Xətai Sənət Mərkəzində "Yaddaşlarda yaşayan Xocalı" sərgilənir

Xətai Sənət Mərkəzində bu mədəniyyət ocağının və Azərbaycan Dövlət Rəsm Qalereyasının birgə təşkilatçılığı ilə "Yaddaşlarda yaşayan Xocalı" mövzusunda aksiya-sərgi açılıb.

Sərgidə mərkəzin nəzdində fəaliyyət göstərən və T.İsmayılov adına Uşaq Gənclər Yaradıcılıq Mərkəzinin rəsm dərnəyinin şagirdlərinin Xocalı mövzusunda çəkilmiş əsərləri nümayiş olunub.

Tədbirdə Xətai Sənət Mərkəzinin direktoru Zahid Əvəzov, Dövlət Rəsm Qalereyasının direktoru Elnur Hüseynov və başqaları çıxış edərək Xocalıda baş vermiş dəhşətli hadisələrdən danışıb, törədilmiş soyqırımı faktlarının təsviri sənət əsərləri vasitəsilə azyaşlı şagirdlər tərəfindən ifadə edilməsini təqdirəlayiq hesab ediblər.

Qeyd edilib ki, belə tədbirlər gənc nəslin vətənpərvərlik ruhunda tərbiyəsi məqsədilə keçirilir.

Fevralın 26-na kimi davam edəcək sərgidə fərqlənən şagirdlərə sertifikatlar veriləcək.

Sonra tədbir iştirakçıları Xocalı şəhidlərinin xatirəsinə ucaldılmış "Ana harayı" abidəsinin önünə gül dəstələri qoyublar.

S.ABDULLAYEVA

525-ci qəzet.- 2015.- 26 fevral.- S.7.