Akademik Məmməd Arif yad edilib

Nazim Hikmət adına uşaq kitabxanasında görkəmli tənqidçi, ədəbiyyatşünas akademik Məmməd Arif Dadaşzadəyə həsr olunmuş "Azərbaycan ədəbiyyatında Məmməd Arif yaradıcılığının rolu" mövzusunda İnformasiya saatı keçirilib.

Kitabxananın müdiri Çərkəz Əliyeva Məmməd Arifin Azərbaycan ədəbi tənqidindəki əvəzsiz mövqeyindən söhbət açıb. Onun müqtədir bir alim kimi poeziya, nəsr, xüsusilə də dramaturgiya sahəsində apardığı tədqiqatlar haqqında məlumat verib.

Tədbirdə Bayıldakı 49 nömrəli intellekt liseyinin və 203 nömrəli orta məktəbin şagirdləri görkəmli alimin yaradıcılığından nümunələr səsləndiriblər.

Bildirilib ki, görkəmli alim ədəbiyyatımızın beşiyi başında dayanaraq, C.Cabbarlı, S.Vurğunla yanaşı, M.F.Axundzadə, Ə.Haqverdiyev, M.İbrahimov, M.Hüseyn, S.Rüstəm, Ə.Məmmədxanlı, S.Rəhman, İ.Əfəndiyev və digər ədiblərin dram yaradıcılığını hərtərəfli təhlil və təqdir edib. Alimin "Cəfər Cabbarlı" monoqrafiyası, "Tənqid və ədəbiyyatşünaslıq", "Dramaturgiyamıza bir nəzər", "Dramaturgiyada dil və dialoq", "Azərbaycanda xalq teatrı" məqalələri bu gün də ədəbi ictimaiyyətimiz üçün bir manifest səciyyəsi daşıyır.

Kitabxanada alimin əsərlərindən ibarət xüsusi sərgi nümayiş olunub.

525-ci qəzet.- 2015.- 8 aprel.- S.7.