Milli Dram Teatrında Vəfa Fətullayeva anılıb

Dövlət Akademik Milli Dram Teatrında Əməkdar artist, unudulmaz sənətkar Vəfa Fətullayevanın 70 illiyi münasibətilə tədbir keçirilib.

Tədbirdə əvvəlcə sənətkarın xatirəsinə həsr edilmiş videoçarx nümayiş olunub.

Teatr Xadimləri İttifaqının sədri, teatrın bədii rəhbəri və baş rejissoru, Xalq artisti Azərpaşa Nemətov çıxış edərək əməkdar artistin həyat və yaradıcılığından söz açıb. A.Nemətov sənətkarın professional səhnə məharətindən, Azərbaycan mədəniyyətinə bəxş etdiyi novatorluq qabiliyyətindən, əzmkar istedadından bəhs edərək qeyd edib ki, qısa ömür yaşamasına baxmayaraq Vəfa Fətullayevanın səhnə və teatr üçün yorulmaz xidmətləri olub.

Bildirilib ki, Dövlət mükafatı laureatı olan aktrisa 1945-ci il avqustun 25-də Bakıda anadan olub. 1970-ci ildən Dövlət Akademik Milli Dram Teatrında çalışıb. İlk dəfə uşaq olarkən çıxdığı doğma səhnəyə ömrünün sonunadək sadiq qalıb. Teatrın səhnəsində İ.Əfəndiyevin "Məhv olmuş gündəliklər" əsərində Fəridə, "Mahnı dağlarda qaldı" tamaşasında Gülgəz, M.F.Axundzadənin "Müsyö Jordan və dərviş Məstəli şah" komediyasında Şərəfnisə, M.İbrahimovun "Kəndçi qızı" əsərində Bənövşə, Anarın "Sizi deyib gəlmişəm" tamaşasında Zeynəb və s. maraqlı obrazlar yaradıb.

Daha sonra sənət dostları Vəfa Fətullayeva haqqında xatirələrini bölüşüblər.

Yaradıcılığının çiçəklənən dövründə ağır xəstəliyə düçar olan aktrisa 1987-ci il mayın 21-də, 42 yaşında vəfat edib.

Qeyd edək ki, Vəfa Fətullayeva görkəmli aktrisa, Xalq artisti Hökumə Qurbanova və Xalq rəssamı Nüsrət Fətullayevin övladıdır.

S.ABDULLAYEVA

525-ci qəzet.- 2015.- 2 oktyabr.- S.7.