G20 sammiti: Azərbaycan dünyanın lider dövlətləri ilə bir sırada

BEYNƏLXALQ TERRORİZMLƏ MÜBARİZƏDƏ AZƏRBAYCANIN ROLU

Azərbaycan müstəqilliyini bərpa etdikdən sonra bir sıra beynəlxalq təşkilatlara - Birləşmiş Millətlər Təşkilatı, Avropa Təhlükəsizlik və Əməkdaşlıq Təşkilatı, Avropa Şurası, Avropa Parlamenti, İslam Əməkdaşlıq Təşkilatı, Müstəqil Dövlətlər Birliyi və digər mötəbər qurumlara üzv olub.

Bununla yanaşı dövlətimiz Avropa İttifaqı, NATO kimi nüfuzlu beynəlxalq təşkilatlar, ayrı-ayrı dövlətlərlə əməkdaşlığını davam etdirir, qlobal forum və sammitlərə dəvət alır, hətta müxtəlif sahələri əhatə edən beynəlxalq tədbirlərə ev sahibliyi edir. Bütün bunlar Azərbaycanın dünya arenasında qazandığı böyük nüfuz, formalaşdırdığı etibarlı tərəfdaş imicindən xəbər verir.

Dövlətimiz sürətlə inkişaf edir, qlobal əhəmiyyətli layihələrə imza atır. Əlbəttə, Azərbaycanın qazandığı bu uğurlar dünyada birmənalı qarşılanmır, həsəd, paxıllıq və gözügötürməzlikdən irəli gələn isterikalara da səbəb olur. Ona görə də, vaxtaşırı olaraq dövlətimizə qarşı qarayaxma kampaniyaları təşkil olunur, təzyiq alətləri işə salınır. Məqsəd Azərbaycanın müstəqil siyasət yeritməsinə, mütərəqqi layihələrə imza atmasına mane olmaq, onu nüfuzdan salmaqdır. Lakin qərəzli dairələr istənilən halda uğursuzluğa məhkumdur. Çünki yersiz qəzəb və hikkə ilə davranan həm də özünə qarşı silah işlətmiş kimidir. Ölkəmiz isə inkişaf yolunda inamla zirvələri fəth etməyə, yeni dünya standartları yaratmağa doğru addımlayır. Elə Birinci Avropa Oyunlarında olduğu kimi. Bəzi xarici dairələrin bütün cəhdlərinə baxmayaraq biz bu uğura imza atdıq, köhnə qitənin tarixində yeni, şanlı səhifələr açdıq. Bununla Azərbaycan dünyaya dostluğu, sülhü təqdim etdi. Bütün bəşəriyyət ölkəmizin gözəlliyi, xalqımızın qonaqpərvərliyindən danışdı. Ancaq bu, məlum çevrələrin dünya ictimaiyyətinə təqdim etməyə çalışdığı irqi, dini ayrıseçkiliyə yol verən, insan hüquqlarını tapdalayan Azərbaycan deyildi. Son dərəcə tolerant, multikultural Azərbaycan idi. Şübhəsiz ki, bütün bunlar bizi zirvəyə doğru aparmalı idi.

Prezident İlham Əliyevdən dünya liderlərinə vacib mesajlar

Azərbaycan müstəqilliyinin 24-cü ilində dünyanın böyük iyirmiliyi sırasında özünə yer etməyə nail oldu. Qardaş Türkiyədə təşkil olunan “Böyük İyirmilik” (G20) ölkələrinin zirvə görüşündə xüsusi qonaq qismində ölkəmizin başçısına dəvət göndərildi. Əlbəttə, bu, dəvət qardaş ölkənin səmimiyyətindən irəli gəlirdi. Lakin Azərbaycanın sammitdə iştirakına zərurətin də olduğunu heç kəs inkar edə bilməz. Dövlətimizin son dövrlər istər regional, istərsə də qlobal inkişaf, təhlükəsizlik sahəsində oynadığı rol bizi pillə-pillə yüksəklərə qaldırdı. Nəhayət, Azərbaycan Prezidenti İlham Əliyev dünya liderlərinin sammitində ali tribunaya qalxaraq beynəlxalq ictimaiyyətə səsləndi, onlara vacib mesajlar verdi, həqiqi Azərbaycanı dünyaya bir daha təqdim etdi.

Tədbirin gündəmindəki əsas mövzular qlobal maliyyə-iqtisadi böhranının fəsadlarının aradan qaldırılması və ən optimal bərpa variantlarının seçilməsi, iqtisadi dayanıqlığın gücləndirilməsi, habelə “qaynar bölgə”lərdə stabilliyin bərpası olsa da, sammit ərəfəsində - noyabrın 13-də Fransanın paytaxtı Parisdə baş verən terror aktları ilə əlaqədar zirvə görüşünün böyük ölçüdə terrorla mübarizəyə həsr olunacağı gözlənilən idi. Bu mənada, Prezident İlham Əliyev ali tribunadan çıxış edərək 20 ildən artıqdır xalqımızın erməni terrorundan əziyyət çəkdiyini, torpaqlarımızın 20 faizinin Ermənistan tərəfindən işğal edildiyini dünya ictimaiyyətinin diqqətinə çatdırdı, terrorçuların vətəni, dini və irqi olmadığını, terrorizmin insanlığa, bəşəriyyətə qarşı çevrilmiş cinayət olduğunu bir daha ortaya qoydu.

Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Azərbaycanın “Böyük İyirmilik” sammitində iştirakının bir neçə prizmadan əhəmiyyətli hadisə olduğunu bildirib.

Onun sözlərinə görə, Azərbaycan Prezidenti İlham Əliyevin sammitdə iştirakına Türk və İslam dünyası kontekstində yanaşmaq lazımdır: “İlham Əliyev dünya liderləri arasında kifayət qədər nüfuza malik olan şəxsdir. Bu mənada, İslam dünyasında ziddiyyətli proseslərin getdiyini nəzərə alsaq, qeyd etmək lazımdır ki, dünya liderləri burada baş verən hadisələri bəzən səhv başa düşürlər. Ona görə də, Azərbaycan Prezidentinin ayrı-ayrılıqda aparıcı dövlət başçıları ilə təkbətək danışıqlarda baş verən hadisələrlə bağlı bildirdiyi əsaslı fikirlər ümumilikdə İslam dünyasının xeyrinədir”.

Politoloq deyib ki, Azərbaycan türk-müsəlman dövləti olsa da, tolerantlıq, multikulturalizm kimi ali dəyərlərə sahib ölkədir: “Tolerantlıq və multikulturalizm sahəsində islahatlar Azərbaycanda dövlət siyasiti səviyyəsində aparılır. Yəni. Bu kontekstdə İlham Əliyevin ayrı-ayrı dövlət başçıları ilə apardığı söhbətlər bütün müsəlman dünyası üçün faydalıdır”.

M.Əhmədoğlu qeyd edib ki, dövlət başçısı Azərbaycanın hazırkı potensialı və gələcək inkişaf perspektivləri barədə çox aydın tezislər ortaya qoyub: “Prezident qlobal problemlərin, xüsusilə maliyyə böhranının hökm sürdüyü dünyada Azərbaycanın rəqabət qabiliyyətini itirmədiyini, rəqabətə dözümlü dövlət olduğunu ortaya qoyub”.

Mərkəz sədri söyləyib ki, bu gün Qərb liderləri İslam dünyasına terrorçu gözü ilə baxırlar. O bildirib ki, buna görə də, dünya liderləri sırasında ciddi nüfuza malik olan Azərbaycan Prezidentinin sammitdə bu məsələlərə toxunması bir çox ziddiyyətlərə aydınlıq gətirib: “Dövlət başçısının İslam ölkələrində terror hadisələri yayılmamışdan qabaq terrorizmin mərkəzlərindən birinin Ermənistan olduğunu diqqətə çatdırması bütün qaranlıq mətləblərə aydınlıq gətirmək gücündədir. Bu gün Avropanın terrorizmlə mübarizəyə qeyri-ciddi münasibəti elə Qərbin özünü də təhdid altında qoyur. Əgər Avropa Azərbaycanın Dağlıq Qarabağ ərazisində Ermənistan tərəfindən törədilən terror hadisələrinə ciddi reaksiya versəydi, bəlkə də dünyada terror bu qədər yayğınlaşmazdı. Fransada Türkiyə səfirliyini partladan neçə terrorçu var ki, on-on beş il həbsdə yatandan sonra rəsmi Paris tərəfindən əfv olunub. Fransada türk diplomatların terrorçular tərəfindən qətlə yetirilməsindən başlanan yol bu gün fransız xalqına qarşı çevrilib”.

Qərbdən insanlıq əleyhinə törədilən cinayətlərə qeyri-insani yanaşma

Fransada baş verən son terror hadisələrindən söz düşmüşkən, qeyd edək ki, bu qanlı hadisə dünya birliyi tərəfindən kəskin qınaqla qarşılanıb. Beynəlxalq birlik birmənalı mövqe ortaya qoyaraq, Fransada həyata keçirilən terror hücumlarını insanlığa qarşı çevrilmiş cinayət adlandırıb.

Əfsuslar olsun ki, ayrı-ayrı coğrafiyalarda baş verən oxşar proseslərə müxtəlif yanaşma sərgiləyən dünya güclərinin qətiyyətli mövqeyini demək olar ki, hər gün Suriya, İraq və digər müsəlman ölkələrində baş verən böyükmiqyaslı terror faciələrində, Azərbaycan torpaqlarını işğal etmiş Ermənistan və onun terror şəbəkələrinə yanaşmada görə bilmirik. Bu, insanlıq əleyhinə törədilən cinayətlərə qeyri-insani yanaşma deyilsə, bəs nədir?

