"Muğam aləmi" IV Beynəlxalq Muğam Festivalının açılışı olub

Heydər Əliyev Mərkəzində "Muğam aləmi" IV Beynəlxalq Muğam Festivalının açılış mərasimi keçirilib.

Tədbirdə Azərbaycanın Birinci xanımı, Heydər Əliyev Fondunun prezidenti Mehriban Əliyevanın "Muğam aləmi" IV Beynəlxalq Muğam Festivalının iştirakçılarına müraciəti oxunub.

Müraciətdə qeyd olunur ki, hər bir xalqın və millətin ən böyük sərvəti onun mədəni irsidir: "Azərbaycan xalqını əsrlər boyu bir millət kimi qoruyub saxlayan onun zəngin mədəniyyəti, dili, ədəbiyyatı, poeziyası və musiqisi olub. Bu gün bu irsi qorumaq, saxlamaq, təbliğ etmək hər birimizin mənəvi borcudur. Milli-mədəni irsimizin bir sıra qiymətli nümunələrinin, o cümlədən, Azərbaycan muğamının, aşıq, xalçaçılıq, tar ifaçılığı, kəlağayı sənətinin və Novruz bayramının UNESCO-nun "Bəşəriyyətin qeyri-maddi mədəni irs üzrə Reprezentativ Siyahısı"na daxil edilməsi bizim mədəni irsimizə, onun qorunmasına dünya miqyasında göstərilən diqqət və qayğının təzahürüdür.

Azərbaycan həm milli mədəni irsin, həm də bəşəriyyətin mədəni irs xəzinəsinin nadir incilərinin qorunması və təbliğinə dair beynəlxalq miqyaslı bir çox layihələr həyata keçirir. Muğam sənəti də artıq təkcə bizim yox, bütün dünyanın sərvətidir. Muğam aləmi hüdudsuz, sərhədsiz bir məkandır və bu məkanı yaşadan insanların artıq daimi bir görüş yeri var - bu, ənənəvi olaraq Bakıda keçirilən "Muğam aləmi" Beynəlxalq Muğam Festivalıdır. Artıq dördüncü dəfədir ki, qədim muğam sənəti dünyanın müxtəlif ölkələrindən gələn incəsənət xadimlərini, sənətkarları, alimləri Bakıda bir araya toplayır və musiqisevərlərə xoş anlar bəxş edir".

"Muğam aləmi" IV Beynəlxalq Muğam Festivalının ilk günü tamaşaçılara Üzeyir Hacıbəyli adına Dövlət Simfonik Orkestrinin və Dövlət Xor Kapellasının ifasında konsert təqdim olunub. Orkestrə Fəxrəddin Kərimov dirijorluq edib.

Heydər Əliyev Fondu, Mədəniyyət və Turizm Nazirliyi və Bəstəkarlar İttifaqı tərəfindən keçirilən festival martın 18-dək davam edəcək.

Festival çərçivəsində həm Bakıda, həm də ölkəmizin bir sıra bölgələrində Azərbaycanın və xarici musiqiçilərin iştirakı ilə konsertlərin, habelə beynəlxalq elmi simpoziumun, beynəlxalq muğam müsabiqəsinin keçirilməsi nəzərdə tutulur.

Festivala Türkiyə, İran, İraq, Özbəkistan, Tacikistan, ABŞ, Fransa, İngiltərə, Livan, İspaniya, Almaniya, İordaniya, Rusiya, Çin, Hindistan, Tunis, Belçika, Sloveniya və Niderlanddan dünya şöhrətli musiqiçilər və musiqi qrupları dəvət olunub. Konsertlərdə xarici musiqiçilərlə yanaşı, Azərbaycanın görkəmli muğam ustaları Arif Babayev, Mənsum İbrahimov, Zabit Nəbizadə, Nəzakət Teymurova, Gülyaz Məmmədova, Aqil Məlikov, Elnarə Abdullayeva, Təyyar Bayramov, Səbuhi İbayev və istedadlı gənc ifaçılar - Arzu Əliyeva, Babək Niftəliyev, İlkin Əhmədov, Güllü Muradova, Mirələm Mirələmov və başqaları çıxış edəcəklər.

Eyni zamanda, Üzeyir Hacıbəyli adına Azərbaycan Dövlət Simfonik Orkestrinin, Azərbaycan Dövlət Xalq Çalğı Alətləri Orkestrinin, Qara Qarayev adına Azərbaycan Dövlət Kamera Orkestrinin, Dövlət Xor Kapellasının, "Sinfonietta" orkestrinin çıxışları planlaşdırılır.

Festival günlərində qonaqlara Azərbaycan Dövlət Akademik Opera və Balet Teatrının səhnəsində Üzeyir Hacıbəylinin "Leyli və Məcnun", "Əsli və Kərəm" operaları təqdim olunacaq.

Həmçinin Bakı Caz Mərkəzində görkəmli caz ustası Vaqif Mustafazadənin 75 illiyinə həsr olunmuş tədbir, Cəmil Əmirovun, Salman Qəmbərovun, Elçin Şirinovun rəhbərliyi ilə tanınmış caz kollektivlərinin iştirakı ilə konsertlər də nəzərdə tutulub.

Ötən gün Bəstəkarlar İttifaqında "Muğam aləmi" IV Beynəlxalq Muğam Festivalı çərçivəsində "Muğam aləmi" dördüncü beynəlxalq musiqişünaslıq simpoziumu işə başlayıb.

