Anti-Azərbaycan şəbəkəsinin növbəti həmləsi - OCCRP

"AZADLIQ" RADİOSUNDA ÜZƏ ÇIXAN KORRUPSİYA HALLARI QƏRB İNSTİTUTLARI İLƏ ƏLAQƏLİ FƏALİYYƏT GÖSTƏRƏN TƏŞKİLATLARDA DA MÖVCUDDUR"

Anti-Azərbaycan qüvvələri dövlətimizin əleyhinə qərəzli kampaniya apararaq Birinci Avropa Oyunlarını "boykot" etməyə çalışsalar da onlar məqsədlərinə nail ola bilməyiblər. Lakin təəssüflər olsun ki, bu onların Azərbaycanla bağlı fəaliyyətini dayandırmağa kifayət etməyib. Çünki Qərb və Amerika dairələri müstəqil siyasət xəttinə malik Azərbaycanın təbii sərvətlərinə olan maraqlarından imtina etmək fikrində deyil.

Hazırda anti-Azərbaycan şəbəkəsinin əksər qüvvələrinin ifşa olunub sıradan çıxdığını nəzərə alsaq, təbii olaraq bu həmin dairələrə yeni "təşəbbüslər" irəli sürməyə vadar edir. Bunlardan biri də Mütəşəkkil Cinayətkarlıq və Korrupsiya Məlumat Layihəsidir (OCCRP). Diqqət yetirsək, Azərbaycanı ən ali dəyərlərə hörmət edilməyən, dizinə qədər korrupsiyaya bulaşan ölkə kimi təqdim edən "Freedom House", "Amnesty İnternational", CNN, BBC, "The Guardian" "The İndependent" kimi QHT və media orqanları bugünlərdə Ermənistanda yenidən başlayan etiraz aksiyalarında minlərlə xalq kütləsinin zor gücü ilə dağıdılması, yüzlərlə insanın xəsarət alması, həbs edilməsinə, hətta saxlanılan şəxslərin arasında jurnalistlərin olmasına rəğmən addekvat reaksiya göstərmir, əksinə baş verənləri "demokratik dövlətin" söz və ifadə azadlığının təcəssümü kimi təqdim edirlər.

Bunun əvəzinə Azərbaycanda törətdikləri korrupsiya əməlləri və dövlətə xəyanətə görə həbs olunan şəxslərin subyektiv mülahizələrinə istinad edərək hazırladıqları qərəzli materiallarla dövləti ittiham edir, Azərbaycanı demokratiyadan uzaq, korrupsiyaya bulaşan ölkə adlandırıb onun imicini zədələməyə çalışırlar. Onların Azərbaycanda mətbuata çıxışı "Azadlıq" radiosu vasitəsilə həyata keçirilir. Maraqlısı isə budur ki, Amerika Konqresinin maliyyələşdirdiyi bu media orqanının Bakı ofisində aparılan yoxlamalar nəticəsində xeyli sayda korrupsiya faktlarının aşkarlandığı bildirilir.

Təəssüf doğuran hal isə odur ki, özlərini sərhədsiz repartyorlar adlandıraraq ölkəmizi tənqid atəşinə tutan şəxslər görəsən niyə məmur-vətəndaş münasibətlərində şəffaflığın təminatı olan "ASAN xidmət" mərkəzləri vasitəsilə Azərbaycanın korrupsiyaya qarşı həyata keçirdiyi bu mütərəqqi layihədən söhbət belə açmırlar? Və yaxud nə üçün həmin qüvvələr dövlətimizin dini və mədəniyyətlərarası dəyərlərə verdiyi böyük töhfələri görməzdən gəlirlər? Halbuki artıq müxtəlif dünya dövlətləri korrupsiyaya, eləcə də dini və irqi ayrıseçkiliyə qarşı mübarizədə Azərbaycanın qazandığı təcrübələrdən yararlanmaq fikrindədir. Bəlkə elə bu amil ermənipərəst qüvvələrin qısqanclığına səbəb olur? Çünki həmin dairələrin fəaliyyətinin mərkəzində məhz qatı millətçilik və xristiançılıq dayanır.

