Tolerantlıq günü ilə bağlı tədbir keçirildi

“Azərbaycanda tolerantlıq və multikulturalizm dövlət siyasətinin ayrılmaz hissəsidir” mövzusunda seminar-treninq keçirilib.

Dini Qurumlarla İş üzrə Dövlət Komitəsindən (DQİDK) 525.az-a verilən məlumata görə, dünən komitənin Masallı bölgəsi üzrə şöbəsi və Masallı Rayon İcra Hakimiyyətinin birgə təşkilatçılığı ilə “16 noyabr-Tolerantlıq günü”nə həsr edilmiş “Azərbaycanda tolerantlıq və multikulturalizm dövlət siyasətinin ayrılmaz hissəsidir” mövzusunda seminar-treninq keçirilib.

Tədbirdə Dövlət Komitəsinin Masallı bölgəsi üzrə şöbəsinin müdiri Miryəhya Bədirov, Masallı Rayon İcra Hakimiyyətinin məsul işçisi Qəşəm Hadıyev, Qafqaz Müsəlmanları İdarəsinin bölgə qazısı Mirqiyas Təhməzov, Masallı Rayon Gənclər və İdman İdarəsinin rəisi Camal Manafov, rayonun dini icma sədrləri, təhsil işçiləri və gənclər iştirak edib.

DQİDK-nın Masallı bölgəsi üzrə şöbəsinin müdiri Miryəhya Bədirov tolerantlıq ənənələrinin Azərbaycan xalqının mənəviyyat və sülhsevərliyindən qaynaqlandığından, tolerantlığın dövlət siyasətinin əsas tərkib hissəsini təşkil etdiyindən danışıb.

Daha sonra Qafqaz Müsəlmanları İdarəsinin bölgə qazısı Mirqiyas Təhməzov, Masallı Rayon İcra Hakimiyyətinin məsul işçisi Qəşəm Hadıyev, Masallı Rayon Gənclər və İdman İdarəsinin rəisi Camal Manafov, Ərəb kənd məscidi dini icmasının sədri Əliman Hüseynov və başqaları çıxış edərək Azərbaycan xalqının tolerantlıq ənənələrindən danışaraq, dövlətimizin bu ənənələrə verdiyi önəmi vurğulayıblar.

Sonda “Tolerantlıq günü” mövzusunda təşkil edilmiş kitab sərgisi nümayiş etdirilib və tədbir iştirakçılarına Dövlət Komitəsi tərəfindən dini maarifləndirmə məqsədi ilə ədəbiyyat paylanılıb.

525-ci qəzet.- 2015.- 18 noyabr.- S.2.