Füzulişünas alimin "Sufizm" kitabı çap olunub

Füzulişünas alim, filologiya üzrə elmlər doktoru, professor Gülşən Əliyeva-Kəngərlinin "Sufizm" (Azpoliqraf, Bakı 2014. 160 səh.) adlı kitabı çapdan çıxıb. Azərbaycan və ingilis dillərində "Aspoliqraf LTD" nəşriyyatında çap olunan kitabda sufizmin (təsəvvüf) zaman-zaman bütün bəşəriyyəti düşündürən aktual problemlərdən biri kimi, mənşəyində islam amili dayanan bu fəlsəfi təlimə əsasən məxluqun Xaliqə qovuşmaq arzusunun mistik məhəbbət yolu ilə reallaşdırılmasından söhbət açılır.

G.Əliyeva-Kəngərli sufizm kimi bəşəri, çətin mistik fəlsəfi problemə birdən-birə gəlib çıxmayıb. O, hələ, "Çağdaş poeziya və klassik irs", "Füzuli sehri", "Azərbaycan füzulişünaslığı", "Poetika məsələləri", "Bədii düşüncə: tarixli gerçəklik və estetik edial" kimi sanballı monoqrafiya və kitablarında bu problemin ayrı-ayrı aspektlərini nəzərdən keçirib. Xüsusilə "Bədii düşüncə: tarixli gerçəklik və estetik edial" adlı fundamental kitabına daxil olan "Füzulidə hüsn", "Füzuliyə eşq", "Füzulidə qəm", "Niyə şair sözü əlbəttə yalandır?!", Niyə "Füzuli rindu şeydadır?!", "Türk təsəvvüf fəlsəfəsi" və s. kimi orijinal yazılar sufizmə yaxınlaşmağın uğurlu cəhdləri idi.

"Sufizm" monoqrafiyasında bu çoxtəriqətli bədii-fəlsəfi sistemin təkamülündə mərhələ yaratmış Əl Qəzzali, İbn Ərəbi, Şeyx Mahmud Şəbüstəri kimi nəzəriyyəçilərin - Əhməd Yəsəvi, Mövlanə Cəlaləddin Rumi, Yunis Əmrə, Marağalı Əvhədi, İmaməddin Nəsimi, Şah İsmayıl Xətai, Mövlanə Məhəmməd Füzulinin irsi analitik təhlilin predmetinə çevrilir.

Müəllif illərlə apardığı elmi araşdırmaların nəticəsi olan bu tədqiqat əsərində ona bədii-fəlsəfi cərəyan kimi baxır, sufizmin təşəkkülündə və yayılmasında bədii ədəbiyyatın rolunu aşkara çıxarmağa çalışır, bu cərəyanın mənşəyi və mahiyyətini, türk sufizmini, Azərbaycan ədəbiyyatında sufizm problemlərini geniş təhlil edir.

Olduqca çətin problemi sadə və anlaşıqlı dildə araşdıran bu kitab həm mütəxəssislər, həm də geniş oxucu kütləsi üçün nəzərdə tutulub.

Kitabın redaktoru akademik İsa Həbibbəyli, rəyçiləri isə AMEA-nın müxbir üzvü Əliyar Səfərli və filologiya üzrə elmlər doktoru, professor Möhsün Nağısoydur.

Firəngiz AĞALAR

525-ci qəzet.- 2014.- 29 yanvar.- S.7.