İnsan haqları məsələsi siyasi alver predmeti kimi

AVROPARLAMENT ANTİ-AZƏRBAYCAN QÜVVƏLƏRİN BEYİN MƏRKƏZİ ROLUNDA ÇIXIŞ EDİR

“Qısa müddətdə görülmüş bu qədər işləri hətta ən çılğın arzularımızda belə təsəvvür edə bilməzdik. Əslində, bütün Bakı heyəti Avropa Oyunları başlamazdan öncə dünya rekorduna imza atıb” .

Patrik Hikki, Avropa Olimpiya Komitəsinin sədri

Azərbaycan növbəti dəfə “insan haqları” mövzusunu siyasi alver predmetinə çevirən xarici dairələrin qərəzli hücumları ilə üz-üzədir.

Gələn ay Bakıda keçiriləcək Birinci Avropa Oyunlarına kölgə salmaq məqsədi ilə Avropa Parlamentində bir qrup deputat tərəfindən dinləmələr keçirilib. Azərbaycanda insanların guya siyasi mövqelərinə görə həbs olunduğunu ortaya atan avroparlamentarilər əslində, onların tapşırıqları əsasında düşmənlə əlaqəyə girərək dövlətə xəyanət edən, Azərbaycan qanunvericiliyinin bir sıra maddələrini pozan, müxtəlif cinayət əməlləri törədən Leyla və Arif Yunus kimi daxili əlaltılarının müdafiəsinə qalxırlar.

Müzakirələrdə qəbul olunan qərarlar Avroparlamentin rəsmi mövqeyini əks etdirməsə də, təşkil olunan anti-təbliğat kampaniyasının iştirakçıları bu qurumun Brüsseldəki mənzil qərargahından öz məkrli niyyətlərini sərbəst şəkildə ictimailəşdirə bilirlər. Yəni, rəsmi şəkildə edə bilmədiklərini, qeyri-rəsmi yollarla, belə qeyri-etik hərəkətlərlə reallaşdırmağa çalışırlar.

Hələ bir ay bundan əvvəl də qondarma erməni soyqırımın 100 illik matəm tədbirləri ərəfəsində Avroparlament tərəfindən Türkiyə əleyhinə qətnamə qəbul ediləndən bir neçə gün sonra ortaya çıxan qurumun sədri Martin Şults həmin iclasda iştirak etmədiyini bəhanə gətirərək məsuliyyəti yaxasını kənara çəkməyə cəhd göstərmişdi. Avropa Parlamenti bu gün də həmin ssenari üzrə qarayaxma kampaniyalarını davam etdirir. Lakin müstəqil Azərbaycan dövləti və xalqı heç bir xarici qüvvə qarşısında əyilmədiyi kimi, çəkinmədən onların da cavabını vermək iqtidarındadır. Bəli, bu Avropa Parlamentinin növbəti məkrli oyunudur. Bu qurum ölkəmizə qarşı daim qərəzli, riyakar mövqeyi ilə seçilib və yenə də kirli fəaliyyətini davam etdirir.

Avroparlamentin bir qrup üzvü mötəbər idman tədbirinin Azərbaycanda keçirilməsinə qarşı çıxaraq bildirirlər ki, böyük idman turnirləriylə bağlı qərarlar verilərkən insan hüquqları məsələsi nəzərə alınmalıdır.

Qurumun insan haqları komitəsinin sədri, İspaniyadan olan deputat Yelena Valensiano deyir ki, bu və ya digər turnirə ev sahibliyi edəcək ölkə ilə bağlı qərarlarda insan haqlarının nəzərə alınmaması daha uzağa gedən xoşagəlməz nəticələrə səbəb ola bilər. Onlar iddia edirlər ki, guya Azərbaycan xarici jurnalistlərin ölkəyə gəlməsinə qadağa qoyur.

Əslində isə Avropa Oyunlarında iştirak etmək üçün 1500 xarici jurnalist qeydiyyatdan keçib və onlar oyunları Bakıda izləmək istəyən minlərlə əcnəbi vətəndaşlar kimi Azərbaycana maneəsiz olaraq, asanlıqla sadələşdirilmiş viza əldə edərək gələcəklər. Yəni, buradan aydın olur ki, Avropa Parlamenti məsələləri öz istədiyi kimi qələmə verir. Onlar Beynəlxalq Olimpiya Komitəsi və digər qurumlardan tələb edirlər ki, turnirlərlə bağlı qərarlar qəbul olunarkən insan haqları başlıca kriteriya olmalıdır. Avropa Parlamenti bununla açıq şəkildə idmanı siyasi alver predmetinə çevirmək istədiyini ortaya qoyur. Azərbaycan isə 2009-cu ildə Ermənistanda Cüdo üzrə Gənclər arasında Dünya Çempionatı keçirilərkən nə yarışlara getməkdən imtina edib, nə də tədbirin işğalçı dövlətdə təşkil olunmaması üçün hər hansı bir təbliğat aparıb. Bununla rəsmi Bakı idmanı siyasətlə qarışdırmadığını dünya ictimaiyyətinin diqqətinə çatdırıb.

