Yazıçılar Birliyində Ukrayna nümayəndə heyəti ilə görüş keçirilib

Ötən gün Yazıçılar Birliyinin Natəvan klubunda (AYB) Mədəniyyət və Turizm Nazirliyinin dəstəyi, Bədii Tərcümə və Ədəbi Əlaqələr Mərkəzinin dəvəti ilə "Azərbaycan-Ukrayna ədəbi görüşləri" çərçivəsində Bakıda səfərdə olan Ukrayna nümayəndə heyəti ilə görüş keçirilib.

Nümayəndə heyətinin tərkibində Ukrayna Ali Radasının deputatları- yazıçı Mariya Matios, Sergey Taruta, "Vsesvit" jurnalının baş redaktoru Dmitro Drozdovski, Taras Şevçenko Milli Muzeyinin direktoru Dmitro Stus, Ukrayna Yazıçılar Birliyinin katibi Lesya Mudrak, Kiyev Beynəlxalq Kadrlar Akademiyasının professoru Möhlət Hüseynov, Azərbaycan Televiziyasının Ukraynadakı xüsusi müxbiri Möhsün Aslanov təmsil olunub.

Görüş çərçivəsində "Dünya ədəbiyyatı" jurnalının "Ukrayna ədəbiyyatı xüsusi buraxılışı" ilə "Vsesvit" jurnalının "Azərbaycan ədəbiyyatı xüsusi buraxılışı"nın təqdimatı da keçirilib.

Tədbiri AYB-nin sədri, Xalq yazıçısı Anar açaraq ukraynalı şair və yazıçılardan ibarət nümayəndə heyətini salamlayıb: "Bu gün bura çox xeyirxah məramla toplaşmışıq. "Vsesvit" jurnalının "Azərbaycan ədəbiyyatı xüsusi buraxılışı"nın nəşrini unikal hadisə kimi qiymətləndirirəm. Eyni zamanda Azərbaycanda da "Dünya ədəbiyyatı" jurnalının "Ukrayna ədəbiyyatı xüsusi buraxılışı" çap olunub. Hər iki nəşrin ərsəyə gəlməsində əməyə olanlara təşəkkür edirəm".

Bədii Tərcümə və Ədəbi Əlaqələr Mərkəzinin rəhbəri, şair Səlim Babullaoğlu xüsusi buraxılışların təqdim olunması mərasimində iştirakından, həmçinin müasir Ukrayna ədəbiyyatının təmsilçiləri ilə görüşdən məmnunluğunu ifadə edib: "Vsesvit" jurnalının bir sayı bütünlüklə Azərbaycan ədəbiyyatına, Mərkəzin nəşri olan "Dünya ədəbiyyatı" dərgisinin bir sayı isə Ukrayna ədəbiyyatına həsr olunub. "Vsesvit"də 3 bölmədə - proza, poeziya və ədəbiyyatşünaslıq bölməsində 62 Azərbaycan müəllifinin əsəri çap olunub. "Dünya ədəbiyyatı" dərgisində isə 30 ukraynalı müəllifin şeir, hekayə və ədəbiyyatşünaslıq yazıları dərc olunub. Azərbaycan ədəbiyyatına həsr olunmuş xüsusi buraxılışın ideya müəllifi həmkarım Dmitro Drozdovskidir. Layihəyə maliyyə dəstəyi Kiyev Beynəlxalq Kadrlar Akademiyasının professoru - mesenat Möhlət Hüseynov tərəfindən göstərilib. Eyni zamanda jurnalın hazırlanmasında Azərbaycan Respublikasının Ukraynadakı səfirliyi də iştirak edib. "Dünya ədəbiyyatı" dərgisinin hazırlanmasına isə Ukrayna Ali Radasının deputatı Sergey Taruta dəstək verib. Azərbaycanın Mədəniyyət və Turizm Nazirliyinin dəstəyi ilə yanvarın 14-17-sində Kiyev şəhərində Ukrayna Xarici İşlər Nazirliyinin Diplomatik Akademiyasında və Taras Şevçenko Milli Muzeyində hər iki jurnalın təqdimatı keçirilib, Azərbaycan ədəbiyyatçılarından ibarət nümayəndə heyəti, həmçinin ölkəmizin Ukraynadakı səfirliyi, şəxsən səfir Eynulla Mədətli yaxından iştirak edib. Fakt budur ki, layihəmiz alınıb və bu, bizi çox sevindirir. Ümid edirəm ki, indiki təqdimat mərasimi ilə bizim əməkdaşlığımızın ikinci mərhələsi başlanır. Dünən Milli Məclisin Mədəniyyət məsələləri daimi komissiyasında deputatlarımızla Ukrayna nümayəndə heyətinin görüşü olub. Fürsətdən istifadə edib, yüksək səviyyəli görüş üçün Milli Məclisin rəhbərliyinə, millət vəkillərimizə minnətdarlığımı bildirirəm".

Sonra AYB-nin sədri Anar rəhbərlik etdiyi qurumun fəxri üzvlük vəsiqələrini "Vsesvit" jurnalının baş redaktoru Dmitro Drozdovskiyə, Kiyev Beynəlxalq Kadrlar Akademiyasının professoru Möhlət Hüseynova və Azərbaycan Televiziyasının Ukraynadakı xüsusi müxbiri Möhsün Aslanova təqdim edib. Eyni zamanda ədəbi əlaqələrin inkişafındakı xidmətlərinə görə Ukrayna Ali Radasının deputatı Sergey Taruta və Taras Şevçenko Milli Muzeyinin direktoru Dmitro Stus AYB-nin diplomlarına layiq görülüb.

