Əməlisaleh insan, böyük ürək sahibi

Bismillahir-rəhmanir-rəhim!

Allah tərəfindən insana bəxş edilən hər bir ömrün öz mənası, öz qayəsi olur. Bir imtahan, sınaq olan insan ömrünün ən böyük mənası, amalı həyatda öz layiqli yerini tutmaqdır. Həyat adlanan zaman kəsiyində hər bir bəşər övladı öz istedadı, bacarıq və zəhməti sayəsində həyatda müəyyən məqama, layiq olduğu yüksəkliklərə ucala bilir, ad qazanır.

Xalqın ehtiramını, el məhəbbətini qazanmaq da hər kəsə qismət olmur. Xalqın sevgisi, elin hörməti, ehtiramı olduqca önəmli, qiymətlidir və yalnız gözəl insani keyfiyyətlərə, yüksək dəyərlərə malik seçilmiş şəxslər belə bir xoşbəxtliyə nail olurlar. Ömür payına məhz belə bir səadət düşmüş xoşbəxt insanlardan biri də mərhum Ağəddin Mansurzadə idi.

Mən Hacı Ağəddin kimi dəyərli insanla yaxından tanış olmaq fürsətinə və onunla uzun illər boyu sıx ünsiyyət imkanına malik olmuşam. Zəka və mənəviyyatı bir-birini yüksək səviyyədə tamamlayan, məslək və məramına xidmətdən zövq alan Hacı Ağəddinlə ünsiyyət insana xoş əhval bəxş edirdi. Bu illər ərzində mən onun nə qədər böyük ürək, incə və həssas qəlbə malik olduğunun dəfələrlə şahidi olmuşam. Hacı Ağəddinin nümayiş etdirdiyi əsl vətəndaşlıq mövqeyi, mənəvi köməyə ehtiyac duyanlara münasibətdə göstərdiyi həssaslıq isə heç zaman xatirimdən silinməz. Vətəni, həmvətəni, soydaşı ilə bağlı məsələlərdə Hacı Ağəddin heç zaman özünü kənara çəkməz, şəxsi mənafeyi qayğısına qalmazdı. Dostluğu, yoldaşlığı bacaran, onun qədrini bilən insan idi Hacı Ağəddin. Ədalətin, haqqın müdafiəsində duran, ədalətsizliyə, haqsızlığa göz yummayan insan idi Hacı Ağəddin. Əlindən gələni, bacardığını əsirgəməyən, insan idi Hacı Ağəddin. Əməlisaleh, Allaha xoş gedən əməllər sahibi idi Hacı Ağəddin!

Rəhmətlik Hacı Ağəddinin simasında yüksək vətəndaşlıq mövqeyinə malik ictimai xadim, millətini, xalqını hədsiz sevən vətənpərvər, çalışdığı sahənin mahir mütəxəssisi, möhkəm iradə sahibi, öz sözünün arxasında durmağı, mövqeyini qorumağı bacaran cəsarətli və qətiyyətli insana məxsus cizgilər aydın sezilirdi. Naşir olaraq ərsəyə gətirdiyi çoxsaylı kitablar, saysız-hesabsız məqalə, hekayə və oçerklər Hacı Ağəddinin zəngin iç dünyasını sərgiləyərək, onun nə qədər böyük ürək sahibi olduğunu, mənəvi dərinliyini bu gün də oxucusuna bariz şəkildə nümayiş etdirir.

Hacı Ağəddin olduqca məhsuldar yazar olmuşdur. Onun çox böyük həvəs və qüvvə ilə ərsəyə gətirdiyi bir-birindən maraqlı, dolğun və dəyərli kitablar bu gün bir çox ziyalılarımızın masaüstü mütaliə mənbəyidir. Onun tanınmış insanların, dəyərli ziyalılarımızın həyat və fəaliyyətini böyük peşəkarlıqla əks etdirən əsərləri özünəməxsus stili və şirin dili ilə oxucunun rəğbətini qazanmışdır. Qafqaz Müsəlmanları İdarəsi ilə yaxın əməkdaşlıq edən Ağəddin Mansurzadə qurumumuzun fəaliyyətini geniş işıqlandıran, onun sədrinin - Şeyxülislamın həyat və fəaliyyətindən bəhs edən çox sayda maraqlı nəşrlərin müəllifi kimi Azərbaycan jurnalistikasında iz qoymuşdur.

Peşəkar jurnalist olan Ağəddin Mansurzadə “Bakı” qəzetində çalışdığı illərdən başlayaraq öz oxucusu tapmış dəyərli qələm sahiblərindən olmuşdu. O, əlindəki qələmin müqəddəsliyinə böyük ehtiramla yanaşan bir ziyalı insan idi. Qafqaz Müsəlmanları İdarəsinin nəzdində yaranmış Elmi-Dini Şuranın ən fəal üzvlərindən biri kimi Ağəddin Mansurzadə dini-mənəvi dəyərlərin elmi şəkildə təbliğ və təşviqi üçün əlindən gələni əsirgəməmişdi.

Müdriklər deyiblər ki, insan nə qədər ziyalıdırsa, Vətənə bir o qədər xeyri dəyər. Böyük daxili enerjiyə, yaradıcılıq əzminə və fəhmə malik Hacı Ağəddinin ürəyi daima dostlarının, yaxın və tanışlarının problem və qayğıları, istək və arzuları ilə döyünürdü. Əminəm ki, yaradıcı gənclərə özəl diqqət və atalıq qayğısı ilə yanaşan Hacı Ağəddin gəncliyin hamisi kimi yaddaqalan işləri ilə daim rəğbətlə xatırlanacaqdır.

Ağəddin Mansurzadə həlim xasiyyətli, humanist təbiətli bir insan olduğu kimi, eyni zamanda, nümunəvi ailə başçısı, gözəl ata olmuşdur. Onun layiqli övladları ata evinin ocağını daha gur yandıraraq, Hacının ruhunu şad edirlər.

Hacı Ağəddin Allah qarşısında borcunu yerinə yetirərək dinimizin vacibatı olan Həcc səfərində olmuş, müqəddəs Məkkeyi-Mükərrəməni və Mədineyi-Münəvvərəni ziyarət etmişdi. Allah sevgisini uca tutan, imanı kamil bir şəxs kimi Hacı Ağəddin bu ziyarət məqamının ucalığını çox gözəl anlayırdı. Hacı Ağəddin, Yaradanımızın ona bəxş etdiyi fəzilət nuru sayəsində xalq arasında yüksək nüfuz qazanmağa nail olmuşdu. Bu nemət Allah-Təalanın kəramət payı idi və Hacı Ağəddin bu neməti uzun illər boyu şərəflə daşıdı. Həqiqətən, “Allah ...istədiyini doğru yola salır!” (Yunus, 25) və həyatda doğru yolu tapanların nəsibi əbədi fəxarət olur.

Hacı Ağəddinin mənalı ömür yolu, müdrik insan, gözəl dost, maraqlı həmsöhbət olmağı onu xalqımıza, yaxınlarına, dostlarına sevdirmişdi və bu gün də insanların xoş xatirələrində yaşadır. Qoy Yaradan Hacı Ağəddinin ruhuna rəhmət eləsin, qəbri nurla dolsun! Amin!

Şeyxülislam Hacı Allahşükür PAŞAZADƏ

Qafqaz Müsəlmanları İdarəsinin sədri

525-ci qəzet.- 2015.- 29 avqust.- S.23.