Əksinə, idmançılarımız Qərbi Azərbaycan torpaqlarına yenidən qayıdaraq ermənilərin gözü önündə himnimizin müşayiəti ilə Azərbaycan bayrağını dalğalandırıblar. Yəni, biz Elmar Qasımovun timsalında düşmənimizə gücümüzü idman mübarizəsilə də bir daha sübut etmişik. Halbuki beynəlxalq hüquq normalarını kobud şəkildə pozan - Dağlıq Qarabağ torpaqlarını işğal edən, 1 milyondan artıq vətəndaşımızı qaçqın və məcburi köçkün həyatına sürükləyən, bununla bağlı BMT Təhlükəsizlik Şurasının qəbul etdiyi 4 qətnaməni yerinə yetirməyən Ermənistan mötəbər tədbirlərin keçirilməsi üçün ən axırıncı məkandır.

Əgər ermənipərəst avroparlamentarilərə Azərbaycanın üzləşdiyi haqsızlıqlar əhəmiyyətli deyilsə, o zaman işğalçı dövlətdəki real acınacaqlı vəziyyətə nəzər salsınlar: Serj Sarkisyan və komandası hakimiyyəti öz əlində saxlamaq üçün bu gün xalqa zülm edir, ölkənin xarabazara çevirir, ölkə səfalət içindədir, iqtisadiyyat gün-gündən daha da çökür, insanlar aclıqla mübarizə aparır, ev-eşiklərini satıb ölkəni birdəfəlik tərk edirlər. Azərbaycanda isə əksinə, əhalinin sürətli artımı müşahidə olunur. Anti-Azərbaycan qüvvələrinin dediyi kimi, ölkədə insan hüquqlarının vəziyyətində heç bir problem yoxdur.

Ölkəmizin əleyhinə ermənipərəst qüvvələr tərəfindən səsləndirilən fikirlərin hamısı şər və böhtandan ibarətdir. İnsanlar dini və etnik mənsubiyyətinə görə təqib olunmur, sərbəst toplaşma, azad şəkildə fikrini ifadə etmə haqqına sahibdirlər. Çünki əhalinin əksəriyyətini müsəlmanlar təşkil edən Azərbaycanın Konstitusiyasına əsasən ölkəmizdə dinindən asılı olmayaraq hər bir vətəndaş bərabər hüquqlara malikdir. Azərbaycan mədəniyyətlərarası, dinlərarası dialoqun təbliğində önəmli rol oynayır və bu dəyərlərin təşviqi üçün keçirilən bütün mötəbər tədbirlərə ev sahibliyi edir.

Təzyiqlərə məruz qalan təkcə Azərbaycan deyil

Qərb və Amerika dairələri təkcə Azərbaycana qarşı deyil, eyni zamanda, post-sovet məkanı və Yaxın Şərqdə sürətlə inkişaf edən bütün dövlətlərin ev sahibliyi etməyə hazırlaşdığı mötəbər tədbirlərə, xüsusilə idman yarışlarına kölgə salmaq üçün “peşəkarlıqla” məkrli fəaliyyətlərini davam etdirirlər. Hələ 2014-cü ildə Avropa Parlamentinin sabiq rəhbəri Yeji Buzekdən tutmuş, başqa dövlətlərin rəsmilərinə, beynəlxalq təşkilatlara qədər hər kəs insan hüquqları amilini süni şəkildə ortaya ataraq Hokkey üzrə Dünya Çempionatı üçün Minskin yanlış seçim olduğunu iddia eləməyə başlamışdılar. Hətta Beynəlxalq Buz Hokkeyi Federasiyasına evsahibliyi hüququnun Belarusdan alınması üçün təzyiqlər də edilmişdı.