Deputat Sergey Taruta çıxışında bir müddət əvvəl Azərbaycan Yazıçılar Birliyinin fəxri üzvlüyünə qəbul edilməsindən qürur duyduğunu vurğulayıb. S. Taruto bu nəşrlər vasitəsilə Azərbaycanın yeni nəsil ədəbiyyatçılarını tanımasından sevindiyini bildirib: "Düşünürəm ki, hər iki ölkənin müvafiq qurumları gücünü birləşdirib gələcəkdə də belə layihələrin sayının artmasına çalışmalıdır. Biz Ukrayna tərəfi olaraq belə görüşlərin daha geniş formatda keçirilməsinin tərəfdarıyıq. Həmkarım Mariya Matiosla bu barədə müzakirələr aparmışıq, mən də öz tərəfimdən birgə əməkdaşlıq məsələlərində əlimdən gələn köməyi əsirgəməyəcəyəm. Bir müddət bizim əlaqələrimiz sanki dalana dirənmişdi, indi isə biz çalışmalıyıq ki, münasibətlərdəki durğunluğu aradan qaldırıb yeni ədəbi- mədəni layihələr həyata keçirək. Ukrayna hazırda ağır günlər keçirir. Ancaq Mariya Matiosun qeyd etdiyi kimi ədəbiyyat adamın ruhunu sağaldır. Buna görə biz ədəbi əlaqələrimizi genişləndirməli, ədəbiyyat vasitəsilə yaralarımızı sağaltmaq barəsində düşünməliyik".

Kiyev Beynəlxalq Kadrlar Akademiyasının professoru Möhlət Hüseynov çıxışında həmvətənlərinin hər zaman Ukraynada Azərbaycanı layiqincə təmsil etdiyini bildirib. M. Hüseynov deyib ki, Azərbaycanın torpağı da işğal olunub və bu baxımdan Ukraynanın mövcud problemi anlaşılandır. Jurnalların nəşrindən sevndiyini bildirən M. Hüseynov gələcəkdə bu əlaqələrin daha da genişlənəcəyinə inamını ifadə edib.

Ukraynanın Azərbaycandakı fövqəladə və səlahiyyətli səfiri Aleksandr Mişenko bu xüsusi buraxılışların nəşrini çox əhəmiyyətli hadisə kimi qiymətləndirib: "Rusiyanın əleyhimizə informasiya müharibəsi apardığı bir zamanda bu jurnalların nəşri Ukraynada hələ ədəbiyyatın, sözün, ruhun ölmədiyini sübut edir. Bütün bunlar göstərir ki, heç nəyə baxmayaraq Ukraynada həyat davam edir. Ümid edirəm ki, bu jurnallar vasitəsilə bizim ədəbiyyatçılarımız bir-birini daha yaxından tanıyacaq".

Millət vəkili Elmira Axundova ukraynalı həmkarı Sergey Tarutanın iki ölkə arasındakı əlaqələrdə yaranan durğunluq fikrini təsdiqləyib və bildirib ki, gələcəkdə bu durğunluğu aradan qaldırmaq naminə belə buraxılışların nəşri əhəmiyyətli rol oynaya bilər: "Düşünürəm ki, bu əhəmiyyətli hadisəni Azərbaycan mətbuatı geniş işıqlandırmalıdır, mən də bununla bağlı yazı hazırlayacağam. Arzu edirəm ki, Ukraynadakı ağır günlər başa çatsın, sülh, əmin-amanlıq olsun. Və biz yalnız həyata keçirilən ədəbi-mədəni layihələri qeyd etmək üçün bir yerə toplaşaq. Belə bir deyim var, əgər yazıçılar bir az siyasətçi, siyasətçilər bir az yazıçı olsaydılar, xoşagəlməz hadisələr də baş verməzdi. Ümid edirəm ki, biz tezliklə sülhə nail olacağıq".

"Vsesvit" jurnalının baş redaktoru Dmitro Drozdovski həyata keçirilmiş layihənin tarixindən söz açıb. Baş redaktor bundan sonra da hər iki ölkənin yazıçı və şairləri arasında ədəbi əlaqələrini daha da dərinləşməsinin zəruriliyini vurğulayıb.

Tədbiri yekunlaşdıran Xalq yazıçısı Anar Ukraynanın yaşadığı problemin tanış olduğunu və ölkələr arasında güc vasitəsilə yox, ağılla aparılan siyasəti dəstəklədiyini deyib. Xalq yazıçısı problemin tezliklə aradan qalxmasını arzulayıb və hər iki ölkə arasında ədəbi əlaqələrin bundan sonra da inkişaf edəcəyinə əminliyini bildirib.

Çıxışlardan sonra hər iki ölkənin yazarları arasında ədəbi müzakirə aparılıb. Sonda görüş iştirakçıları xatirə şəkilləri çəkdiriblər.

Sevinc MÜRVƏTQIZI

525-ci qəzet.- 2015.- 6 fevral.- S.6.