Əziz Mirəhmədovun 95 illiyi qeyd olunub

Fevralın 11-də Azərbaycan Milli Elmlər Akademiyasının (AMEA) Nizami adına Ədəbiyyat İnstitutunun Elektron akt zalında görkəmli ədəbiyyatşünas alim, AMEA-nın müxbir üzvü Əziz Mirəhmədovun 95 illik yubileyi ilə bağlı elmi sessiya keçirilib.

Tədbiri giriş sözü ilə AMEA-nın vitse-prezidenti, Nizami adına Ədəbiyyat İnstitutunun direktoru, akademik İsa Həbibbəyli açaraq görkəmli alimin həyatı, yaradıcılığı, ədəbiyyatşünaslıq elmi sahəsində fəaliyyəti haqqında geniş məruzə ilə çıxış edib. Akademik İsa Həbibbəyli qeyd edib ki, 23 yaşından taleyini Nizami adına Ədəbiyyat İnstitutuna bağlayan alim ömrünün sonuna kimi bu elmi-tədqiqat müəssisəsində çalışaraq yüzlərlə məqalə, 20-dən çox monoqrafiya və kitab yazıb. Ədəbiyyatşünas alimin "M.F.Axundov", "Abdulla Şaiq", "Sabir" , "Məhəmməd Hadi", "Azərbaycan Molla Nəsrəddini", "Satirik gülüşün qüdrəti", "Ağlar güləyən" monoqrafiyaları, "XX əsr Azərbaycan ədəbiyyatında satiranın inkişafına dair", "Zakir və XIX əsr Azərbaycan satirası", "XX əsrin əvvəllərində ədəbi hərəkat: tənqidi realizm" və s. sanballı məqalələri ədəbiyyatımızın tarixinin öyrənilməsində ən etibarlı mənbələrdəndir.1960-1980-ci illərin ədəbi prosesindən danışan akademik İsa Həbibbəyli həmin zaman kəsiyini Azərbaycan ədəbiyyatşünaslığının "qızıl dövrü" adlandırıb və bu mərhələdə görkəmli alim Əziz Mirəhmədovun elmi xidmətlərindən bəhs edib. Akademik İsa Həbibbəyli yubilyarın zəngin elmi fəaliyyəti, yazdığı monoqrafiyalarla bərabər özünün namizədlik, eləcə də doktorluq işində rəsmi opponenti olmuş Əziz Mirəhmədov haqqında xatirələrini tədbir iştirakçıları ilə bölüşüb.

Elmi sessiyada Nizami adına Ədəbiyyat İnstitutunun əməkdaşlarından filologiya üzrə elmlər doktorları, professorlar Zaman Əsgərli, Rəhim Əliyev, Şirindil Alışanlı, Asif Rüstəmli, Bədirxan Əhmədov, filologiya üzrə elmlər doktoru Sara Osmanlı, filologiya üzrə fəlsəfə doktoru Aslan Salmansoy və başqaları çıxış ediblər. Onlar görkəmli ədəbiyyatşünas alim Əziz Mirəhmədovun zəngin elmi fəaliyyətinin müxtəlif istiqamətlərindən bəhs edərək uzun illər çiyin-çiyinə çalışdıqları həmkarları ilə bağlı xoş xatirələr

525-ci qəzet.- 2015.- 13 fevral.- S7.