Muzey əşyalarının bərpa və konservasiya işləri müzakirə edilib

Mədəniyyət və Turizm Nazirliyinin Muzey Sərvətləri və Xatirə Əşyalarının Elmi Bərpa Mərkəzində növbəti elmi bərpa şurası keçirilib.

Elmi şuranın iclasında son aylar ərzində mərkəzdə bərpa və konservasiya olunmuş Yevlax, Lerik, Masallı, Ağsu, Astara və digər bölgələrin tarix-diyarşünaslıq, həmçinin Azərbaycan Milli İncəsənət və Əzim Əzimzadənin ev muzeylərinin toplularından xalça, xalça məmulatı, qrafika, tikmə, parça, metal, ağac və sair kimi 50-ə yaxın muzey əşyasına baxış olub. İclas zamanı muzey əşyalarının üzərində aparılan bərpa və konservasiya işləri qənaətbəxş qiymətləndirilib.

Eyni zamanda, Azərbaycan Milli İncəsənət Muzeyinin 10 ədəd qrafika, 3 ədəd tikmə nümunəsinin bərpasının yüksək peşəkarlıqla aparıldığı qeyd edilib.

İclasda Mədəniyyət və Turizm Nazirliyinin göstərişi ilə bərpa məqsədilə Astara, Ağsu, Masallı tarix-diyarşünaslıq, Azərbaycan Xalça və Azərbaycan Milli İncəsənət Muzeylərindən gətirilmiş 200-ə yaxın əşyaya ilkin baxış keçirilərək zədələnmə dərəcələri, səbəbləri və bərpa üsulları müzakirə olunub.

S.ABDULLAYEVA

525-ci qəzet.- 2015.- 24 iyun.- S.7.