Elman Məbudun yeni kitabı işıq üzü gördü

Gəlimli-gedimli dünyada özündən sonra iz qoymaq hər adama qismət olmur. Müdriklər əbəs yerə deməyiblər ki, insan sözü-söhbəti, əməlləri yaşadıqca yaşayır. Buna görə də ağıllı insan bütün ömrü boyu xalqı üçün, adının təmizliyi üçün, ailəsinin, el-obanın, qohum-əqrəbasının yanında alnıaçıq, üzüağ olması üçün çalışıb vuruşur.

Xeyirxah və incəqəlbli insan kimi tanınan, gözəl əməlləri ilə ürəklərdə özünə yuva salmış Elman İbrahimov həyatda məhz bu prinsiplə yaşayan insanlardandır. İxtisasca həkim olmasına baxmayaraq, poeziyaya marağı uşaq ikən yaranıb. Lakin Elman müəllim yeniyetmə yaşlarında yazdığı şeirlərə uşaqlıq həvəsi kimi baxıb. Hətta qələmə aldıqlarının bir o qədər də uğurlu olmadığını düşünərək bir müddət poeziyadan uzaqlaşıb da. Yaşa dolduqdan sonra həyatın çətinlikləri ilə təkbətək qalan vaxt onun şeir bulağının gözü yenidən açılıb. Həmin dövr 1990-cı ilin sonlarına təsadüf edir. Elman Məbudun şeirləri əsasən sadə xalq dilində yazılıb. Vətənə, ata ocağına, qocalara və körpələrə bəslənən məhəbbət onun yaradıcılığının əsas mövzusudur.

Əyilsən hər yetən nadana, oğul

Cavankən qəddini bükər qocalıq.

Düşsən öz gözündən özün bircə yol,

Qırovtək saçına çökər qocalıq.

Bir şeyi unutma, qadanı alım,

Böyüyə "ağ" olsan, kiçiyə zalım,

Qaşların çatında dayanıb daim,

Qurdtək gəncliyi sökər qocalıq.

Bu yaxınlarda Elman Məbudun "Qibləgahım Vətəndir" adlı ikinci şeirlər kitabı işıq üzü görüb. "Qibləgahım vətəndir" poema və şeirlər kitabında o, könüllə canın ayrılmazlığını bədii ifadələr və obrazlar vasitəsilə oxucuya çatdırmağa çalışır. Onu ən çox, vətənimizi sarsıdan, iri kapitalist dövlətlərinin havadarlığı sayəsində erməni dığalarını qəsbkarlıq siyasətinə cəlb edən, bununla da erməni əli ilə Azərbaycanı güclü dövlətlərin mənafelərinə xidmət etmək məcburiyyətində qoyan naqis qonşuların Dağlıq Qarabağı işğal etmələri, Vətən uğrunda döyüşmüş, həlak olmuş, şikəst qalmış, qaçqın düşmüş soydaşlarımızın acı taleyi narahat edir. O, bütün həyatı boyu bu yükün ağırlığı altında yaşamış, Vətənin xoş gələcəyi bir an olsun belə onun duyğularından yan keçməmişdir. Bütün bu hisslər "Qibləgahım Vətəndir" şeirlər toplusunun hər sətrində öz əksini tapmışdır. Onun şeirlərində Vətən eşqi, Vətən məhəbbəti hər şeydən üstün tutulur, xalqa "Öncə Vətəndir" əqidəsi təlqin edilir.

Şuşanın dağından oxudun, gülüm,

Yaralı yerimə toxundun, gülüm,

Nə danışdım, nə dilləndim, nə dindim,

Sanki bu dünyada yoxudum, gülüm.

Xocalıyla ləkələnib adımız,

Şuşa - and yerimiz, qəm oylağımız.

İkiyə bölünüb bir Ağdamımız,

Ağlayıb, sızlayıb, yoruldum, gülüm.

Əsən yellər! Car çəkiniz hər yana,

Namus-qeyrət heç dözərmi bu qana?

Ünüm yetmək üçün Azərbaycana,

Kül olub, göylərə sovruldum, gülüm.

Elman Məbudun kitabını vərəqlədikcə poeziyanın fəlsəfi mahiyyətini daha dərindən anlamış olursan. Saf, səmimi, poetik və fəlsəfi axtarışlarla şair belə qənaətə gəlir ki, hər şeyin ölçüsü, meyarı insandır - insana sevinc gətirən hər şey xeyir, əzab-əziyyət gətirən hər şey şərdir. Şair sanki özü-özünə hesabat verir, bu millətə, bu torpağa layiqli övlad olmağı, həmişə adının yaxşılar sırasında çəkilməsini arzu edir.

Hörmətli çəkilsin hər yanda adım,

Mənimlə fəxr etsin qohum-övladım.

Bir təmiz ad olsun dünyada varım,

Qara siyahıda mən say olmayım.

Ümid edirik ki, Elman Məbudun hər sətrində Vətən sevgisi duyulan "Qibləgahım Vətəndir" kitabı sizin də stolüstü kitabınıza çevriləcək. Bu kitab övladlarınıza vətənpərvərlik hissinin aşılanması üçün ən gözəl vasitədir.

Rafiq Əliyev

525-ci qəzet.- 2015.- 3 fevral.- S.8.