"Köhnə saat"ımız Kiyevdə göstərilib

Ukrayna paytaxtındakı "Kiyev" kinoteatrında "New Vision" V Beynəlxalq qısametrajlı filmlər festivalı keçirilib.

Bu beynəlxalq baxışda Azərbaycanı "Azanfilm" kinostudiyasında istehsal olunmuş "Köhnə saat" adlı 9 dəqiqəlik animasiya təmsil edib.

Filmin rejissoru və ssenari müəllifi Cavid Əhədov, prodüseri Fariz Əhmədovdur.

Festival çərçivəsində kinematoqrafçılar və tamaşaçılar bütün dünyanın ən yaxşı qısametrajlı filmləri, yeni müəlliflər, yeni dünya və yeni baxışlarla tanış olmaq üçün yaxşı imkan əldə ediblər.

Filmlər Ukrayna dilində subtitrlərlə orijinalın dilində nümayiş etdirilib.

"Köhnə saat" animasiya filmi Ukrayna və xarici ölkə tamaşaçılarında böyük maraq doğurub.

Filmə baxışda Azərbaycan səfirliyinin əməkdaşları, diaspor və gənclər təşkilatlarımızın nümayəndələri də iştirak ediblər. Yeri gəlmişkən deyək ki, diplomatik nümayəndəliyimiz festivalın tərəfdaşlarından və sponsorlarından biri kimi çıxış edib.

S.ABDULLAYEVA

525-ci qəzet.- 2015.- 4 iyun.- S.7.