Xalq şairi Rəsul Rza yad edilib

Mayın 19-da XX əsr Azərbaycan ədəbiyyatının görkəmli nümayəndələrindən biri - Xalq şairi Rəsul Rzanın anadan olmasının 105 illiyi ilə əlaqədar böyük şairin xatirəsi ehtiramla yad edilib.

Şairin Fəxri Xiyabandakı məzarı ziyarət olunub, abidə önünə tər çiçəklər düzülüb.

AYB.az-ın məlumatına görə, anım günü ilə əlaqədar, Xalq şairinin adını daşıyan Beynəlxalq Ədəbiyyat Fondu Rəsul Rza Beynəlxalq mükafatının təqdimatını gerçəkləşdirib.

Bununla bağlı tədbiri giriş sözü ilə Azərbaycan Yazıçılar Birliyinin I katibi, Rəsul Rza adına Beynəlxalq Ədəbiyyat Fondunun sədri, Xalq şairi Fikrət Qoca açaraq tədbir iştirakçılarını salamlayıb.

F.Qoca XX əsr Azərbaycan ədəbiyyatının görkəmli nümayəndəsi Rəsul Rzanın yaradıcılığı haqqında danışıb, mükafatla bağlı tədbir iştirakçılarına geniş məlumat verib. Daha sonra mükafat alan şəxslər elan olunub.

Azərbaycan Yazıçılar Birliyinin üzvü, filologiya üzrə elmlər doktoru Buludxan Xəlilov, Bədii Tərcümə və Ədəbi Əlaqələr Mərkəzinin rəhbəri, şair Səlim Babullaoğlu, şair, jurnalist Zərəngiz Dəmirçi Qayalı, şair İnqilab İsaq, gənc yazıçı Şahanə Şükür və şair Qədiməli Əhməd Rəsul Rza Beynəlxalq mükafatına layiq görülüb.

Mükafat alan ədiblər öz sevinclərini tədbir iştirakçıları ilə bölüşüblər və bu mükafata layiq görüldükləri üçün Rəsul Rza adına Beynəlxalq Ədəbiyyat Fonduna, Fondun sədri, Xalq şairi Fikrət Qocaya, Azərbaycan Yazıçılar Birliyinin sədri, Xalq yazıçısı Anara minnətdarlıqlarını bildiriblər. Rəsul Rzanın yaradıcılığından söz açan mükafatçılar görkəmli şairin, ilk növbədə, poeziyada özünəməxsus məktəb yaratdığını vurğulayıblar.

Sonda Azərbaycan Yazıçılar Birliyinin sədri, Xalq yazıçısı Anar mükafat alan ədibləri təbrik edib: "Hər birinizi təbrik edirəm, öz adımdan, ailəmizin adından, Rəsul Rza yaradıcılığına göstərdiyiniz diqqət üçün minnətdarlığımı bildirirəm".

525-ci qəzet.- 2015.- 20 may.- S.7.