Budapeştdəki Kitab Festivalında
Azərbaycan da təmsil olunub
Nazirliyinin təşkilatçılığı və Macarıstandakı səfirliyimizin dəstəyi
ilə Budapeşt şəhərində keçirilən
XXII Beynəlxalq Kitab Festivalında ölkəmizdə
nəşr olunan çap məhsullarından
ibarət milli stend nümayiş etdirilib.
Kitab festivalında
ölkəmizi Mədəniyyət
və Turizm Nazirliyinin, Nazirlər Kabineti yanında Tərcümə Mərkəzinin
(ATM) əməkdaşlarından ibarət nümayəndə
heyəti təmsil edib.
Festivalda
Azərbaycan mədəniyyətinə,
tarixinə, Dağlıq
Qarabağ həqiqətlərinə,
turizm potensialına və birinci Avropa Oyunlarına dair 200 adda nəfis
tərtibatda, yüksək
məzmuna malik ingilis, rus, ərəb
dillərində nəşr
məhsulları və
səfirliyin dəstəyi
ilə macar dilində çap olunmuş kitablar sərgilənib.
Ziyarətçilərə ölkəmiz və birinci Avropa Oyunları haqqında müfəssəl məlumatlar
verilib.
Festival çərçivəsində Macarıstandakı səfirliyimizin
təşkilatçılığı ilə Eötvös Lorand adına
Macarıstan Dövlət
Elmi Universitetinin “Humanitar elmlər” fakültəsinin türkologiya
bölməsinin tələbələri
ilə Azərbaycan nümayəndə heyətinin
görüşü keçirilib.
Görüşdə fakültənin
dekanı, professor
Rudolf Sardi Azərbaycan
nümayəndə heyətini
salamlayaraq mədəni
əlaqələrin və
tərcümə sahəsinin
əhəmiyyətindən söz açaraq deyib:
“Bakı - Qafqaz regionunun mədəni qovşağıdır. Biz istərdik ki, Azərbaycan və Macarıstan respublikaları
arasında mədəni
və ədəbi əlaqələr möhkəmlənsin”.
Daha sonra Azərbaycanın Macarıstandakı səfiri
Vilayət Quliyev hər iki ölkə
arasındakı mədəni
və ədəbi əlaqələrdən danışıb:
“Bu zalda Azərbaycan
ədəbiyyatı ilə
maraqlanan tələbələr
toplaşıb. Səfirliyimiz tərəfindən Azərbaycan ədəbiyyatına
aid 50-dən çox kitab
macar dilində nəşr olunub. Bu kitabların əksəriyyəti
Azərbaycan mədəniyyəti,
incəsənəti, ədəbiyyatı,
folkloru, elmi ilə bağlıdır.
Çap
olunmuş həmin nəşrlərdən “Azərbaycan
nağılları”nın,
klassiklərimizin əsərlərinin
adlarını çəkmək
olar.
Səfirlik 2012-ci ildə “Biz Azərbaycan haqqında nə bilirik?” mövzusunda müsabiqə elan etmişdi. Həmin müsabiqəyə mətn göndərən tələbələrin esseləri kitab halında çap olundu və qalib olan 6 müəllif birhəftəlik Azərbaycana göndərildi. Biz belə tədbirlərin keçirilməsini davam etdirəcəyik”.
Macarıstanın müstəqilliyimizi tanıyan ilk dövlətlərdən biri olduğunu deyən Mədəniyyət və Turizm Nazirliyinin sektor müdiri Lətifə Məmmədova əlaqələrimizin tarixi köklərinin qədim dövrlərə gedib çıxdığını söyləyib:
“Ölkələrimiz arasında əlaqələr daha çox mədəniyyət, ədəbiyyat və təhsil sahəsində inkişaf edib. Hazırda bir çox azərbaycanlı tələbələr Budapeştin təhsil ocaqlarında oxumağa böyük maraq göstərir. Azərbaycanda Macarıstan mədəniyyəti günləri keçirilib.
Tədbir iştirakçıları Macarıstanın turizm potensialı, iqtisadiyyatı və mədəniyyəti ilə yaxından tanış olublar.
Macar musiqisi və rəqsləri Bakıda böyük maraqla qarşılanıb. Bu ilin iyun ayında Azərbaycanda birinci Avropa Oyunları keçiriləcək və biz sizləri həmin Oyunlarda iştirak etməyə dəvət edirik”.
Daha sonra ATM-nin mütəxəssisi Cavidan Ağayev Azərbaycan Respublikası Nazirlər Kabineti yanında Tərcümə Mərkəzinin fəaliyyəti barədə məruzə ilə çıxış edib.
S.ABDULLAYEVA
525-ci qəzet.- 2015.- 25 aprel.- S.17