Azərbaycan multikulturalizmi Litvada

Xəbər verdiyimiz kimi, Bakı Beynəlxalq Multikulturalizm Mərkəzinin layihəsi çərçivəsində "Azərbaycan multikulturalizmi" fənni yerli və xarici universitetlərdə tədris edilir. Litva Pedaqoji Universitetində "Azərbaycan multikulturalizmi" fənnini professor Rafael Həsənov tədris edir. Tədrisin gedişatı, tələbələrin dərsə göstərdiyi maraq və ümumiyyətlə, Rafael müəllimin Litvadakı fəaliyyəti ilə bağlı onun özü ilə söhbət etdik.

- Rafael müəllim, adamın qəfildən, müəyyən bir dövr üçün başqa ölkəyə köçməsi, yeni mədəniyyətə uyğunlaşması bir az çətin olur. Litvada barədə ilk təəssüratlarınız necədir?

- Əslində mən başqa yerlərdə yaşamağa öyrəşmişəm. İşimə görə bir neçə yerdə yaşamalı olmuşam. Yemək bişirmək və nəqliyyat vasitələrindən istifadə kimi problemlər yaşamıram. Mən artıq "köç həyatı" yaşayıram.

Amma yenə də Litvaya gəldiyim ilk günlərdə darıxırdım. Axırıncı dəfə Litvada Sovet dövründə olmuşdum, uzun müddət idi ki, bura gəlmirdim. Hava çox soyuq idi, Vilnüsu yaxşı tanımırdım. Lakin qısa müddətdən sonra öyrəşdim, burada azərbaycanlıları və litvalıları tanıdım. Gəldiyim gün məni "Azərbaycan multikulturalizmi" fənnini tədris edəcəyim universitetdən Loreta Çokiedze və Kestutis Şalaveyus qarşıladı və böyük diqqət göstərdilər. Buranın camaatı da çox qonaqpərvərdi, istiqanlıdı və başqa xalqlara qarşı hörmətcildi. Əvvəlcə Litvaya özüm tək gəldim. Bir aydan sonra isə ailə üzvlərim də gəldi yanıma, onlar da Litvanı çox sevdilər. Biz Azərbaycana həsr olunmuş tədbirlərdə, bayramlarda iştirak etməyə başladıq. Azərbaycanın Litvadakı səfirliyi bizim üçün dayaq nöqtəsi oldu.

- Dediniz ki, Litvanı axırıncı dəfə Sovet dövründə görmüşdünüz. Sizin gözünüzdə Litva necə dəyişib? Sizi burda nə təəccübləndirdi?

- Vilnüs çox gözəl, maraqlı, yaşıllığı bol və sakit şəhərdi. Keçmiş Sovetlər dövrünün ab-havası pozulmayıb, əhalinin çoxsu rusca bilir. Amma buna baxmayaraq, burada qərb sistemi də qurulub. Məsələn, təhsil sistemində. Yeni binalar tikilir, amma şəhər öz tarixiliyini qorumaqla, yeniliklərlə də bəzənir.

Vilnüsun nəqliyyat sistemi çox rahatdı. Burada avtobuslar və taksilər üçün ayrı xətlər var. İctimai nəqliyyatda tələbələr üçün xüsusi endirimlər edilir.

Buranın mətbəxi çox zəngin və dadlıdır. Amma yenə də gəldiyim ilk ay özüm yemək bişirirdim və milli yeməklərdən ötrü darıxırdım. Ailəm bura köçəndən sonra, evdə artıq səbzili aş, yarpaq dolması bişməyə başladı.

- "Azərbaycan multikulturalizmi" fənninin Litva Pedaqoji Universitetində tədrisinin səviyyəsi, dərsin aktuallığı və tələbələrin bu fənnə olan marağı sizi qane edirmi?

- "Azərbaycan multikulturalizmi" fənni Mərkəzinin layihəsi çərçivəsində artıq 7 xarici ölkə universitetində tədris edilir. Bunlardan biri də Litva Pedaqoji Universitetidir. Burada bu fənn Nizami Gəncəvi adına auditoriyada tədris edilir. Maraqlı mühazirələrimiz keçir. Mühazirələrdə müxtəlif ölkələrdən 20 tələbə iştirak edir. Dərslər interaktiv olur, dərsdə tələbələrin Azərbaycan multikulturalizmi, Bakı Beynəlxalq Multikulturalizm Mərkəzinin yaranması və fəaliyyəti, Azərbaycanda yaşayan etnik qruplar barədə məlumat verilir. Tələbələr Azərbaycanın multikulturalizmi, tarixi, mədəniyyəti ilə yaxından tanış olurlar. Hər dərsin sonunda tələbələr tərəfindən maraqlı suallar səslənir və müzakirələr aparılır.

Bu fənnin tədrisi Azərbaycan və Litvanın təhsil sahəsində olan münasibətlərinə müsbət təsir göstərir və əlaqələrini daha da gücləndirir.

- Sizin "Etnik müxtəliflik və Azərbaycan multikulturalizmi" adlı mühazirənizdə iştirak etdik və dərsin səviyyəli keçdiyinin şahidi olduq.

- Çox sağ olun, mən bu fənnin tədris edilməsinin ideya müəllifi, Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, akademik Kamal Abdullaya və Bakı Beynəlxalq Multikulturalizm Mərkəzinə öz dərin təşəkkürümü bildirirəm.

Firuzə ABBASOVA

525-ci qəzet.- 2015.- 7 may.- S.2.