Ənənəvi olaraq iki ildən bir ölkəmizdə keçirilən beynəlxalq muğam festivalının böyük maraq doğurduğunu söyləyən Azərbaycan Bəstəkarlar İttifaqının sədri, Xalq artisti, professor Firəngiz Əlizadə milli musiqimizin təbliğində belə tədbirlərin mühüm rolu olduğunu vurğulayıb.

"Muğam aləmi" IV Beynəlxalq Muğam Festivalının ölkəmizin mədəni həyatında böyük əhəmiyyət daşıdığını diqqətə çatdıran xalq artisti bildirib ki, bu möhtəşəm musiqi bayramı təkcə paytaxt Bakıda deyil, bu gün Azərbaycanın bütün bölgələrində geniş şəkildə qeyd olunmaqdadır.

Hər il simpoziumun mövzu baxımından zənginləşdiyini söyləyən F.Əlizadə deyib ki, bu da özlüyündə musiqiyə, xüsusilə də muğamların tədqiq və təbliğinə olan böyük maraqdan irəli gəlir.

Tədbirdə mədəniyyət və turizm naziri Əbülfəs Qarayev bildirib ki, muğam keçmişlə bu gün arasında, Azərbaycan ilə dünya xalqlarının mədəniyyəti arasında mənəvi körpüdür. Təsadüfi deyildir ki, Azərbaycan muğamı 2003-cü ildə bəşəriyyətin şifahi və qeyri-maddi şah əsərləri siyahısına daxil edilib.

Milli Elmlər Akademiyası (AMEA) prezidenti, akademik Akif Əlizadə çıxış edərək Heydər Əliyev Mərkəzində "Muğam aləmi" IV Beynəlxalq Muğam Festivalının təntənəli açılış mərasiminin keçirildiyini xatırladıb. Akademik diqqətə çatdırıb ki, Azərbaycan xalqının musiqiyə, xüsusilə muğama olan sevgisi bütün dünyaya məlumdur. Muğamın UNESCO tərəfindən yüksək qiymətləndirilməsi, eyni zamanda, Azərbaycanın birinci xanımının onun inkişafına böyük töhfəsi bu gün artıq öz bəhrəsini verməkdədir.

Tədbirdə UNESCO-nun "Ənənəvi Musiqi üzrə Beynəlxalq Şura"sının (İCTM) baş katibi, Lyublyana Universitetinin professoru Svanibor Pettan tədbirin böyük əhəmiyyət daşıdığını söyləyərək şuranın fəaliyyətindən danışıb. Bildirib k, əsas məqsədi dünyada ənənəvi musiqinin təbliği ilə məşğul olmaq, onlar arasında əlaqə və təcrübə mübadiləsi aparmağa xidmət etməkdir.

Qonaq deyib ki, "Muğam/maqam və müasir musiqi yaradıcılığı" mövzusunda keçirilən simpoziuma 13 ölkədən 30-dan çox mütəxəssislər qatılıb. Onlar simpozium vasitəsilə təcrübələrini bir araya gətirirlər.

Qonaq deyib ki, bir neçə dildə çap edilmiş simpozium materialları hər bir iştirakçıya müzakirələrdə yaxından iştirak etmək imkanı yaradacaq.

Simpozium iştirakçılarını salamlamaqdan böyük qürur hissi duyduğunu söyləyən Prezident Administrasiyasının humanitar siyasət məsələləri şöbəsinin müdiri Fatma Abdullazadə muğam festivalının tarixi əhəmiyyətindən, bu festivalın Azərbaycan xalqına məxsus qədim və zəngin irsin daha geniş şəkildə tanınmasına xidmət etməsindən söz açıb.

Fatma Abdullazadə deyib ki, bu beynəlxalq festivalın keçirilməsi Azərbaycan üçün olduqca vacibdir: "Bu festival müxtəlif ölkələrdə elmlə, musiqi ilə məşğul olan alimlərə, mütəxəssislərə Bakıda muğam problemlərini müzakirə etmək imkanı yaradır. Ən önəmlisi isə odur ki, bu simpoziuma qatılanlar əsasən bilavasitə muğamı inkişaf etdirən, onunla məşğul olan insanlardır. AMEA-da muğamşünaslıq şöbəsinin yaradılması artıq əyani surətdə sübut edir ki, Azərbaycanda muğamşünaslıq doğurdan da yeni bir mərhələyə qədəm qoyur. Biz artıq təsvirlərdən, təsnifatdan, hansısa musiqi xadiminin, xanəndənin həyat və yaradıcılığı haqqında yazılanlardan muğam tədqiqatları istiqamətində tamamilə yeni bir mərhələyə keçirik. Bu mərhələnin əsas problemi ondan ibarətdir ki, Azərbaycan muğamı hədsiz dərəcədə zəngin olduğundan onu tədqiq etmək olduqca çətindir. Muğam irrasional sənətdir".

Bu gün Alim Qasımovun Qərbdə fenomenal ifaçı kimi qəbul olunduğunu söyləyən Fatma Abdullazadə bildirib ki, o ruha qida verməyi bacardığı, muğamın aliliyini, ülviliyini çatdıra bildiyi üçün onun ifaları dünyada belə rəğbətlə qarşılanır.

Simpoziumun açılış mərasiminə həsr edilmiş tədbirə yekun vuran Azərbaycan Milli Elmlər Akademiyası prezidenti, akademik Akif Əlizadə vurğulayıb ki, sorağı dünyanın ən müxtəlif guşələrindən gələn bu nəhəng mədəniyyət hadisəsi bizi daim qürurlandırır.

Sonra elmi simpozium öz işini bölmə iclaslarında davam etdirib.

Simpoziuma martın 14-də yekun vurulacaq.

S.ABDULLAYEVA

525-ci qəzet.- 2015.- 13 mart.- S 7.