Millət vəkili Sahib Alıyev deyib ki, separatçı və terrorçuların yaxşısı olmur. Onun sözlərinə görə, Qərbdə erməni separatizmi və terrorçularına məhz bu cür yanaşan çevrələrin olduğu heç kimə sirr deyil: “Böyük dövlətlərin separatçı və terrorçulardan öz məqsədləri naminə faydalanmaq istəyi qaldıqca, terrorizmin qarşısını kəsmək mümkün olmayacaq. Paris olayları bir daha təsdiqləyir ki, bu cür məsələlərdə ikili standartlara yol vermək necə arzuolunmaz nəticələrə gətirib çıxara bilər”.

Azərbaycanın artıq 30 ilə yaxındır erməni terroru ilə üz-üzə dayandığını deyən Yeni Azərbaycan Partiyasının Siyasi Təhlil və Proqnozlaşdırma şöbəsinin müdiri, millət vəkili Aydın Mirzəzadə isə bildirib ki, Fransanın paytaxtı Parisdə baş verən dəhşətli terror hadisələri hər bir insanı sarsıdıb: “Dinc sakinlərin kimlərinsə insanlıqdan kənar planlarının qurbanı olması çox böyük faciədir. Paris hadisələri bir daha terrorizmə qarşı mübarizənin gücləndirilməsinin vacibliyini göstərib. Dövlətlər bu istiqamətdə səylərini birləşdirməli, terrorçulara və onlara şərait yaradanlara qarşı birgə mübarizə aparmalıdır”.

Beynəlxalq terrorizmlə mübarizədə Azərbaycanın rolu

Azərbaycan terrorizmlə mübarizəyə dəstək verən - Əfqanıstanda koalisiya qüvvələrinin işinə qoşulan, eyni zamanda, terrora məruz qalan ilk dövlətlərdən biridir. Torpaqlarımızı zəbt edən işğalçı Ermənistanın Azərbaycana qarşı terror siyasəti bu gün də davam edir. Ermənistan azərbaycanlılara qarşı soyqırım, etnik təmizləmə siyasəti ilə yanaşı işğal prosesini də həyata keçirərkən çoxsaylı terror aksiyalarından da istifadə edib. Azərbaycanda törədilən terror aktları nəticəsində iki mindən çox vətəndaşımız öldürülüb. Dövlət səviyyəsində terrorizm və soyqırım siyasəti yeridən Ermənistan 1988-1994-cü illərdə müxtəlif səpkili - sərnişin avtobusları, yük qatarları, Bakı Metropoliteni, hava nəqliyyatı, sərnişindaşıyan gəmilərdə ümumilikdə 373 terror aktı həyata keçirib. Bunun nəticəsində iki mindən çox insan həlak olub, 1705 nəfər isə ağır xəsarətlər alıb. Ermənistan Azərbaycanda təkcə 40-a yaxın irimiqyaslı terror aktı törədib. Ümumilikdə, Ermənistanın Azərbaycan torpaqlarını işğal etməsi nəticəsində iyirmi mindən çox vətəndaşımız öldürülüb, yüz mindən çoxu yaralanıb, əlli mindən çox isə əlil olub.

Bütün bu həqiqətləri sammit iştirakçılarının diqqətinə çatdıran dövlət başçısı Ermənistanın işğalçılıq, terror siyasətinin bu gün də davam etdiyini dünya ictimaiyyətinə bəyan edib. Prezident Ermənistanın terror təşkilatları tərəfindən Azərbaycana qarşı həyata keçirilən hücumları işğalçı ölkənin dövlət siyasətinin tərkib hissəsi kimi qiymətləndirib. İlham Əliyev bu təcavüzün nəticəsində iyirmi ildən artıqdır Azərbaycan torpaqlarının iyirmi faizinin işğal altında olduğunu qeyd edib. Bundan başqa, dövlət başçısı Ermənistanın beynəlxalq təşkilatların qəbul etdiyi sənədlərə məhəl qoymadığını dünyanın aparıcı dövlətlərinin liderlərinin diqqətinə çatdırıb, terror siyasəti aparan bu, dövlətin yürütdüyü məkrli siyasətin qarşısı alınmazsa digər münaqişə ocaqlarının da yarana biləcəyini istisna etməyib.

Göründüyü kimi, hədəf məlum olsa da, oxu yaydan ayırmağa çalışanlar da var. Yalnız, bir həqiqət var: Yaxın və Orta Şərq, Şimali Afrika, eləcə də Azərbaycanda törədilən terror aktları Qərbdəkindən heç nə ilə fərqlənmir. Bütün hallarda məhv olan insanlıq və bəşəriyyətdır. Məhz Prezidentimiz də G20 sammitində dünya liderlərinin diqqətini bu məqama çəkdi: heç bir halda terror və separatizmə meydan tanımaq, bunu din və milliyyətlə bağlamaq olmaz. Bütün dünya terrora qarşı barışmaz mövqedə olmalıdır. Terroru yaradan və ona himayə duranlar isə törədilən cinayətlərə görə cavab verməlidir.

Ceyhun ABASOV

525-ci qəzet.- 2015.- 21 noyabr.- S.15