Əlibaba Abdullayevin 100 illiyi qeyd olunacaq

Noyabrın 12-də Bakı Xoreoqrafiya Akademiyasında peşəkar rəqqas, Xalq artisti Əlibaba Abdullayevin 100 illik yubileyinə həsr olunmuş elmi-praktiki seminar keçiriləcək.

Seminarda Bakı Xoreoqrafiya Akademiyasının rektoru, professor Timurçin Əfəndiyev, milli rəqslər kafedrasının müdiri, Əməkdar artist Sənan Hüseynli ustad sənətkarın həyat və yaradıcılığı, rəqs sənətinə bəxş etdiyi töhfələr haqqında çıxış edəcəklər. Xalq artistinin ailə üzvlərinin də iştirak edəcəyi tədbirdə “Naz eləmə” rəqsinin videosu nümayiş olunacaq və tələbələrinin xatirələri dinləniləcək.

Tədbirdə Əlibaba Abdullayevin quruluş verdiyi rəqslər ifa ediləcək.

Qeyd edək ki, Əlibaba Abdullayev 1915-ci ildə Bakıda anadan olub. Azərbaycan Dövlət Filarmoniyası Rəqs Ansamblının, Mahnı və Rəqs Ansamblının bədii rəhbəri olub. Musiqili Komediya Teatrında yüksək kateqoriyalı aktyor kimi çalışıb. 1957-ci ildə Moskvada Tələbə və Gənclərin 6-cı Ümumdünya Festivalında qızıl medala layiq görülüb. “Nəlbəki” və “Vağzalı” rəqslərinin ilk quruluşu Əlibaba Abdullayevə məxsusdur.

S.ABDULLAYEVA

525-ci qəzet.- 2015.- 7 noyabr.- S.16