"Azərbaycan - möcüzəli odlar yurdu" Çexiya Milli Muzeyində sərgilənib

Praqadakı Çexiya Milli Muzeyində Milli Azərbaycan Tarixi Muzeyinin "Azərbaycan - möcüzəli odlar yurdu" mövzusunda beynəlxalq sərgisi keçirilib.

Azərbaycan xalqının milli irsinin təbliği məqsədilə təşkil edilən sərgidə muzeyin arxeologiya, etnoqrafiya, numizmatika sahələrinə aid eksponatlar nümayiş olunub.

Sərgidə milli sərvətlərimiz, abidələrimiz olan muzey eksponatları Avropa tamaşaçılarına Azərbaycan tarixini, mədəniyyətini, milli mənəvi dəyərlərini tanıtmaq imkanı verir.

Çexiyada nəşr edilən Azərbaycan və Xəzər tədqiqatları Mərkəzinin "Bulletin" jurnalının növbəti sayı bütövlükdə Milli Azərbaycan Tarixi Muzeyinə həsr olunub. Jurnalda Azərbaycan və Çexiya müəlliflərinin ingilis və çex dillərində məqalələri dərc olunub. Nəşrdə, həmçinin muzeyin materialları və sərgisi barədə şəkillərlə yanaşı, geniş məqalələr yer alıb.

Sərginin kuratoru Pavlina Voqelovanın "Azərbaycan - möcüzəli odlar yurdu" sərlövhəli məqaləsində sərginin açılış mərasimindən fotoşəkillər və burada nümayiş olunan eksponatlar barədə məlumat verilib.

S.ABDULLAYEVA

525-ci qəzet.- 2015.- 27 fevral.- S.7.