"Musiqidə təsvirilik..." təqdim edilib

Milli Konservatoriyada tanınmış musiqişünas və publisist, sənətşünaslıq doktoru Ülkər Əliyevanın "Musiqidə təsvirilik: mahiyyəti, spesifik xüsusiyyətləri və təsnifatı" kitabının təqdimatı olub.

Sənətşünaslıq üzrə fəlsəfə doktoru, elmi iş üzrə prorektor Lalə Hüseynova müəllifdən və onun yeni layihəsindən söz açaraq bildirilib ki, Almaniyada nəşr olunan kitab "Musiqidə ixtira" beynəlxalq kataloquna daxil edilib.

Sənətşünaslıq doktoru, Azərbaycan Milli Konservatoriyasının dosenti Ülkər Abdullayeva 5 kitabın, 50 elmi və 400-dən yuxarı publisistik məqalənin müəllifidir. 2005-ci ildə "İlin ən yaxşı musiqişünası" nominasiyasında Mədəniyyət və Turizm Nazirliyinin diplomuna, 2007-ci ildə "Gənc alim" nominasiyasında xüsusi diploma layiq görülüb.

Ü.Əliyeva videoçarxı şərh edərək, özünün yeni layihəsindən ətraflı danışıb. Bildirib ki, kitabda onun doktorluq dissertasiyasının materialları yer alıb. Yazılarının birində toxunduğu mövzu Almaniyanın elmi ədəbiyyat nəşrində ixtisaslaşan tanınmış "Akademic Pablishing Lambert" nəşriyyatını maraqlandırıb.

Sinesteziya, incəsənət növlərinin qarşılıqlı əlaqəsi mövzusu hazırda dünya sənətşünaslığının ən perspektivli istiqamətlərdən sayılır.

Alman, ingilis və rus dillərində çap olunan kitab 8 fəsildən ibarətdir. Müəllif kitabın strukturu və məzmunu barədə ətraflı məlumat verib.

Əsərdə musiqidə təsviriliyin mahiyyəti, spesifik xüsusiyyətləri və təsnifatı konkret müəyyən olunub. Təqdim olunan təsnifata əsaslanaraq, musiqidə obrazlılığın hər bir növünü səciyyələndirən əsas əlamətlər nəzərdən keçirilir, sonra ayrı-ayrı əsərlərin ən maraqlı kompozisiya metodları təsvirilik nöqteyi-nəzərindən şərh edilir.

Təqdimatın konsert hissəsində Azərbaycan Milli Konservatoriyasının tələbələri, beynəlxalq və respublika muğam müsabiqələrinin laureatları çıxış ediblər. Azərbaycan və xarici klassiklərin əsərləri səslənib.

S.ABDULLAYEVA

525-ci qəzet.- 2015.- 4 iyun.- S.7.