Yusif Kamal - "Dar ağacı"

Yusif Kamalın "Dar ağacı" kitabında şairin müxtəlif illərdə yazdığı şeirləri və poemaları toplanıb. Şeirlər əsasən vətənpərvərlik və məhəbbət mövzusundadır.

Kitaba önsözü yazıçı-publisist Şakir Əhmədli yazıb: "Müəllifin şeirlərində gah təmkin, gah üsyankarlıq, gah təvazökarlıq, müdriklik, gah da haqsızlığa qarşı barışmazlıq, qətiyyət bir-biriylə üzvi vəhdət təşkil edərək, onun mənəvi aləminin güzgüsünə çevrilir. "İllərin həsrət yükü", "Laçın", "Təsəlli" şeirlərində vətənpərvərlik motivləri, "Oynama qəlbimlə", "Sevgi nağılı" şeirlərində ülvi məhəbbət duyğuları, "Tar", "Ay eloğlu"da milli-mənəvi dəyərlərimizə böyük ehtiram, "Kür qırağında", "İlisu"da təbiətin rəngarəngliyinin vəsfi, "Allah adamı", "Dünyam"da mənəvi təkamül axtarışları qabarıq surətdə diqqəti cəlb edir".

Kitabda verilən "Səməndər quşu", "Üç məhəbbət", "Dar ağacı" poemaları və qəzəllər şairin yaradıcılığı barədə aydın tə'ssürat yaradır. Qeyd edək ki, Y.Kamalın bundan öncə "Hamı Allahı çağırır", "Səməndər quşu" şeir kitabları nəşr olunub.

Müşfiq ŞÜKÜRLÜ

525-ci qəzet.- 2015.- 22 dekabr.- S.7