kitab kolleksiyaları sırasında dünya və Azərbaycan ədəbiyyatının şedevrləri ilə yanaşı, nadir kitab nümunələri də yer alıb. Baba müəllim kamillik, mənəvi təmizlik mənbəyi hesab etdiyi kitabları başqalarına da sevdirməyi bacaran insandır. Gənclərin tərbiyəsində, pis vərdiş və əməllərdən çəkindirilməsində onların mühüm əhəmiyyət kəsb etdiyini vurğulayan pedaqoq hər yerdə kitabla əlaqədar geniş təbliğat işi aparır.

Kitab təbliğatı onun, bir növ, həyat devizinə, fəaliyyət məramına çevrilib. Təcrübəli pedaqoq çalışır ki, hər bir kəs bədii və tarixi kitabları oxusun, onlardan yetərincə bəhrələnə bilsin. Odur ki, Baba müəllim ona müraciət edənlərdən heç vaxt kitablarını əsirgəmir. Şəxsi kitabxananın imkanlarından gənclər daha çox yararlanırlar. Kitabların oxucularının sayı gündən-günə artır. Onların hər biri Baba müəllimin xidmətini, göstərdiyi köməklikləri yüksək qiymətləndirir, daimi razılıqlarını və minnətdarlıqlarını bildirirlər. Bakı şəhər sakinləri İsmayıl Cəfərov, Vaqif Kazımov və Oruc Orucov da bu kitabxananın daim oxucularındandır. Onların qənaətinə görə, Baba müəllim öz fəaliyyəti ilə bu gün, sözün həqiqi mənasında, alqışalayiq şərəfli və səmərəli vətəndaşlıq missiyası həyata keçirir. Baba Səmədov təbiəti sevən, onun gözəlliyini dəyərləndirməyi bacaran bir insan kimi də tanınır. Onun yaratdığı bağçada yetişdirilən müxtəlif növlərdən olan gül-çiçəklər görənlərdə fərəh və rahatlıq hisslər oyadır, hər kəsi təbiətə sonsuz məhəbbət və həvəs bəsləməyə sövq edir.

Gözəl ailə başçısı olan B.Səmədov həyat yoldaşı Səkinə xanımla 4 uşaq böyüdüb boya-başa çatdırıb, ev-eşik sahibi edib. Onların böyk oğlu Elşən BDU-nu bitirib, tarix müəllimi kimi atasının yolunu davam etdirir. Kiçik oğul Tərlan Neft Akademiyasında təhsil alıb, öz ixtisası üzrə çalışır. Ailənin qız övladları Günel və Gültəkin isə tibb bacısıdırlar. Övladların hər biri ləyaqətlə yaşayıb, çalışır, atalarının adını uca tutur, onun etimadını layiqincə doğruldurlar. Kitab aşiqi, təbiət vurğunu Baba müəllim övladlarını, nəvələrini də bu ruhda tərbiyə edib. Onların hamısı kitab oxumağa böyük həvəs göstərir, təbiəti sevirlər. 60 yaşını başa vurmuş Baba Səmədov ömrünün müdriklik çağlarını yaşayır, böyük inam və əzmlə öz xeyirxah əməllərini bu gün də uğurla davam etdirir. Onun mənalı həyat yolu gənclərimiz üçün əsl örnək hesab oluna bilər.

Sabir Rüstəmoğlu,

pedaqogika üzrə

fəlsəfə doktoru, dosent

525-ci qəzet.- 2014.- 24 yanvar.- S.8.