Avropa Oyunlarını möhtəşəm səviyyədə təşkil etməklə özünü idman ölkəsi kimi bütün dünyaya sübut edən Azərbaycan isə beynəlxalq mədəni, siyasi və iqtisadi tədbirlərə ev sahibliyi etdiyi kimi artıq idman yarışlarının keçirilməsinə də ən real namizədlərdən birinə çevrilib. Təsadüfi deyil ki, 2016-cı ildə ölkəmiz Dünya Şahmat Olimpiadası və "Formula-1" yarışlarına, 2017-ci ildə İslam Həmrəyliyi Oyunlarına, 2020-ci ildə isə futbol üzrə Avropa Çempionatının final mərhələsinin 4 qarşılaşmasına ev sahibliyi edəcək. Bu Azərbaycana dünyada özünü tanıtmaq və təsdiqlətmək üçün əlavə imkanlar verir. Ona görə də bəlli çevrələr eyni mərkəzdən aldıqları qrantlar hesabına fasilə vermədən ölkəmizə qarşı təzyiqlərini davam etdirir, dövlətimizin nüfuzuna xələl yetirməyə çalışırlar. Yaxın Şərqdə baş verən hadisələr də göstərib ki, bu qüvvələr qətiyyən yerlərdə insan hüquq və azadlıqlarının pozulması, korrupsiya halları kimi süni şəkildə ortaya atdıqları məsələlərdən narahat deyillər və onlar bu "problemlər"in aradan qaldırılmasına çalışmır, əksinə hədəf seçdikləri dövləti dərisinə qədər soyaraq xarabalığa çevirmək istəyirlər.

Təsadüfi deyil ki, onların hazırladığı materiallarda Türkiyənin "Doğan media qrupu"na daxil olan "Hürriyyet" qəzetinin də əli var. Erməni lobbisi və PPK terror təşkilatı ilə əlaqəli fəaliyyət göstərən media maqnatı Aydın Doğana məxsus mətbuat orqanları dəfələrlə həm Türkiyə, həm də Azərbaycan hökumətinə qarşı qərəzli informasiyaların təbliği ilə məşğul olub. Ona görə də, "Hürriyyet" qəzetinin əməkdaşı Tolga Tanisin simasında OCCRP layihəsində yer alanların məqsəd və ambisiyaları öz çılpaqlığı ilə göz önündədir.

İctimai Problemlərin Tədqiqi Assosiasiyasının sədri, politoloq Məhərrəm Zülfüqarlı hesab edir ki, korrupsiya halları dünyanın bütün ölkələrində baş verir: "Buna qarşı dövlət qurumları mübarizə aparırlar. Azərbaycanda da dövlət səviyyəsində korrupsiyaya qarşı mübarizə aparan qurumlar var. Dövlət heç vaxt elan etməyib ki, Azərbaycanda korrupsiya yoxdur. Var və buna qarşı mübarizə aparılır. Məsələ odur ki, xarici mərkəzlərdən maliyyə vəsaiti alaraq ölkəmizə qarşı şər, böhtan kampaniyası aparan şəxslərin indi özlərinə qarşı yoxlamalar başlanılıb. "Azadlıq" radiosunun Azərbaycandakı ofisində korrupsiya faktlarına görə yoxlamalar aparılması onu göstərib ki, dünənə qədər hamını ittiham edən, onlardan "hesabat" tələb edən şəxslərin özü korrupsionerdir. İstər parlament, istərsə də prezident seçkilərində "Azadlıq" radiosu çalışır ki, hər kəsi ittiham etsin. Müsbət haldır ki, artıq "Azadlıq" radiosunun Bakıdakı ofisində yoxlamalar aparılıb və xeyli sayda korrupsiyaya dair faktlar aşkarlanıb. Bu tək "Azadlıq" radiosu ilə bağlı məsələ deyil. Qərəzli qüvvələr şəbəkə şəklində Milli Demokratiya İnstitutu kimi QHT-lərlə bir yerdə fəaliyyət göstərib və eyni mənbədən qrantlar alıblar. Sadəcə olaraq bu qüvvələr hesab edirdilər ki, heç kəs onlara toxunmayacaq. Onlar Qərb tərəfindən dəstək alsalar da, başa düşmürlər ki, Avropada da vergidən yayınan və korrupsiyaya bulaşan qurumlara qarşı mübarizə aparılır. Artıq hər kəsə məlumdur ki, ABŞ Konqresinin maliyyələşdirdiyi "Azadlıq" radiosunda üzə çıxan korrupsiya halları Qərb institutları ilə əlaqəli fəaliyyət göstərən əksər təşkilatlarda da var".