2012-ci ildə isə paytaxt Bakı “Avroviziya” mahnı müsabiqəsinə hazırlaşarkən xarici dairələr avropalıların tədbirlərə qatılmaqdan imtina etməsi üçün Azərbaycanın imicinə zərbə vurmağa başlamışdılar. İnsan hüquq və azadlıqları sarıdan Azərbaycanı problemli ölkə kimi təqdim edən belə qurumlar tədbirin başlamadan bitməsi üçün dəridən-qabıqdan çıxırdılar. Amma onların arzuları gözündə qaldı və mahnı müsabiqəsi yüksək səviyyədə təşkil olundu, ölkəmiz “Avroviziya” mahnı yarışmasını uğurla təşkil edərək qonaqlara xoş xatirəyə çevriləcək maraqlı anlar yaşatdı.

Bundan əlavə. 2014-cü ildə keçirilən Qış Olimpiya Oyunları və Futbol üzrə Dünya Çempionatları ərəfəsində də ardıcılı olaraq Rusiya və Braziliya da eyni aqibətlə üz-üzə idi. Hər iki ölkə beynəlxalq dairələrin təzyiqlərinə məruz qaldılar, fundamental dəyərlərin pozulduğu ölkələr kimi təqdim olundular. Nəticədə isə bütün təzyiqlərə rəğmən bu yarışlar da uğurla təşkil olundu, Rusiya və Braziliya iqtisadiyyatı idman və turizm sektorundan əldə olunan vəsaitlərlə daha da zənginləşdi.

“Demokratiya” pərdəsinə bürünən anti-Azərbaycan qüvvələri

Bu dəfə isə hədəfdə Azərbaycan və Bakı 2015 Birinci Avropa Oyunlarıdır. Azərbaycan 3 ildən də az bir vaxtda, söz verdiyi kimi, hazırlıqları tamamlayaraq olimpiya məşəlinin Bakıya çatacağı günü gözləyir.

Təsadüfi deyil ki, Avropa Olimpiya Komitəsinin sədri Patrik Hikki Avropa Oyunları məşəlinin alovlandırılması mərasimindəki çıxışında bildirdi ki, Təşkilat Komitəsi və “Bakı-2015” ilk Avropa Oyunları Əməliyyat Komitəsinin peşəkar heyəti planlarımızı reallığa çevirmək üçün 27 ay ərzində yorulmadan çalışıblar: “Belə qısa müddət ərzində görülmüş bu qədər işləri hətta ən çılğın arzularımızda təsəvvür edə bilməzdik. Əslində bütün Bakı heyəti Avropa Oyunları başlamazdan öncə dünya rekorduna imza atıb”.

Lakin Azərbaycanın qazandığı uğurları, əldə etdiyi nailiyyətləri həzm edə bilməyən qüvvələr anti-Azərbaycan kampaniyası hazırlayaraq sistemli şəkildə fəaliyyətlərini davam etdirirlər. Niyə? Nə üçün? Məgər Azərbaycanın problemləri onları çoxmu narahat edir? Elə isə heç olmasa bir dəfə Ermənistanın Azərbaycana təcavüzü nəticəsində doğma torpaqlarından - Dağlıq Qarabağdan didərgin düşən 1 milyondan çox qaçqın və məcburi köçkünümüzün pozulan hüquqlarının bərpası zəruriliyini dilə gətirsinlər.

Reallıq isə budur ki, tarix boyu avropalılar özlərinin yaratdığı beynəlxalq qanunlara hörmətlə yanaşmayıb, hər zaman dini və etnik amildən vasitə kimi istifadə edərək məkrli niyyətlərini həyata keçirməyə çalışıblar.

Hələ 1963-cü ildə Qərbin müstəmləkə siyasətindən qurtularaq müstəqilliyini elan edən Kenya dövlətinin qurucusu, dövlət başçısı Como Kenyatta belə bir fikir söyləmişdi: “Avropalılar bizim yerlərə gələndə onların “İncil”i, bizim isə torpaqlarımız vardı. Onlar gələn kimi bizə gözlərimizi yumub dua etməyi öyrətdilər.

Gözlərimizi açanda bir də gördük ki, “İncil” bizim, torpaqlarımız isə onların əlindədir”.

Bu, Qərbin əsl iç üzüdür. Onlar bu gün də müstəqil dövlətləri “demokratiya” və “din” pərdəsi altında terror yuvasına, qarşıdurma məkanına çevirməyə davam edirlər. Diqqət yetirsək, “Ərəb baharı” şüarı ilə İraqa, Misirə, Liviyaya, Suriyaya və Yəmənə hücum edən avropalılar bu dövlətləri yalnız xarabalığa çevirə bildilər.

İndi isə digər dövlətləri, o cümlədən, Azərbaycanı uçuruma sürükləməyə çalışırlar. Lakin onların bu istəkləri həyata keçməyəcək. Azərbaycan dövləti və xalqı ağı- qaradan ayırmağı yaxşı bacarır. Biz həm dövlət, həm də cəmiyyət olaraq bu qarayaxma kampaniyalarına səssiz qalmayacağıq.

