Yeni nəşrlər: "Şəhidlik zirvəsi"

Bu günlərdə şair publisist Xanəli Kərimlinin tərtibatı ilə işıq üzü görən "Şəhidlik zirvəsi" kitabı oxucu ünvanına yol aldı.

Kitabda Azərbaycanın ərazi bütövlüyünün müdafiəsi zamanı şəhid olmuş kapitan Ceyhun Orucəliyevin ömür və hərbi xidmət yoluna bir işıq tutulub.

Dörd bölmədən ibarət kitabda rəsmi materiallar, məqalələr və poetik nümunələr toplanıb. Bir Azərbaycan igidinin Vətənə xidmət yolunda şəhidlik zirvəsinə ucalması bu vətənin dəyərini, varlığını elə bil ki, özündə ehtiva edir. Ömrünün allı-güllü vədəsində Vətən uğrunda hər zaman canından keçməyə hazır olduğunu məğrur baxışı ilə dünyaya car çəkən Ceyhun haqqında yazılanları oxuduqca elə bil ki, vətənin şəhid övladının qüruru, yenilməzliyi oxucunu öz ağuşuna alır. Ceyhun sanki şəhid olacağını duyubmuş kimi çıxışlarında həmişə qəhrəman olmağın şərəfini onu dinləyənlərə təlqin etmək istəmişdir:

Övladsız bir vətən Vətən deyil ki,

Bir parça səmadır, torpaqdır, daşdır,

Oğul nəfəsini duydumu, bil ki,

Onun hər daşı da bir vətəndaşdır.

Həmyerlimiz böyük Məmməd Arazın sanki "Vətən daşı olmayandan, olmaz ölkə vətəndaşı" poetik fikrinin nə qədər doğru-dürüst olduğunu Ceyhun əməli ilə, xidməti ilə, amalı ilə sübuta yetirməyə çalışdı. Hələ 1999-cu ilin oktyabr ayının 13-də Azərbaycan Respublikasının Prezidenti olan ümummilli liderimiz Heydər Əliyevin Cəmşid Naxçıvanski adına Hərbi Liseyin Naxçıvan filialının və onun Tədris Korpusunun təntənəli açılış mərasimində iştirakı zamanı kursantlar adından çıxış edən Ceyhun Orucəliyev söz vermişdi ki, təhsil müddətində hərbi biliklərə dərindən yiyələnəcək, vətəninə, xalqına şərəflə xidmət edəcək və cənab Ali Baş Komandanımıza layiq zabit olacaq. Sonra da möhtərəm Heydər Əliyevə həsr olunmuş şeirlə çıxışını bitirmişdir:

Nurlu bir aləmsən günəşə bənzər,

Şöhrətin dünyada, dillərdə əzbər,

Qoşa addımlayır səninlə zəfər,

Övladı Sən olan vətən basılmaz.

Ceyhun mərdliyi, mübarizliyi, qorxmazlığı ilə verdiyi sözə sadiq olduğunu, övladsız bir vətənin vətən olmadığını sübuta yetirdi. Yüzlərlə Azərbaycan şəhidindən biri olan Ceyhun da məqamı çatanda ölümün gözünə dik baxa bildi. Onun haqqında bir hərbçi olaraq Əsgər Hüseynovun böyük ürək yanğısı ilə "Şərəfli ömür" adlı məqaləsində Ceyhunun necə bir ürək sahibi olduğunu, onun böyük arzularla yaşadığını qələmə alıb. Amma alın yazısının onu şəhidlik zirvəsinə ucaltması arzularını yarımçıq qoyduğunu təəssüf hissi ilə qələmə alıb. "Şəhidlik zirvəsi" kitabında yer alan həmin məqalədən: "O, 31 yaşında 7 aprel 2014-cü ildə vətənin bütövlüyü uğrunda döyüş tapşırığını yerinə yetirərkən qəhrəmancasına həlak oldu, şəhidlik zirvəsinə yüksəldi. Naxçıvanski adına Hərbi Liseyin "qırmızı" attestatını Muxtar Respublika Ali Məclisinin Sədri cənab Vasif Talıbov ilk kursantlardan biri olan Ceyhun Orucəliyevə təqdim etmişdir..."

Sözsüz ki, qəhrəmanlıq bir anın bəhrəsi deyil. Xarakterin, tərbiyənin, mənəvi yaddaşın gücü ilə diktə olunan keyfiyyətdir. Onun mahiyyətində təsadüf adlanan heç nə yoxdur. Qəhrəmanlıq bir anın içində doğulur. Ceyhun da bir anda qəbul etdiyi qərarla hərbi tapşırığı yerinə yetirmək üçün ölümün meydan suladığı bölgəyə yollandı. Özü də bilirdi ki, gedər-gəlməz yolun yolçusudur. Ancaq onu da bilirdi ki,

Şəhid olmaq-bu torpağı ürəyində qucaqlamaq,

Vətən daşın xəzinətək varlığıyla ovuclamaq.

Şəhid olmaq-mən demədən, vətən deyib,

Sinəsini bu torpağa sipər edən bölümsüzlük.

Şəhid olmaq-ölmək deyil,

Dünya boyda ölümsüzlük.

Ceyhun yoldaşları Nəvai və Novruzla birgə düşmən hiyləsinin qurbanı olsalar da, vətən qarşısındakı borclarını şərəflə yerinə yetirə bildilər. Döyüş tapşırığını başa çatdırmışlar. Belə bir Vətən övladı haqqında deyilənləri, yazılanları "Şəhidlik zirvəsi" kitabında cəm edib oxuculara təqdim etməklə Xanəli Kərimli bir şəhidin "oxuduğu" şəhidlik nəğməsini ellərə yaydı.

Əbədi kəfənin olan o bayraq,

Canından, qanından güc alır hər an.

Dünən bir ananın oğlu idinsə,

Bu günsə anandır bu Azərbaycan.

Ceyhunun qısa ömür yolu onu əsirlərin, qərinələrin yaddaşına yazılacaq qəhrəmanlıq alovundan keçirdi.

Vətəndaşlığın ən yüksək amal yolçusu olan Ceyhun bir hərbçi kimi böyük vətən sevgisi ilə şəhidlik zirvəsini fəth etdi. Bu dünyaya yadigar qalan Duyğu və Aylinin ömür yolunda bir cığır açdı. Zaman-zaman qəhrəmanlıq dastanı kimi oxunacaq, qürur verəcək bir ata kimi öz adı ilə atasının, anasının borcundan çıxaraq onların başını uca elədi.

"Şəhidlik zirvəsi" kitabında qəhrəmanlığı, ölməzliyi, dönməzliyi haqqında qürurla söhbət açılan Ceyhun Orucəliyevin timsalında vətən uğrunda şəhid olan qəhrəman Azərbaycan oğullarını anırıq. Ancaq bir arzu ürəyimi həmişə göynədir. Kaş ki, bu oğulların ürəyinin heykəlini yarada bilərdim. Ona baxan hər kəs görərdi ki, bu ürək Vətən həsrəti ilə döyünüb, Vətən torpağında vüsala yetib...

Xanəli müəllim isə şəhid oğullarımızdan biri olan Ceyhunu onu tanımayanlara tanıtmaqla bir vətəndaş borcunu boynundan götürdü. Allah şəhidlərimizə rəhmət eyləsin!

Şəhla NƏBİYEVA

525-ci qəzet.- 2015.- 15 oktyabr.- S.8.