İnsanlara şəfa vermək onun həyatının mənası idi

Böyük Vətən Müharibəsində faşizm üzərində qələbədən 70 il keçir. Faşizmə qarşı vuruşan insanların böyük əksəriyyəti dünyasını dəyişsələr də, daima qəlblərdə, könüllərdə yaşayırlar.

Belə igid insanlar sırasında tibb xidməti podpolkovniki Qədəmşah Sadıqov da var.

İnsanlara şəfa vermək, onları vaxtsız ölumdən xilas etmək Qədəmşah Sadıqovun həyatının mənası idi. Təsadüfi deyildir ki, o, özünə peşə seçəndə, məhz həkim olmaq istəyi ilə, Azərbaycan Dövlət Tibb İnstitutuna daxil olmağa üstünlük vermişdi. Adıçəkilən institutu müvəffəqiyyətlə bitirib diplom aldı. Çox keçmədi ki, dəhşətli bir xəbər qara bulud kimi aydın səmanı bürüdü. Müharibə! Sözsüz ki, bu xəbəri eşidərkən Qədəmşah, bir çox cəsarətli və vətənpərvər insanlar kimi, dərhal hərbi komissarlığa yollanaraq Vətənə öz xidmətini təklif etdi. O, 261-ci diviziyanın 974-cü atıcı polkuna təyinat aldı...

Ukrayna torpaqlarında gedən ağır döyüşlərdən birində polkun baş həkimi həlak oldu. Q.Sadıqov onun yerinə təyin edildi. Gənc həkim öz həyatını təhlükə altına qoyaraq, kəskin döyüşlər gedə-gedə yaralıları atəş adtında alov içərisindən çıxararaq təcili tibbi yardım göstərirdi. 974-cü atıcı polku artıq neçə gün idi ki, düşmən tank və piyadalarının hücumlarını dəf edirdi. Bu zaman batalyonun komandirinə hitlerçiləri geri oturtmaq əmri verildi. Rotalar bir-birinin ardınca düşmənin üzərinə hücuma keçdilər. Qədəmşah da həmin batalyonun tərkibində idi. Səhər açılanda məlum oldu ki, yeddi tank və bir rotanın əsgərləri məhv olub. Ertəsi gün döyüş daha da şiddətləndi. Atıcı batalyon daha çox itkiyə məruz qaldı, sırada bir nəfər də olsun komandir qalmamışdı. Qədəmşah tərəddüd etmədən batalyonun komandanlığını öz üzərinə götürərək, sağ qalmış əsgər və serjantları toplayıb döyüşə atıldı. Piyadalar misli görünməmiş cəsarət göstərərək düşməni 8 kilometr geriyə atdılar. Getdikcə itkilərin sayı artırdı, lakin diviziyanın əsas qüvvələri gələnədək mövqeyi əldən vermədilər.

Qədəmşah ayağından ağır yaralanmışdı, buna baxmayaraq, onu əvəz edən zabit gələnə kimi o, döyüşü davam etdirdi. Bu şücaətinə görə Q.Sadıqov “Qızıl Bayraq” ordeni ilə təltif edildi.

Onun cəbhə həyatında bu kimi hadisələr bir deyildi. Belqorod-Kursk ərazilərində gedən qızğın döyüşlərdə 32 nəfər yaralını ölümdən xilas etdiyi üçün “Qızıl Ulduz” ordeni ilə təltif edilmişdi.

Daha sonra gənc həkim Xarkov, Don və Volqa sahilləri, Smolensk, Belorusiya, Almaniya, Uzaq Şərq döyüşlərindən keçdi. Heç bir şəraitdə özünü itirmədən minlərlə yaralını qanlı döyüşlərdən çıxarıb ölümün pəncəsindən alırdı.

... Müharibədən sonra 24 yaşlı tibb xidməti mayoru Q.Sadıqov Azərbaycana qayıtdı. Onun sinəsini, hər biri bir qəhrəmanlığın tarixi olan, beş orden və on döyüş medalı bəzəyirdi. O, cəbhədə döyüşdüyü fədakarlıqla elm cəbhəsinə atıldı. Azərbaycan Dövlət Universitetinin aspiranturasını bitirdikdən sonra həmin Universitetdə müəllim, sonralar dosent, eyni zamanda Respublika Həkimlərin Təkmilləşdirilməsi İnstitutunda baş müəllim və tədris hissə müdiri vəzifələrində çalışdı.

Q.Sadıqovun elmi fəaliyyəti çoxşaxəli idi. Əvvəlcə fəlsəfə, sonradan tibb sahələrində namizədlik dissertasiyalarını müdafiə edərək, fəlsəfə və tibb elmləri namizədi alimlik dərəcələri aldı. Ali və orta ixtisas məktəbləri tələbələri bu gün də onun yazdığı “Məntiq” və “Etika” dərsliklərindən istifadə edirlər. Qədəmşahın fəlsəfə elmlər doktoru alimlik dərəcəsi almaq üçün yazdığı “Azərbaycanda məntiq nəzəriyyəsinin ünsürləri”, tibb elmlər doktoru alimlik dərəcəsi almaq üçün yazdığı “Əbu Əli İbn Sinanın tibb elmlərinə baxışı” əsərlərinin hər ikisi hazır olmasına baxmayaraq, amansız ölüm onun bu arzusunu qəlbində qoydu. Ömrünün 45 yaşında dünyasını dəyişdi...

Bu günlər qələbəmizin 70 illiyini qeyd edirik. Bu qələbə nəyin hesabına başa gəlib? Bu suala yalnız müharibəni keçmiş və onun dəhşətlərini yaşamış insanlar cavab verə bilərlər. Sözsüz ki, milyonların şəhid olduğu və digərlərinin qəhrəmanlığı hesabına başa gəlib.

Kim bilir, Qədəmşah Sadıqov və onun kimi qəhrəmanlar olmasaydı, xalqımız və ölkəmiz hansı vəziyyətdə olardı. Odur ki, müasirlərimiz onun kimi böyük insanları, onların dünyasını dəyişmələrinə baxmayaraq, daima yaşatmalı və yad etməlidirlər.

525-ci qəzet.- 2015.- 9 may.- S.31.