Avropa Oyunları Azərbaycanın böyük uğurudur. Hər ölkəyə belə bir etimad göstərilmir və hər dövlətin böyük yarışlara ev sahibliyi etmək potensialı və təcrübəsi yoxdur. Azərbaycan gənc ölkə kimi belə bir möhtəşəm tədbirə ev sahibliyi edir. Təsadüfi deyil ki, ölkəmizə qarşı aparılan təbliğat illər boyu anti-Azərbaycan fəaliyyətlə fərqlənən Avropa Parlamentinin bəzi üzvləri tərəfindən təşkil olunur.

Deməli, bu qarayaxma kampaniyasına bir mərkəzdən rəhbərlik edilir. Ölkəmizə qarşı qərəzli münasibətin ən mühüm səbəbi odur ki, Azərbaycan başqa ölkələrdən fərqli olaraq müstəqil siyasət aparır. Bu da bəzi dövlətlərin siyasi-iqtisadi maraqları ilə üst-üstə düşmür. Bu baxımdan, belə bir təsəvvür formalaşır ki, əgər anti-Azərbaycan kampaniyasının Amerika blokuna dövlət katibi Con Kerrinin rəhbərlik etməsi sübut olunubsa, Qərb blokuna da Avropa Parlamentinin sədri Martin Şultsun başçılıq etdiyinə şübhə yeri qalmır.

Artıq bir neçə ildir ki, Avropadan ölkəmizə qarşı istiqamətlənən təzyiqlərin mərkəzində Martin Şults amili özünü göstərir. O dəfələrlə rəhbərlik etdiyi qurumun plenar iclaslarında Azərbaycanın əleyhinə böhtanlar yağdırıb, yol verdikləri qanun pozuntularına görə həbs olunan vətən xainlərini müdafiə edib. Halbuki indiyədək bir dəfə də olsun Şultsun Ermənistanın Dağlıq Qarabağı işğal etdiyinə, azərbaycanlılara qarşı erməni silahlı birləşmələrinin terror və soyqırım aktları törətdiyinə dair hər hansı fikrini kimsə eşitməyib.

Eyni zamanda, Avropada hər gün hüquqları tapdanan milyonlarla müsəlmanın diskriminasiyaya məruz qalması Avropa Parlamentinin prezidentini qətiyyən narahat etmir.

Həyata keçirilən təzyiqlərə, tətbiq olunan ikili standartlara baxmayaraq Azərbaycanın ildən-ilə artan nüfuzu, beynəlxalq siyasi proseslərdə aktiv iştirakı, iqtisadi gücü, regionda lider ölkəyə çevrilməsi artıq öz müsbət nəticələrini verir. İlk Avropa Oyunlarının təşkilinin Azərbaycana etibar edilməsi də ölkəmizin təkcə idman sahəsində deyil, siyasi-iqtisadi müstəvidə, diplomatik arenada nüfuzunun Avropa və dünya tərəfindən qəbul edildiyinin göstəricisidir. Beynəlxalq idman tədbirlərinin keçirilməsi sahəsində Azərbaycanın artıq kifayət qədər böyük təcrübəsi var. Avropa Oyunları ilə bağlı ölkəmizə gələcək xarici qonaqların qəbul edilməsi üçün Azərbaycanın infrastrukturu, idman arenaları artıq tam şəkildə hazırdır.

Turistləri qəbul etmək üçün hazırlıq işləri təkcə paytaxt Bakıda deyil, eyni zamanda regionlarda da həyata keçirilir. Bakıya və ölkəmizin əyalətlərinə səfər edən əcnəbi qonaqlar buradakı inkişafdan, göstərilən xidmətdən, təbiətimizin gözəlliyindən rəğbətlə hər zaman danışırlar. Artıq Oyunlara sayılı günlərin qalması ilə əlaqədar ölkəmizə turist axını başlayıb. İnanırıq ki, Bakı 2015 Birinci Avropa Oyunlarının qonaqları da Azərbaycandakı inkişafı öz gözləri ilə görüb, müsbət qiymətlərini verəcəklər. Avropa Oyunlarının gətirəcəyi ən böyük dividend isə Azərbaycanın uğurlarının dünyada daha geniş təbliği, dövlət kimi nüfuzunun, güc və qüdrətinin, beynəlxalq etibarının daha da möhkəmlənməsi olacaq.

İbrahimov Hacı

525-ci qəzet.- 2015.- 16 may.- S.9.