"Avropa Oyunları böyük əhəmiyyət kəsb edir"

"Birinci Avropa Oyunları gələcəkdə Azərbaycanla dünya ölkələri arasında daha sıx əlaqələrin qurulmasında böyük əhəmiyyət kəsb edir".

Bu barədə İqtisadi Resursların Öyrənilməsi Mərkəzinin sədri, iqtisadçı ekspert Ruslan Atakişiyev bildirib.

O, xatırladıb ki, birinci Avropa Oyunlarında 50-yə yaxın ölkə iştirak böyük nümayəndə heyətləri ilə iştirak edəcək:

"Üstəlik ölkəmizə çoxsaylı turistlər gələcək. İdman oyunları müxtəlif yayımlar vasitəsi ilə dünyaya göstəriləcək təbii ki, bütün bunlar həm də ölkəmizin tanıdılması üçün mühümdür".

Onun sözlərinə görə, birinci Avropa Oyunları ərəfəsində mötəbər tədbirlə bağlı olaraq xarici ölkələrin kütləvi informasiya vasitələrində video - çarxlar nümayiş etdirilir:

"Bu da Azərbaycanın dünya ölkələri arasında turizm baxımından da tanınmasına səbəb olacaq. Avropa Oyunları ilə əlaqədar olaraq Azərbaycanın dövlət qurumları və QHT-lər tərəfindən dünya ölkələrində Azərbaycanın tarixi, görməli yerləri, milli mətbəxi ilə bağlı müxtəlif materiallar, video - çarxlar göstərilir.

Təbii ki, oyunlar ərəfəsində də milli mətbəximizin bütün təamları qonaqlara təqdim olunacaq. Bu şəkildə bizi tanıyan insanların Azərbaycana səyahət etmək istəyi yaranacaq. Bu isə turizm sahəsinə öz töhfəsini verəcək".

Ekspert onu da qeyd edib ki, Azərbaycan tarixi İpək Yolu üzərində yerləşdiyindən tranzit ölkə kimi daha da populyarlaşacaq. Azərbaycana qarşı işadamlarının marağı artacaq:

"Ölkəmizin tarixi İpək Yolunun üzərində yerləşdiyini və bir çox faktları nəzərə alsaq, tranzit ölkə kimi Azərbaycanın iştirak etmək imkanı var. Ümumilikdə isə mövcud şəraitin yaradılması gələcəkdə işadamlarının Azərbaycana marağına səbəb ola bilər".

"Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz isə bildirib ki, artıq rəsmi qurumlar tərəfindən müəyyən açıqlamalar verilib ki, I Avropa Oyunları ilə bağlı ölkədə həm internet təchizatı, həm informasiya təhlükəsizliyi, həm də kiberhücumlardan qorunmaqla bağlı nəhəng bir infrastruktur yaranıb.

Onun sözlərinə görə, Avropa Oyunları ilə bağlı olaraq ölkə ərazisinə pulsuz internet təqdim ediləcək. Bu, daha çox Avropa Oyunları gedən ərazilərdə və ictimai yerlərdə təqdim edilə bilər:

"Bu yaxınlarda böyük bir konfrans keçirilən zaman bu sahəyə aidiyyatı olan qurumların bununla bağlı açıqlamaları oldu".

Ekspert qeyd edib ki, pulsuz internetin təşkili üçün "Wi-Fi" və fiberoptik internet texnologiyalarından istifadə oluna bilər:

"Hazırda ölkədə bununla bağlı böyük milli internet operatoru olan "Delta Telekom" şirkəti var. Bu şirkət artıq ölkəyə daxil olan trafiki I Avropa Oyunları ilə bağlı olaraq artırmağı nəzərdə tutub. İnternet təminatının həyata keçirilməsi üçün bütün tədbirlərin görüldüyü qeyd olunur. Yəqin ki, burada müxtəlif texnologiyalardan istifadə olunacaq. "Wi - Fi" texnologiyası , Fiberoptik internet və s. burada əsas rol oynayacaq. Yəni informasiya mübadiləsi üçün də geniş bir infrastruktur qurulub".

Ekspert Əlabbas Məhərrəmov isə deyib ki, Birinci Avropa Oyunlarının geri sayımında son otuz günün içindəyik:

"Şübhəsiz ki, çox sayda idman növləri ilə yarışların keçiriləcəyi bu geniş idman aksiyası 2015-ci ildə nəinki Avropa qitəsində, ümumiyyətlə, dünyada təşkil olunan ən nüfuzlu tədbirdir.

Əlamətdar haldır ki, Azərbaycan özünün ev sahibliyi edəcəyi bu nüfuzlu idman yarışlarının təşkilati işlərini yüksək səviyyədə həyata keçirib və birinci Avropa Oyunlarının təbliği çərçivəsində dünyanın bir çox ölkələrində effektli kampaniyalar aparır.

Razılaşaq ki, Azərbaycan vətəndaşı olaraq, birinci Avropa Oyunlarının daha geniş miqyasda tanıdılması üçün hər birimiz əlimizdən gələni etməliyik. Azərbaycanda bir neçə milyon internet istifadəçisinin, müxtəlif sosial şəbəkələrdə ("Facebook", "Twitter" və s.) qeydiyyatdan keçmiş yüz minlərlə insanın olduğunu, həmin şəxslərin dostluq siyahısına on minlərlə xarici ölkə vətəndaşının daxil edildiyini nəzərə alaraq belə bir təkliflə çıxış etmək istəyirəm.

Gəlin, bu gündən başlayaraq, Avropa Oyunları yekunlaşana qədər öz profil şəkillərimizi "Baku-2015" loqosu ilə əvəz edək və bununla da Azərbaycanın ev sahibliyi edəcəyi bu idman tədbirinin tanıdılmasına öz töhfəmizi verək. Bu təşəbbüsün sosial şəbəkə istifadəçiləri olan həmvətənlərimiz və xaricdəki dostlarımız tərəfindən geniş dəstək tapacağına inanıram".

PƏRVANƏ

525-ci qəzet.- 2015.- 15 may.- S.4.