Qədir Rüstəmovun 80 illik yubileyi qeyd edilib

Dekabrın 15-də Mədəniyyət və Turizm Nazirliyinin təşkilatçılığı ilə Beynəlxalq Muğam Mərkəzində ölməz xanəndə Qədir Rüstəmovun 80 illiyinə həsr olunmuş yubiley konserti keçirilib.

Konserti Qədir Rüstəmovun ailə üzvləri, dostları, sənət yoldaşları, Xan Şuşinskinin ailə üzvləri, Xalq artistləri Canəli Əkbərov, Mənsum İbrahimov, millət vəkili, yazıçı Aqil Abbas da dinləyiblər.

Proqram Qədir Rüstəmovun misilsiz ifasında "Sona bülbüllər" mahnısı ilə başlayıb.

Tədbirin aparıcısı olan yazıçı-publisist Mustafa Çəmənli Qədir Rüstəmovun həyat yolundan və Azərbaycan ifaçılıq sənətinin inkişafına verdiyi dəyərli töhfələrdən söz açıb:

"Qədir Rüstəmovun ailəsində gözəl səsi olanlar çox olub. Ancaq Qədir Rüstəmov təkrarsız ifası ilə xüsusi seçilib və özünəməxsus bir səviyyə müəyyənləşdirib. O, xarakteri etibarilə heç kimə boyun əyməyən, söz götürməyən adam idi. Onun bənzərsiz ifasını Xan Şuşinski bəyənib, qiymət verib, hətta Cabbar Qaryağdıoğluna da bənzədib".

Daha sonra konsert proqramı Xalq artisti Nəzakət Teymurova, gənc xanəndələr Eldəniz Məmmədov, Mustafa Mustafayev və Kamilə Nəbiyevanın çıxışları ilə davam edib.

Xatırladaq ki, Q.Rüstəmov 1935-ci il noyabrın 29-da Ağdam rayonunda anadan olub. Unudulmuş xalq mahnılarımızdan bir çoxu sənətkarın ifası ilə yenidən həyat qazanıb. Onun son dərəcə məharətlə oxuduğu "Sona bülbüllər", "Apardı sellər Saranı", "Laçın", "Ay dili-dili", "Sarı gəlin" və neçə-neçə digər mahnılar hər kəsin qəlbində kövrək duyğular və səmimi hisslər oyadıb. Qədir Rüstəmovun ifasında bir sıra muğam dəstgahları - "Rast", "Çahargah" lentə alınaraq radionun qızıl fondunda saxlanılır.

Qədir Rüstəmov 2011-ci il dekabrın 13-də Türkiyənin İstanbul şəhərində vəfat edib, ikinci Fəxri Xiyabanda dəfn olunub.

525-ci qəzet.- 2015.- 17 dekabr.- S.7.