Türkiyəni də daxildən zəiflətmək istəyən qüvvələrin kifayət qədər olduğunu deyən M.Zülfüqarlı bildirib ki, onlar da eyni mərkəzdən maliyyələşir, sifarişlər alır və qərəzli kampaniyalarda iştirak edirlər: "Biz Birinci Avropa Oyunları ərəfəsində də qərəzli hücumların şahidi olduq. Müsbət məqam odur ki, "Bakı 2015: Birinci Avropa Oyunlarına Dəstək" Vətəndaş Cəmiyyəti Koalisiyası vasitəsilə biz onlara layiqli cavab verərək, qərəzli hücumların qarşısını ala bildik. Nəticədə bütün dünya Bakıda möhtəşəm tədbirin şahidi olub. Lakin bundan sonra da Azərbaycana qarşı qərəzli hücumlar olacaq. Bu yaxınlarda Avropa Şurasında baş tutan dinləmələrdə Ermənistan işğalçı dövlət olması barədə cümlə çıxarılaraq nisbətən yumşaq formada əvəzlənib. Bu həmin qurumun ermənipərəst siyasətçilərinin fəaliyyətinin nəticəsidir. Buna baxmayaraq Avropada Azərbaycanı müdaifə edən kifayət qədər deputatlar var. Onlar ölkəmizin haqq işini dəstəkləyərək işğalın bir adı olduğunu bildirirlər. Azərbaycanda keçirilən prezident seçkilərini yüksək qiymətləndirən Avropa Şurasının müşahidə qrupu parlament seçkilərində də iştirak edəcək. Qərb ölkələrində bizi istəyən və istəməyən qüvvələr var. Bəziləri Azərbaycanın inkişafını qəbul edir, bəziləri isə qəbul etmirlər. Qərəzli qüvvələr çalışır ki, Azərbaycanın Ukraynanın vəziyyətinə düşsün. Lakin bu gün Azərbaycan həm siyasi, həm iqtisadi, həm də hərbi cəhətdən böyük gücə malikdir. Ona görə də bütün təzyiqlərə cavab vermək iqtidarındayıq. Hər bir Azərbaycan vətəndaşı da dövlətimizin daha da qüdrətlənməsinə çalışmalıdır".

İnsan Hüquqları 21-ci əsr - Azərbaycan Fondunun sədri, hüquq müdafiəçisi Şahin Camalov qeyd edib ki, Mütəşəkkil Cinayətkarlıq və Korrupsiya Məlumat Layihəsini həyata keçirən anti-Azərbaycan şəbəkəsidir: "Onlar israrla Azərbaycanın əldə etdiyi inkişafa, tərəqqiyə mane olmağa çalışırlar. Dünyanın istənilən nöqtəsində olduğu kimi Azərbaycanda da korrupsiya, fundamental haqlarla bağlı problemlər mövcuddur. Bunu dövlət rəsmiləri də etiraf edir. Azərbaycan korrupsiya, rüşvətxorluq və insan hüquqlarının pozulmasına qarşı ciddi mübarizə aparır. Hətta biz bunun müsbət nəticələrini də görməkdəyik. Hərçənd Birinci Avropa Oyunları fonunda Azərbaycanın qazandığı uğurların bəzi Qərb və Amerika dairələrini qıcıqlandırdığını müşahidə etdik. Onlar başa düşürlər ki, dövlətimizin müstəqil siyasətinə mane olmaq mümkün deyil. Ona görə də, Azərbaycana qarşı şər, böhtan kampaniyası aparmaqla nəyəsə nail olacaqlarını düşünürlər. Bu günlərdə Avropa Şurasında keçirilən dinləmələrdə Ermənistanın Dağlıq Qarabağı işğal etməsinə dair hesabatda əks olunan cümləni dəyişdirməklə Qərb dairələri öz çirkin niyyətlərini açıq şəkildə göstəriblər".

Ceyhun ABASOV

525-ci qəzet.- 2015.- 25 iyun.- S.3.