Daşkənddə Nizami adına Universitetin 80 illiyi keçirilib

Daşkənddə Nizami adına Dövlət Pedaqoji Universitetinin 80 illik yubileyi geniş qeyd olunub.

Yubiley tədbirində Azərbaycanın Özbəkistandakı səfiri Hüseyn Quliyev, səfirliyin və onun nəzdindəki Heydər Əliyev adına Mədəniyyət Mərkəzinin əməkdaşları iştirak ediblər.

Tədbiri giriş sözü ilə açan Nizami adına Daşkənd Dövlət Pedaqoji Universitetinin rektoru, professor Şavkat Şaripov yarandığı vaxtdan bu günədək universitetin Özbəkistanın elmi həyatında tutduğu mövqe, ölkə üçün minlərlə mütəxəssisin yetişdirilməsi, kadr təminatı sahəsində həyata keçirdiyi işlərdən danışıb.

Ş.Şaripov universitetin Özbəkistan ilə Azərbaycan arasında dostluq körpüsü yaratdığını, əlaqələrinin dərinləşdirilməsi sahəsində həyata keçirdiyi layihələr barədə söhbət açıb. Azərbaycan səfirliyinin nəzdindəki Heydər Əliyev adına Mədəniyyət Mərkəzi ilə sıx əməkdaşlıq etdiklərini bildirib.

Daha sonra Özbəkistanın təhsil naziri Uluqbek İnoyatov çıxış edərək, Nizami adına Daşkənd Dövlət Pedaqoji Universitetinin fəaliyyətini yüksək qiymətləndirib. Özbəkistanın ali təhsil ocaqları arasında pedaqoji kadrların hazırlanmasında bu təhsil ocağının xüsusi xidmətlərini vurğulayıb və universitetin fərqlənən müəllimlərinə diplomlar təqdim edib.

Tədbir iştirakçılarını təbrik edən Azərbaycanın Özbəkistandakı səfiri Hüseyn Quliyev bu ali təhsil ocağının ölkələrimiz arasındakı münasibətlərin inkişafında xüsusi əhəmiyyət kəsb etdiyini bildirib. Diplomat Universitetin minlərlə məzununun ölkənin ictimai həyatında mühüm rol oynadığını, Özbəkistan ilə Azərbaycan arasında mədəni-ədəbi əlaqələrin inkişafına böyük töhfələr verdiyini söyləyib.

Səfir Nizami Gəncəvinin vətənindən, Gəncə Şəhər İcra Hakimiyyətinin başçısı Elmar Vəliyevin universitetin 80 illik yubileyi münasibətilə göndərdiyi təbrik məktubunu oxuyub və ali təhsil ocağının rektoruna Gəncə xalçası hədiyyə edib.

Yubiley tədbirində universitetin tələbələri, Özbəkistanın tanınmış sənətçiləri, həmçinin Daşkənddəki Heydər Əliyev adına Azərbaycan Mədəniyyət Mərkəzinin rəqs kollektivi çıxış edib.

Yubiley tədbiri çərçivəsində səfir Hüseyn Quliyev universitetin Filologiya fakültəsində yaradılmış Azərbaycan Mədəniyyəti və Ədəbiyyatı Mərkəzinin fəaliyyəti ilə tanış olub.

Heydər Əliyev adına Azərbaycan Mədəniyyət Mərkəzinin direktoru Samir Abbasov yaradılan mərkəzin fəaliyyəti, onun iki ölkə arasında əməkdaşlığın inkişafı sahəsində həyata keçirdiyi tədbirlər və layihələr barədə məlumat verib. Mərkəzdə ölkəmizin tarixi, mədəniyyəti, turizminə dair zəngin kitabxana, daimi sərgi, habelə kinozalın fəaliyyət göstərildiyi, burada müxtəlif tədbirlərin, sərgilərin keçirildiyi, Azərbaycan bədii filmlərinin mütəmadi olaraq nümayiş etdirildiyi diqqətə çatdırılıb.

Sonda səfir "İrəvan xalçaları" kitabı mərkəzin kitabxanasına hədiyyə edib.

S.ABDULLAYEVA

525-ci qəzet.- 2015.- 2 oktyabr.- S.7.